ಕೇರಳದ ಬಜೆಟ್ ಪುಸ್ತಕದ ಮುಖಪುಟದಲ್ಲಿ ಗಾಂಧಿ ಹತ್ಯೆಯ ಚಿತ್ರಣ: ಕೇಂದ್ರ ