ಹಾಗಾಗಿಯೇ, ಇಷ್ಟು ದಿನಗಳವರೆಗೆ ವಿಶ್ವ ಆರೋಗ್ಯ ಸಂಸ್ಥೆ ವಿರುದ್ಧ ಹರಿಹಾಯುತ್ತಿದ್ದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಒಂದು ಹೆಜ್ಜೆ ಮುಂದೆ ಹೋಗಿ, ಡಬ್ಲ್ಯುಎಚ್ಒನಿಂದ ಹೊರಬರುವುದಾಗಿ ಘೋಷಿಸಿದ್ದಾರೆ. ಅಮೆರಿಕದ ಈ ನಡೆ ಆತುರದ್ದು ಹೌದಾದರೂ, ಡಬ್ಲ್ಯುಎಚ್ಒ ತನ್ನ ವಿಫಲತೆಗಳನ್ನು ಮುಚ್ಚಿ ಹಾಕಲು ಯತ್ನಿಸುತ್ತಿರುವುದು ದುರದೃಷ್ಟಕರ. 194 ಸದಸ್ಯ ರಾಷ್ಟ್ರಗಳನ್ನು ಹೊಂದಿರುವ ವಿಶ್ವ ಆರೋಗ್ಯ ಸಂಸ್ಥೆಗೆ ಅಮೆರಿಕ ಪ್ರತಿ ವರ್ಷ 450 ಮಿಲಿಯನ್ ಡಾಲರ್ ದೇಣಿಗೆ ಒದಗಿಸುತ್ತಿದ್ದರೆ, ಚೀನಾದ ಕೊಡುಗೆ ಕೇವಲ 40 ಮಿಲಿಯನ್ ಡಾಲರ್. ಆದರೂ, ಅದು ಚೀನಾದ ಒತ್ತಡ, ಪ್ರಭಾವಕ್ಕೆ ಒಳಗಾಗಿ ಯಾಕೆ ವರ್ತಿಸಿತು, ಅಂತಾರಾಷ್ಟ್ರೀಯ ವಲಯದ ಸ್ವಾಸ್ಥ್ಯವನ್ನು ಏಕೆ ಕಡೆಗಣಿಸಿತು, ತಪು್ಪ ಮಾಹಿತಿಗಳಿಂದ ಏಕೆ ದಾರಿ ತಪ್ಪಿಸಿತು ಎಂಬ ಪ್ರಶ್ನೆಗಳಿಗೆ ಡಬ್ಲ್ಯುಎಚ್ಒ ಸಬೂಬುಗಳನ್ನಲ್ಲ ಸ್ಪಷ್ಟ ಮತ್ತು ವಾಸ್ತವದಿಂದ ಕೂಡಿದ ಉತ್ತರ ನೀಡಬೇಕಾಗಿದೆ. ಡಬ್ಲ್ಯುಎಚ್ಒಗೆ ನೀಡುವ ದೇಣಿಗೆಯನ್ನು ಕಳೆದ ತಿಂಗಳಲ್ಲೇ ತಡೆ ಹಿಡಿದ ಟ್ರಂಪ್, ಸಂಸ್ಥೆಯಲ್ಲಿ 30 ದಿನಗಳ ಒಳಗೆ ಸುಧಾರಣೆ ತರದಿದ್ದರೆ ಹೊರ ಹೋಗುವುದಾಗಿ ಮೇ 18ರಂದು ಡಬ್ಲ್ಯುಎಚ್ಒ ಪ್ರಧಾನ ಕಾರ್ಯದರ್ಶಿಗೆ ಪತ್ರ ಬರೆದಿದ್ದರು. ಇದರ ಬೆನ್ನಲ್ಲೇ ಚೀನಾ ಈ ಸಂಸ್ಥೆಗೆ ಮುಂದಿನ ಎರಡು ವರ್ಷದ ಅವಧಿಗೆ ಎರಡು ಬಿಲಿಯನ್ ಡಾಲರ್ ನೆರವು ನೀಡುವುದಾಗಿ ಘೋಷಿಸಿತು.
