1.10 ಲಕ್ಷ ರೂ. ಎಗರಿಸಿದ ಖದೀಮರು

ಕೋಲಾರ: ಕೋಲಾರ ತಾಲೂಕು ನರಸಾಪುರ ಗ್ರಾಮದಲ್ಲಿ ಮಂಗಳವಾರ ಮಧ್ಯಾಹ್ನ ರೈತರೊಬ್ಬರಿಗೆ ಯಾಮಾರಿಸಿದ ಖದೀಮರು ಬ್ಯಾಂಕಿನಿಂದ ಬಿಡಿಸಿಕೊಂಡು ಬಂದಿದ್ದ 1.20 ಲಕ್ಷ ರೂ. ಹಣದಲ್ಲಿ 1.10 ಲಕ್ಷ ರೂ. ಹೊತ್ತೊಯ್ದಿದ್ದಾರೆ.

ಸೂಲೂರು ಗ್ರಾಮದ ರಾಮಪ್ಪ (75) ಎಂಬುವವರು ಬ್ಯಾಂಕ್​ ಆ್​ ಬರೋಡಾದಿಂದ ಸುಮಾರು 1.20 ಲಕ್ಷ ರೂ.ಗಳನ್ನು ಬಿಡಿಸಿಕೊಂಡು ನರಸಾಪುರದ ಬಸ್​ ನಿಲ್ದಾಣದ ಬಳಿ ಇರುವ ಅಂಗಡಿಯಲ್ಲಿ ಕಡಲೆಪುರಿ ತೆಗೆದುಕೊಂಡು ಹೋಗುವಾಗ ಅಲ್ಲಿಗೆ ಬಂದ ಅಪರಿಚಿತ ವ್ಯಕ್ತಿ ನಿಮ್ಮ ಶರ್ಟ್​ ಮೇಲೆ ಗಲೀಜು ಇದೆ ಎಂದು ಯಾಮಾರಿಸಿದ್ದಾನೆ.

ಆಗ ರೈತ ಒಂದು ಕೈಯಲ್ಲಿ ಹಣದ ಬ್ಯಾಗ್​ ಇಟ್ಟುಕೊಂಡು ಇನ್ನೊಂದು ಕೈಯಲ್ಲಿ ತೊಳೆದುಕೊಳ್ಳಲು ಹೋದಾಗ, "ಎರಡು ಕೈಯಲ್ಲಿ ತೊಳೆದುಕೊಳ್ಳಿ' ಎಂದು ಹೇಳಿ ತಾನೇ ನೀರನ್ನೂ ಹಾಕಿದ್ದಾನೆ. ಆಗ ರೈತ ತನ್ನ ಹಣದ ಬ್ಯಾಗ್​ಅನ್ನು ಎರಡು ಮೀಟರ್​ ಅಂತರದ ಚಪ್ಪಡಿಯ ಮೇಲೆ ಇಟ್ಟು ಶರ್ಟ್​ ತೊಳೆದುಕೊಂಡು ಬಂದು ಬ್ಯಾಗ್​ ನೋಡಿದಾಗ ಬ್ಯಾಗ್​ ನಾಪತ್ತೆಯಾಗಿದೆ. ಅದೇ ಕ್ಷಣಕ್ಕೆ ನೀರು ಹಾಕಿದವನೂ ನಾಪತ್ತೆಯಾಗಿದ್ದಾನೆ. ಬ್ಯಾಗ್​ನಲ್ಲಿದ್ದ ಒಟ್ಟು ಹಣದಲ್ಲಿ 10 ಸಾವಿರ ರೂ.ಚೆಲ್ಲಾಪಿಲ್ಲಿಯಾಗಿ ಬಿದ್ದಿದ್ದು, ಉಳಿದ ಹಣ ಕಳ್ಳನ ಪಾಲಾಗಿದೆ. ತಕ್ಷಣ ರೈತ ಕಿರುಚಿಕೊಂಡು ಎಲ್ಲ ಕಡೆ ಹುಡುಕಿದರೂ ಹಣದ ಬ್ಯಾಗ್​ ಸಿಗಲಿಲ್ಲ. ಸ್ಥಳಕ್ಕೆ ಬಂದ ವೇಮಗಲ್​ ಪೊಲೀಸರು ಠಾಣೆಯ ಇನ್​ಸ್ಪೆಕ್ಟರ್​ ಮಂಜು, ಸಬ್​ ಇನ್​ಸ್ಪೆಕ್ಟರ್​ ಹೇಮಂತ್​ ಅವರು ಬ್ಯಾಂಕ್​ ಹಾಗೂ ಇತ ಕಡೆಯ ಸಿ.ಸಿ ಟಿವಿ ಕ್ಯಾಮರಾಗಳನ್ನು ಪರಿಶೀಲಿಸಿದ್ದು, ತನಿಖೆ ಮುಂದುವರಿಸಿದ್ದಾರೆ.