ಉತ್ತರಪ್ರದೇಶದಲ್ಲಿ ಕಾಣೆಯಾಗಿದ್ದ ವೃದ್ಧೆ ಕೊಡಗಿನಲ್ಲಿ ಪತ್ತೆ: 8 ತಿಂಗಳ ಬಳಿಕ ತಾಯಿ ಕಂಡು ಕಣ್ಣೀರಿಟ್ಟ ಮಗ

ಕೊಡಗು: ತಾಯಿಯನ್ನು ಹುಡುಕಿ ಉತ್ತರ ಪ್ರದೇಶದಿಂದ ಬಂದ ಮಗನಿಗೆ ಬರೋಬ್ಬರಿ 8 ತಿಂಗಳ ಬಳಿಕ ಕಳೆದುಕೊಂಡ ತಾಯಿ ಸಿಕ್ಕಿದ್ದಾಳೆ.

ಕೊಡಗಿನ ಮಡಿಕೇರಿಯಲ್ಲಿ ಇಂತಹ ಮನಕಲಕುವ ದೃಶ್ಯ ನಡೆದಿದೆ. 8 ತಿಂಗಳ ಬಳಿಕ ತಾಯಿ ಕಂಡು ಮಗ ಬಿಕ್ಕಿ ಬಿಕ್ಕಿ ಅತ್ತುಬಿಟ್ಟ. ಮಗನ ಕಂಡು ತಾಯಿ ಕೂಡ ಕಣ್ಣೀರಿಟ್ಟಳು.

ಉತ್ತರ ಪ್ರದೇಶದ ಡಾಣಿಣ್ ಪುರ್ ಎಂಬ ಗ್ರಾಮದಿಂದ ಈ ವೃದ್ಧೆ ಕಾಣೆಯಾಗಿದ್ದಳು. ಚಾತ್ರೆಗೆಂದು ಊರಿನಿಂದ ಹೊರಟು ತಪ್ಪಿಸಿಕೊಂಡಿದ್ದ ಮುಕ್ಕು ಎಂಬ ಹೆಸರಿನ ವೃದ್ಧೆ. ತಾಯಿಯನ್ನು ಉತ್ತರ ಪ್ರದೇಶದಿಂದ ಮಗ ಗಂಗಾಪ್ರಸಾದ್ ಹುಡುಕಿಕೊಂಡು ಬಂದಿದ್ದಾನೆ. ಸ್ಥಳೀಯರ ನೆರವಿನಿಂದ ತಾಯಿ ಮುಕ್ಕು ಮಗನನ್ನು ಸೇರಿದ್ದಾಳೆ.

ಮಡಿಕೇರಿಯ ಕಾಲೇಜು ರಸ್ತೆಯಲ್ಲಿ ಭಿಕ್ಷೆ ಬೇಡುತ್ತಿದ್ದ ವೃದ್ದೆ ಮುಕ್ಕು, ತನಲ್ ವೃದ್ಧಾಶ್ರಮದ ಮಹಮ್ಮದ್ ಎಂಬುವವರ ಸಹಾಯದಿಂದ ಮಗನ ಸೇರಿದ್ದಾಳೆ. 8 ತಿಂಗಳ ಬಳಿಕ ಒಟ್ಟಿಗೆ ಸೇರಿದ್ದ ತಾಯಿ ಮಗನ ಸಂತಸ ಮುಗಿಲು ಮುಟ್ಟಿತ್ತು.