ಖಿನ್ನತೆ ಬಿಡೋಣ, ಕರೊನಾ ಗೆಲ್ಲೋಣ; ಆತ್ಮವಿಶ್ವಾಸಕ್ಕಿಂತ ಔಷಧವಿಲ್ಲ, ಭಯಮುಕ್ತ ಬದುಕೇ ಮದ್ದು

ರಮೇಶ ದೊಡ್ಡಪುರ/ಗೋವಿಂದರಾಜು ಚಿನ್ನಕುರ್ಚಿ ಬೆಂಗಳೂರು

ಉದ್ಯೋಗ, ವ್ಯಾಪಾರ, ಶಿಕ್ಷಣ, ಆರ್ಥಿಕತೆ ಸೇರಿದಂತೆ ಎಲ್ಲ ಕ್ಷೇತ್ರಗಳ ಮೇಲೆ ಬರೆ ಎಳೆದಿರುವ ಕರೊನಾ ಮಹಾಮಾರಿ ದಿನಕಳೆದಂತೆ ಜನರ ಆತ್ಮವಿಶ್ವಾಸ, ಜೀವನಪ್ರೀತಿ, ಧೈರ್ಯ, ಸಂಬಂಧಗಳಿಗೂ ಕೊಳ್ಳಿ ಇಡುತ್ತಿರುವುದು ಅನೇಕ ಜೀವಗಳಿಗೂ ಮುಳುವಾಗುತ್ತಿದೆ. ಕರೊನಾ ಬಂತೆಂದು ಖಿನ್ನತೆಗೆ ಒಳಗಾಗಿ ಆತ್ಮಹತ್ಯೆ ಹಾದಿ ಹಿಡಿಯುವವರು ಒಂದೆಡೆಯಾದರೆ ಸೋಂಕಿತರನ್ನು ದೂರ ಅಟ್ಟಿ, ಮೌನವೀಯ ಮೌಲ್ಯಗಳನ್ನು ಕಿತ್ತೆಸೆಯುತ್ತಿರುವ ಪ್ರಕರಣಗಳು ಸ್ವಸ್ಥ ಸಮಾಜ ಅಸ್ವಸ್ಥಗೊಳ್ಳುತ್ತಿರುವ ಅಪಾಯದ ಸಂದೇಶವನ್ನು ಸಾರಿದೆ.

ಗುರುವಾರ ಪುಣೆಯಲ್ಲಿ ಹೋಟೆಲ್ ಉದ್ಯಮ ನಡೆಸುತ್ತಿದ್ದ 43 ವರ್ಷದ ಪ್ರೇಮನಾಥ ಕೃಷ್ಣ ಶೆಟ್ಟಿ ಹಾಗೂ ಶುಕ್ರವಾರ ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆಯ ಶೌಚಗೃಹದಲ್ಲಿ 60 ವರ್ಷದ ವೃದ್ಧರೊಬ್ಬರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಕರ್ನಾಟಕದಲ್ಲಿ ಒಬ್ಬ ಪೊಲೀಸ್ ಸೇರಿ ಮೂವರು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಒಬ್ಬ ಪೊಲೀಸ್ ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ. ಇತರ ರಾಜ್ಯಗಳಲ್ಲೂ ಕರೊನಾ ಸೋಂಕಿತರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಸೋಂಕಿತರಷ್ಟೇ ಅಲ್ಲದೇ ಕರೊನಾದಿಂದಾಗಿ ಸೃಷ್ಟಿಯಾದ ಆರ್ಥಿಕ ಮುಗ್ಗಟ್ಟಿನಿಂದ ಅನೇಕರು ಆತ್ಮಹತ್ಯೆ ಹಾದಿ ಹಿಡಿದಿದ್ದಾರೆ.

