Lakhimpur Kheri Case: ತನಿಖೆ ಮೇಲ್ವಿಚಾರಣೆಗೆ ನಿವೃತ್ತ ನ್ಯಾಯಮೂರ್ತಿಗಳ ನೇಮಕ

ನವದೆಹಲಿ: ಎಂಟು ಜನರು ಮೃತಪಟ್ಟಿದ್ದ ಉತ್ತರಪ್ರದೇಶದ ಲಖೀಂಪುರ್​ ಖೇರಿ ಪ್ರಕರಣದಲ್ಲಿ ನಡೆಯುತ್ತಿರುವ ತನಿಖೆಯ ಬಗ್ಗೆ ರಾಜ್ಯದ ಪೊಲೀಸರು​ ಸಲ್ಲಿಸಿದ ಸ್ಟೇಟಸ್​ ರಿಪೋರ್ಟ್​ ಬಗ್ಗೆ ಸುಪ್ರೀಂ ಕೋರ್ಟ್​ ಅಸಮಾಧಾನ ವ್ಯಕ್ತಿಪಡಿಸಿತು. ಅಕ್ಟೋಬರ್ 3 ರಂದು ನಡೆದಿದ್ದ ಘಟನೆಯ ಕುರಿತಾಗಿ ಎರಡು ಎಫ್​ಐಆರ್​ಗಳು ದರ್ಜಾಗಿದ್ದು, ಈವರೆಗೆ ಪೊಲೀಸರು ಯಾವುದೇ ಚಾರ್ಜ್​ಶೀಟ್​ ಸಲ್ಲಿಸಿಲ್ಲ.

ಪ್ರಕರಣದ ತನಿಖೆಯ ಪ್ರಗತಿಯ ಬಗ್ಗೆ ಯುಪಿ ಪೊಲೀಸರು ಸಲ್ಲಿಸಿರುವ ವರದಿಯಲ್ಲಿ ಹೆಚ್ಚಿನ ಸಾಕ್ಷಿಗಳನ್ನು ವಿಚಾರಣೆ ಮಾಡಲಾಗಿದೆ ಎಂಬುದರ ಹೊರತಾಗಿ ಏನೂ ಇಲ್ಲ. ತನಿಖೆ ನಾವು ಅಪೇಕ್ಷಿಸಿದ ರೀತಿಯಲ್ಲಿ ನಡೆಯುತ್ತಿಲ್ಲ ಎಂದು ನ್ಯಾಯಮೂರ್ತಿಗಳು ಬೇಸರ ವ್ಯಕ್ತಪಡಿಸಿದರು.

ಇದನ್ನೂ ಓದಿ: ಮಲಗಿದ್ದ ಮಹಿಳೆ ಮೇಲೆ ಕುಸಿದ ಗೋಡೆ: ನಿದ್ದೆಯಲ್ಲೇ ಬಂದೆರಗಿದ ಜವರಾಯ

ಜೊತೆಗೆ, ಪ್ರಕರಣದಲ್ಲಿ ಸಾಕ್ಷ್ಯಗಳು ಕಲಸಿಹೋಗದಂತೆ ನೋಡಿಕೊಳ್ಳಲು ಅನ್ಯ ಹೈಕೋರ್ಟ್​​ನ ಓರ್ವ ನಿವೃತ್ತ ನ್ಯಾಯಾಧೀಶರನ್ನು ನೇಮಕ ಮಾಡುವುದಾಗಿ ಕೋರ್ಟ್​ ಹೇಳಿತು. ಪಂಜಾಬ್​ ಮತ್ತು ಹರಿಯಾಣ ಹೈಕೋರ್ಟ್​ನ ನಿವೃತ್ತ ನ್ಯಾಯಮೂರ್ತಿ ರಾಕೇಶ್​ ಕುಮಾರ್​ ಜೈನ್​ ಅಥವಾ ನಿವೃತ್ತ ನ್ಯಾಯಮೂರ್ತಿ ರಣಜೀತ್​ ಸಿಂಗ್​ ಅವರನ್ನು ತನಿಖೆಯ ಮೇಲ್ವಿಚಾರಣೆಗಾಗಿ ನೇಮಿಸುವ ಇಂಗಿತ ವ್ಯಕ್ತಪಡಿಸಿತು.

ಈ ನಡುವೆ, ಲಖೀಂಪುರ್​ ಖೇರಿಯಲ್ಲಿ ಅ.3 ರಂದು ಮೃತಪಟ್ಟಿದ್ದ ಸ್ಥಳೀಯ ಪತ್ರಕರ್ತ ರಮಣ್ ಕಶ್ಯಪ್​ ಅವರನ್ನು ರೈತರು ಸಾಯಿಸಿಲ್ಲ. ಬದಲಿಗೆ ರೈತರ ಮೇಲೆ ಹರಿದುಹೋದ ವಾಹನದಡಿಯಲ್ಲೇ ಅವರೂ ಸಿಕ್ಕಿ ಸತ್ತಿದ್ದಾರೆ ಎಂದು ಸರ್ಕಾರ ಕೋರ್ಟ್​ಗೆ ತಿಳಿಸಿತು. ವಿಚಾರಣೆಯನ್ನು ಶುಕ್ರವಾರ(ನ.12)ಕ್ಕೆ ಮುಂದೂಡಲಾಯಿತು. (ಏಜೆನ್ಸೀಸ್)

https://www.vijayavani.net/will-start-free-school-in-puneeths-name-in-bellary-says-janardhana-reddy/

https://www.vijayavani.net/video-fans-worship-puneeth-rajkumar-and-offer-biriyani-chicken-curry/