ತುರ್ತು ಪಾಸ್, ನಿರ್ವಹಣೆ ನಪಾಸು!: ಕೆಎಸ್​ಪಿ ಕ್ಲಿಯರ್ ಪಾಸ್ ದುರ್ಬಳಕೆ ಆರೋಪ

ಅವಿನಾಶ್ ಮೂಡಂಬಿಕಾನ ಬೆಂಗಳೂರು

ಲಾಕ್​ಡೌನ್​ನಿಂದ ಲಕ್ಷಾಂತರ ಮಂದಿ ಊರುಗಳಿಗೆ ತೆರಳಲಾಗದೆ ರಾಜ್ಯದ ವಿವಿಧೆಡೆ ಸಿಲುಕಿಕೊಂಡಿದ್ದನ್ನು ಗಮನದಲ್ಲಿಟ್ಟುಕೊಂಡು ಅನ್ಯ ಜಿಲ್ಲೆಗಳಿಗೆ ತೆರಳಲು ಸರ್ಕಾರ ರೂಪಿಸಿದ್ದ ಆನ್​ಲೈನ್ ಕೆಎಸ್​ಪಿ ಕ್ಲೀಯರ್​ಪಾಸ್ ಸಂಪೂರ್ಣವಾಗಿ ದುರ್ಬಳಕೆಯಾಗುತ್ತಿದೆ. ಇದರಿಂದ ರಾಜ್ಯದಲ್ಲಿ ಜನರ ಓಡಾಟ ಹೆಚ್ಚಾಗಿದ್ದು, ನಿಯಂತ್ರಣದಲ್ಲಿರುವ ಕರೊನಾವೈರಸ್ ಎಲ್ಲೆಡೆ ಹರಡಿ ಸೋಂಕಿತರ ಪ್ರಮಾಣ ಭಾರಿ ಏರಿಕೆಯಾಗುವ ಲಕ್ಷಣಗಳಿವೆ.

ಸದ್ಯ ಮೊಬೈಲ್ ನಂಬರ್ ಆಧಾರದ ಮೇಲೆ ಪಾಸ್ ನೀಡಲಾಗುತ್ತಿದೆ. ಬೇರೆ ಬೇರೆ ಮೊಬೈಲ್ ನಂಬರ್​ನಿಂದ ನೋಂದಣಿ ಮಾಡಿ ಪಾಸ್ ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ. ಒಂದು ಜಿಲ್ಲೆಯಿಂದ ಮತ್ತೊಂದು ಜಿಲ್ಲೆಗೆ ವಾಹನದಲ್ಲಿ ಬೇಕಾ ಬಿಟ್ಟಿ ಓಡಾಡುವ ಪ್ರಯಾಣಿಕರ ಸಂಖ್ಯೆ ಅಧಿಕವಾಗಿದೆ. ಪ್ರಜ್ಞಾವಂತ ನಾಗರಿಕರಿಂದ ಪಾಸ್ ನಿರ್ವಹಣಾ ವೈಫಲ್ಯಕ್ಕೆ ಭಾರಿ ವಿರೋಧ ವ್ಯಕ್ತವಾಗಿದೆ.

ಇದನ್ನೂ ಓದಿ ಮೇ 17ರ ನಂತರವೂ ಲಾಕ್​ಡೌನ್​ ವಿಸ್ತರಣೆ ಸುಳಿವು ನೀಡಿರುವ ಪ್ರಧಾನಿ

ಸುಳ್ಳು ಕಾರಣ ನೀಡಿ ಪ್ರಯಾಣ: ಇದುವರೆಗೆ 2 ಲಕ್ಷಕ್ಕೂ ಅಧಿಕ ಮಂದಿ ಪಾಸ್ ಪಡೆದು ಬೇರೆ ಜಿಲ್ಲೆಗಳಿಗೆ ಪ್ರಯಾಣಿಸಿದ್ದು, ಇದರಲ್ಲಿ ಸುಳ್ಳು ಕಾರಣಗಳನ್ನು ನೀಡಿ ಪ್ರಯಾಣಿಸಿದವರೇ ಹೆಚ್ಚಾಗಿದ್ದಾರೆ. ಪ್ರತಿ ಪ್ರಯಾಣಿಕರ ಮೇಲೂ ಪೊಲೀಸರು ಕಣ್ಣಿಡಲು ಸಾಧ್ಯವಾಗುತ್ತಿಲ್ಲ. ಈ ಬೆಳವಣಿಗೆಯಿಂದ ರಾಜ್ಯದಲ್ಲಿ ಕರೊನಾ ಇನ್ನಷ್ಟು ಉಲ್ಬಣಗೊಳ್ಳಲಿದ್ದು, ಇದುವರೆಗೆ

ರಾಜ್ಯದಲ್ಲಿ ಜಾರಿಯಲ್ಲಿದ್ದ ಕಠಿಣ ಲಾಕ್​ಡೌನ್ ನಿಯಮ ವ್ಯರ್ಥವಾಗಲಿದೆ ಎಂದು ಮಾತು ಕೇಳಿಬಂದಿದೆ.