ಕನಿಕರ ಅಲ್ಲ ಮನುಷ್ಯತ್ವ ಬೇಕು: ಕರೊನಾ ಸೋಂಕಿತರನ್ನು ಕಡೆಗಣಿಸುವ ಅಥವಾ ದೂರದಿಂದ ಕನಿಕರ ತೋರುವ ಬದಲು ಮನುಷ್ಯತ್ವದಿಂದ ನೋಡುವಂತಾಗಬೇಕೆಂಬುದು ಹಲವರ ಆಶಯ. ಸೋಂಕಿತರನ್ನು ದೂರ ತಳ್ಳಿದಾಗ ನಮ್ಮೊಂದಿಗೆ ಯಾರೂ ಇಲ್ಲ ಎಂಬ ಭಾವನೆಯಲ್ಲಿ ಖಿನ್ನತೆಗೆ ಒಳಗಾಗುತ್ತಾರೆ. ಅಂಥವರಲ್ಲಿ ಅನೇಕರು ಆತ್ಮಹತ್ಯೆಗೆ ಶರಣಾಗುತ್ತಾರೆ. ಹೀಗಾಗಿ ಅವರಿಗೆ ಆತ್ಮಸ್ಥೈರ್ಯ ತುಂಬುವ ಕೆಲಸವಾದಾಗ ಬದುಕುವ ಆಸೆ ಮನಸ್ಸಿನಲ್ಲಿ ಗಟ್ಟಿಗೊಳ್ಳುತ್ತದೆ ಎಂಬುದು ಮನೋವೈದ್ಯರ ಅಭಿಪ್ರಾಯ.

ಬೆಂಗ್ಳೂರಲ್ಲೇ 3 ಆತ್ಮಹತ್ಯೆ: ಶುಕ್ರವಾರ ಬೆಳಗ್ಗೆ ಕೋವಿಡ್ ಆಸ್ಪತ್ರೆಯಲ್ಲಿ 60 ವರ್ಷದ ಕುಣಿಗಲ್ ಮೂಲದ ರಾಜಗೋಪಾಲನಗರ ನಿವಾಸಿ ವೃದ್ಧೆ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಅವರ ಕುಟುಂಬದಲ್ಲಿ ಸೊಸೆ ಮತ್ತು ಮೊಮ್ಮಗ ಸೇರಿ ನಾಲ್ವರಿಗೆ ಸೋಂಕು ಕಾಣಿಸಿಕೊಂಡಿತ್ತು. ಆರೋಗ್ಯ ಸಾಕಷ್ಟು ಸುಧಾರಿಸಿತ್ತಾದರೂ ಸಾಕಷ್ಟು ಮಾನಸಿಕ ಖಿನ್ನತೆಗೆ ಒಳಗಾಗಿದ್ದರು. ನಾಲ್ಕು ಬಾರಿ ಮಾನಸಿಕ ತಜ್ಞರಿಂದ ಕೌನ್ಸೆಲಿಂಗ್ ಮಾಡಿಸಲಾಗಿತ್ತಾದರೂ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಕರೊನಾ ಸೋಂಕು ದೃಢಪಟ್ಟ ಹಿನ್ನೆಲೆಯಲ್ಲಿ ಪೊಲೀಸ್ ಬಸ್​ನಲ್ಲೇ ಕೆಎಸ್​ಆರ್​ಪಿಯ 50 ವರ್ಷದ ಕಾನ್ ಟೇಬಲ್ ಸೋಮವಾರ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಅದಕ್ಕೂ ಮೊದಲು ಕೋವಿಡ್ ನಿಗದಿತ ಆಸ್ಪತ್ರೆಯ 7ನೇ ಮಹಡಿಯಿಂದ ಜಿಗಿದಿದ್ದ 50 ವರ್ಷದ ಕರೊನಾ ಸೋಂಕಿತರೊಬ್ಬರು ಆತ್ಮಹತ್ಯೆ ಮಾಡಿಕೊಂಡಿದ್ದರು.

ಮುಂಜಾಗ್ರತೆ...:

