ಖಾತೆಯಿಂದ ಹಣ ಎಗುರಿಸುವುದು, ಡೆಬಿಟ್, ಕ್ರೆಡಿಟ್ ಕಾರ್ಡ್ ಪಿನ್ ಕದ್ದು ವಂಚಿಸುವುದು, ಖಾತೆ/ಕಾರ್ಡ್ ಬ್ಲಾಕ್ ಆಗಿದೆ ಎಂದು ನಂಬಿಸಿ ದುಡ್ಡು ಕೀಳುವುದು, ಅಧಿಕ ಬಡ್ಡಿಯ ಆಸೆ ತೋರಿಸಿ ಇಡೀ ಠೇವಣಿ ಹಣವನ್ನೇ ಲಪಟಾಯಿಸಿ ಪರಾರಿಯಾಗುವುದು ಸೇರಿದಂತೆ ಸೈಬರ್ ಅಪರಾಧದ ಕರಾಳ ಮುಖಗಳು ಒಂದೊಂದಾಗಿ ಅನಾವರಣಗೊಳ್ಳುತ್ತ, ಜನರನ್ನು ಬೆಚ್ಚೀಬಿಳಿಸುತ್ತಿವೆ. ಈ ಬಗ್ಗೆ ಆರ್ಬಿಐ, ಇತರ ರಾಷ್ಟ್ರೀಕೃತ ಹಾಗೂ ಖಾಸಗಿ ಬ್ಯಾಂಕ್ಗಳು ಅರಿವು ಮೂಡಿಸುವ ನಿರಂತರ ಪ್ರಯತ್ನ ಮಾಡುತ್ತಿವೆಯಾದರೂ, ಜನಸಾಮಾನ್ಯರು ಆಮಿಷಕ್ಕೆ ಒಳಗಾಗಿ, ದಿಢೀರ್ ದುಡ್ಡು ಮಾಡುವ ಆಸೆಗೆ ಬಿದ್ದು ಮೋಸದ ಬಲೆಗೆ ಸಿಲುಕುತ್ತಿದ್ದಾರೆ. ಈಗ ಹೊಸ ಅಪಾಯ ಎದುರಾಗಿರುವುದು ಚೀನಾದ ನಕಲಿ ಕಂಪನಿಗಳು ಮತ್ತು ಆ್ಯಪ್ಗಳಿಂದ. ಚೀನಾದಿಂದ ಭಾರತ ಒಂದಿಲ್ಲೊಂದು ಆತಂಕ ಎದುರಿಸುತ್ತಲೇ ಇದ್ದು, ಆ ದೇಶಕ್ಕೆ ತಕ್ಕ ಉತ್ತರವನ್ನೂ ನೀಡಿದೆ. ಲಡಾಖ್ ಕಣಿವೆಯಲ್ಲಿ ಡ್ರಾ$ಗನ್ ರಾಷ್ಟ್ರ ಕಾಲುಕೆದರಿ ಜಗಳಕ್ಕೆ ಬಂದಾಗ, ವಿವಾದಿತ ಪ್ರದೇಶದಿಂದ ಅದು ಹಿಂದೆ ಸರಿಯುವಂತೆ ಮಾಡಿದ್ದು ಭಾರತದ ರಾಜತಾಂತ್ರಿಕ ವಿಜಯ.
