ಸೂಚ್ಯಂಕದ ಹಿನ್ನೆಲೆ: ಕಳೆದ ಕೆಲವು ದಶಕಗಳಲ್ಲಿ ಭಾರತ ಸ್ಥಿರವಾದ ಆರ್ಥಿಕ ಬೆಳವಣಿಗೆ ದಾಖಲಿಸುತ್ತ ಬಂದಿದೆ. ಆದರೆ ಆರೋಗ್ಯ ಕ್ಷೇತ್ರದ ಸಾಧನೆ ಇದಕ್ಕೆ ಪೂರಕವಾಗಿ ಇರಲಿಲ್ಲ. 2015ರಲ್ಲಿ ಎಲ್ಲ ರಾಜ್ಯಗಳ ಮುಖ್ಯಮಂತ್ರಿಗಳು ಮತ್ತು ಕೇಂದ್ರಾಡಳಿತ ಪ್ರದೇಶದ ಆಡಳಿತ ಮುಖ್ಯಸ್ಥರು ಒಮ್ಮತದಿಂದ ರಾಷ್ಟ್ರೀಯ ಅಭಿವೃದ್ಧಿ ಕಾರ್ಯಸೂಚಿಯನ್ನು ಒಪ್ಪಿಕೊಂಡಿದ್ದಾರೆ. ಆರೋಗ್ಯ, ಪೌಷ್ಟಿಕಾಂಶ, ಶಿಕ್ಷಣ, ಮಹಿಳೆ ಮತ್ತು ಮಕ್ಕಳ ವಿಚಾರಗಳು ಆದ್ಯತೆಯ ಮೇರೆಗೆ ಪರಿಗಣಿಸಲ್ಪಟ್ಟಿವೆ. ಕ್ಷಿಪ್ರಗತಿಯಲ್ಲಿ ಈ ಕ್ಷೇತ್ರದಲ್ಲಿ ಅಭಿವೃದ್ಧಿ ಸಾಧಿಸುವುದು ಈ ಕಾರ್ಯಸೂಚಿಯ ಉದ್ದೇಶ. ಇದರ ಹೊಣೆಗಾರಿಕೆಗಳು ಕೇಂದ್ರ ಮತ್ತು ರಾಜ್ಯಗಳ ನಡುವೆ ಹಂಚಿಕೊಂಡಿವೆ. ಆದಾಗ್ಯೂ ಬಹುತೇಕ ಎಲ್ಲವೂ ರಾಜ್ಯ ಸರ್ಕಾರಗಳದ್ದೇ ಹೊಣೆಗಾರಿಕೆ. ಹೀಗಾಗಿ ಈ ಪ್ರಗತಿಯ ವೇಗವನ್ನು ಹೆಚ್ಚಿಸಲು ಆರೋಗ್ಯ ಸೂಚ್ಯಂಕ ಸೇರಿ ವಿವಿಧ ಸೂಚ್ಯಂಕಗಳ ಮಾಪನವನ್ನು ಜಾರಿಗೊಳಿಸಲಾಗಿದೆ.