• ಬಿಸಿನೀರನ್ನೇ ಸೇವಿಸಿ, ನಿತ್ಯಯೋಗಾಸನ, ಪ್ರಾಣಾಯಾಮ ಮಾಡಿ

• ಅಡುಗೆಯಲ್ಲಿ ಅರಿಶಿಣ, ಜೀರಿಗೆ, ಧನಿಯಾ, ಬೆಳ್ಳುಳ್ಳಿ ಬಳಸಿ, ಚ್ಯವನ್​ಪ್ರಾಶ್, ಹರ್ಬಲ್ ಟೀ ಸೇವಿಸಿ
• ದಿನಕ್ಕೆರಡು ಬಾರಿ ಗೋಲ್ಡನ್ ಮಿಲ್ಕ್ (ಅರಿಶಿಣ ಮಿಶ್ರಿತ ಹಾಲು) ಕುಡಿಯಿರಿ ಪ್ರತಿದಿನ ಬೆಳಗ್ಗೆ ಹಾಗೂ ರಾತ್ರಿ ಮೂಗಿನ ಎರಡೂ ಹೊಳ್ಳೆಗೆ ಶುದ್ಧ ಕೊಬ್ಬರಿ ಎಣ್ಣೆ, ಎಳ್ಳೆಣ್ಣೆ ಅಥವಾ ತುಪ್ಪ ಸವರಿಕೊಳ್ಳಿ
• ಕುದಿಯುವ ನೀರಿನಲ್ಲಿ ಪುದೀನ ಅಥವಾ ಓಮದ ಕಾಳು ಹಾಕಿ ಹಬೆ ತೆಗೆದುಕೊಳ್ಳಿ (ಆಯುಷ್ ಇಲಾಖೆ ಸಲಹೆಗಳು, ಪೂರ್ಣ ಮಾಹಿತಿಗೆ ಆಯುಷ್ ವೈದ್ಯರನ್ನು ಸಂರ್ಪಸಿ)

ಆತ್ಮಸ್ಥೈರ್ಯ ಬಲಪಡಿಸಿ:

• ಆಸ್ಪತ್ರೆಗಳಲ್ಲಿ ಆತ್ಮಸ್ಥೈರ್ಯ ಹೆಚ್ಚಿಸುವ ಕೌನ್ಸೆಲಿಂಗ್, ಮನರಂಜನಾ ಚಟುವಟಿಕೆ ಆಯೋಜನೆ
• ಸೋಂಕಿತರ ಕುಟುಂಬದವರನ್ನು ಕೀಳಾಗಿ ಕಾಣದಂತೆ ನೆರೆಹೊರೆಯವರಿಗೆ ತಿಳಿವಳಿಕೆ
• ಕರೊನಾ ವಾರಿಯರ್​ಗಳನ್ನು ಅಪಮಾನಿಸುವವರ ವಿರುದ್ಧ ಕಾನೂನು ಕ್ರಮ ಸಂತರು, ಮಠಾಧೀಶರು, ಸೆಲೆಬ್ರಿಟಿಗಳಿಂದ ಸಮಾಜಕ್ಕೆ ಸಂದೇಶ ನೀಡುವುದು
• ಸೋಂಕಿನಿಂದ ಮುಕ್ತರಾದವರ ಅನುಭವದ ವಿಡಿಯೋ ತುಣುಕುಗಳನ್ನು ಪ್ರಸಾರ ಮಾಡುವುದು
• ಕರೊನಾ ಸೋಂಕಿತರನ್ನು ಆಂಬುಲೆನ್ಸ್ ನಲ್ಲಿ ಕರೆದೊಯ್ಯುವ, ಅಂತಿಮ ಸಂಸ್ಕಾರ ಮಾಡುವ ವಿಡಿಯೋ ಮುದ್ರಣ ನಿಷೇಧವನ್ನು ಕಟ್ಟುನಿಟ್ಟಾಗಿ ಪಾಲಿಸುವುದು

ಮನಕಲಕುವ ಪ್ರಕರಣಗಳು:

• ಬೆಂಗಳೂರಿನ ಪೌರ ಕಾರ್ವಿುಕ ಮಹಿಳೆಯೊಬ್ಬರಿಗೆ ಕುಡಿಯಲು ನೀರನ್ನು ರಸ್ತೆಯಲ್ಲಿಟ್ಟು ಗದರಿದ ಮಹಿಳೆ
• ಕರೊನಾಗೆ ಬಲಿಯಾದವರ ಶವ ಪಡೆಯಲೂ ಕುಟುಂಬಸ್ಥರು ಮುಂದೆ ಬರುತ್ತಿಲ್ಲ, ವೈದ್ಯಕೀಯ ಸಿಬ್ಬಂದಿಯೇ ಅಂತಿಮ ಸಂಸ್ಕಾರ ನೆರವೇರಿಸುತ್ತಿದ್ದಾರೆ
• ಚನ್ನಪಟ್ಟಣದಲ್ಲಿ ಮನೆಯವರಿಗೆ ಕರೊನಾ ಬಂತೆಂಬ ಕಾರಣಕ್ಕೆ ಅವರ ಮಗುವನ್ನು ಪಡೆಯಲು ಯಾರೂ ಮುಂದೆ ಬಂದಿಲ್ಲ. ಪ್ರಾಥಮಿಕ ಹಂತದ ಕರೊನಾ ಇರುವ ತಂದೆಯೊಂದಿಗೆ ವಾಸಿಸಲೂ ಬಿಡಲಿಲ್ಲ