ತುರ್ತು ತೆರಳುವವರು ಟ್ಯಾಕ್ಸಿ ಅಥವಾ ಕೆಲ ವಾಹನಗಳನ್ನು ಅವಲಂಬಿಸುತ್ತಾರೆ. ಆಯಾ ವಾಹನಗಳ ನಂಬರ್ ಆಧಾರದ ಮೇಲೆ ಹೋಗಲು ಅನುಮತಿ ನೀಡಿದರೆ ಸಮಸ್ಯೆಯಾಗುತ್ತದೆ. ಈ ನಿಟ್ಟಿನಲ್ಲಿ ಮೊಬೈಲ್ ನಂಬರ್ ಆಧಾರವಾಗಿಟ್ಟುಕೊಂಡು ಆನ್​ಲೈನ್ ಪಾಸ್ ಕೊಡಲಾಗುತ್ತದೆ. ದುರ್ಬಳಕೆ ಮಾಡಿಕೊಳ್ಳುತ್ತಿರುವುದು ಗಮನಕ್ಕೆ ಬಂದರೆ ಅಂತವರ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ಇದನ್ನೂ ಓದಿ ಗೆದ್ದ ಹೃದಯವನ್ನು ಕೋವಿಡ್​ಗೆ ದಾನ ಮಾಡಿದ ಸಾನಿಯಾ ಮಿರ್ಜಾ

ಮೈಗೇಟ್​ನಿಂದ ಸಾಫ್ಟ್​ವೇರ್ ಅಭಿವೃದ್ಧಿ

ಮೈಗೇಟ್ ಸಾಫ್ಟ್​ವೇರ್ ಕಂಪನಿ ಸಹಾಯದಿಂದ ಕೆಎಸ್​ಪಿ ಕ್ಲೀಯರ್ ಪಾಸ್ ಸಾಫ್ಟ್​ವೇರ್ ಅಭಿವೃದ್ಧಿಪಡಿಸಲಾಗಿದ್ದು, ಬೆಂಗಳೂರಿನ ಎಂಜಿ ರಸ್ತೆಯಲ್ಲಿರುವ ಕಮ್ಯುನಿಕೇಷನ್ಸ್, ಲಾಜಿಸ್ಟಿಕ್ಸ್ ಆಂಡ್ ಮಾಡರ್ನೆಸೇಷನ್ ಕಚೇರಿಯಲ್ಲಿ ತಾಂತ್ರಿಕ ಕಾರ್ಯದ ನಿರ್ವಹಣೆ ಮಾಡಲಾಗುತ್ತಿದೆ. ಪೊಲೀಸರ ಸಹಭಾಗಿತ್ವದೊಂದಿಗೆ ಮೈಗೇಟ್ ಕಂಪನಿ ಮುಕ್ತವಾಗಿ ಈ ಸೇವೆ ಸಲ್ಲಿಸುತ್ತಿದೆ.

ಪಾಸ್ ಪಡೆಯುವುದು ಹೇಗೆ?

ಕೆಎಸ್​ಪಿ ಕ್ಲಿಯರ್ ಪಾಸ್ (http://kspclearpass.idp.mygate.com) ವೆಬ್​ಸೈಟ್​ಗೆ ಭೇಟಿ ಕೊಟ್ಟ ಕೂಡಲೇ ನಿಮ್ಮ ಮೊಬೈಲ್ ನಂಬರ್ ಕೇಳಲಾಗುತ್ತದೆ. ಮೊಬೈಲ್ ನಂಬರ್ ಅಳವಡಿಸಿದ ಬಳಿಕ, ಹೆಸರು, ವಿಳಾಸ, ಪಿನ್​ಕೋಡ್, ವಾಹನದ ನಂಬರ್ ನಮೂದಿಸಬೇಕು. ಅದು ಕನ್ಪಮ್ರ್ ಆದ ನಂತರ ಆಯ್ಕೆಯಲ್ಲಿ ವಾಹನದಲ್ಲಿ ಪ್ರಾಯಾಣಿಸುವವರ ಹೆಸರು, ಆಧಾರ್ ಕಾರ್ಡ್ ನಂಬರ್ ಹಾಕಿದರೆ ಆನ್​ಲೈನ್​ನಲ್ಲೇ ಪಾಸ್ ಲಭ್ಯ.

ಒಂದು ಕುಟುಂಬಕ್ಕೆ ಒಂದು ಟ್ರಿಪ್. ಊರಿಗೆ ತೆರಳಲು ಹಾಗೂ ಒಂದು ಟ್ರಿಪ್ ವಾಪಸ್ ಆಗಲು ಅವಕಾಶ ಕಲ್ಪಿಸಲಾಗಿದೆ. ಮತ್ತೆ ಹೋಗಲು ಅನುಮತಿ ಇಲ್ಲ. ತುರ್ತು ಬೇರೆ ಜಿಲ್ಲೆಗಳಿಗೆ ಹೋಗಬೇಕಾದವರಿಗೆ ಅನುಕೂಲವಾಗಲು ಈ ಸೇವೆ ಕಲ್ಪಿಸಲಾಗಿದೆ.

| ಸಿ.ಎಚ್.ಪ್ರತಾಪ್ ರೆಡ್ಡಿ ಎಡಿಜಿಪಿ, ಕಮ್ಯುನಿಕೇಶನ್ಸ್, ಲಾಜಿಸ್ಟಿಕ್ಸ್ ಆಂಡ್ ಮಾಡರ್ನೆಸೇಷನ್

https://www.vijayavani.net/new-norms-in-china-schools/