ಬದುಕುವ ಛಲ ಬೇಕು: ಎಲ್ಲರೂ ನಮ್ಮನ್ನು ಕಡೆಗಣಿಸುತ್ತಾರೆಂಬ ಭಾವನೆ ಬದಿಗಿಟ್ಟು ಕರೊನಾ ವಿರುದ್ಧ ಗೆದ್ದು ತೋರಿಸುವ ಮೂಲಕ ಸಮಾಜಕ್ಕೆ ಮಾದರಿಯಾಗಬೇಕೆಂಬ ಆತ್ಮಸ್ಥೈರ್ಯ ಮೂಡಿಸಿಕೊಳ್ಳುವ ಅನಿವಾರ್ಯತೆ ಸೋಂಕಿತರ ಮುಂದಿದೆ. ಬೇರೆಯವರ ಜತೆ ಬೆರೆತರೆ ಅವರಿಗೂ ಸೋಂಕು ಹರಡುವ ಸಾಧ್ಯತೆ ಇರುವುದರಿಂದ ಸೋಂಕಿನ ಲಕ್ಷಣ ಕಂಡುಬಂದ ತಕ್ಷಣವೇ ವೈದ್ಯರ ಮೊರೆ ಹೋಗಿ ಮುಂದಿನ ಅಪಾಯದಿಂದ ಪಾರಾಗಬೇಕು. ಹಾಗೆಯೇ ಜನರು ಕಡೆ ಗಣಿಸುತ್ತಾರೆಂಬ ಕಾರಣಕ್ಕೆ ಸೋಂಕನ್ನು ಮುಚ್ಚಿಟ್ಟು ಬಳಿಕ ಸಾವನ್ನು ಹತ್ತಿರಕ್ಕೆ ಕರೆದುಕೊಳ್ಳುವ ಬದಲು ಮೊದಲೇ ಚಿಕಿತ್ಸೆ ಪಡೆದು ಕರೊನಾ ಮಣಿಸಬೇಕು.

ಗುಣಮುಖರಾದವರೇ ಅಧಿಕ: ಆರೋಗ್ಯ ಇಲಾಖೆ ಶನಿವಾರ ಬಿಡುಗಡೆ ಮಾಡಿದ ಬುಲೆಟಿನ್ ಪ್ರಕಾರ 11,923 ಸೋಂಕಿತ ಪ್ರಕರಣಗಳಲ್ಲಿ 7,287 ಸೋಂಕಿತರು ಚಿಕಿತ್ಸೆ ಪಡೆದು ಸಂಪೂರ್ಣ ಗುಣಮುಖರಾಗಿ ಮನೆಗೆ ಹೋಗಿದ್ದಾರೆ. ದೇಶಾದ್ಯಂತ 3 ಲಕ್ಷ ಜನರು ಗುಣಮುಖರಾಗಿದ್ದು, ಚೇತರಿಕೆ ಪ್ರಮಾಣ ಶೇ.58ಕ್ಕಿಂತ ಅಧಿಕವಿದೆ. ಹೀಗಾಗಿ ಕರೊನಾ ಸೋಂಕಿಗೆ ತುತ್ತಾಗುವ, ಸಾವಿನ ಭಯಪಡಬೇಕಿಲ್ಲ.

ಆರೋಗ್ಯ ಕೌನ್ಸೆಲಿಂಗ್: ಆರೋಗ್ಯ ಇಲಾಖೆ ಮಾಹಿತಿಯಂತೆ ನಿತ್ಯ 1,500 ಜನರಿಗೆ ಕೌನ್ಸೆಲಿಂಗ್ ಮಾಡಲಾಗುತ್ತಿದೆ. ಇಲ್ಲಿವರೆಗೆ 1.7 ಲಕ್ಷ ಕೌನ್ಸೆಲಿಂಗ್ ಸೆಷನ್ ನಡೆಸಲಾಗಿದೆ. ಜತೆಗೆ ಆಸ್ಪತ್ರೆಗಳಲ್ಲಿ ದಾಖಲಾಗಿರುವ ಸೋಂಕಿ ತರನ್ನು ಕೌನ್ಸೆಲಿಂಗ್ ಒಳಪಡಿಸಲಾಗುತ್ತಿದೆ.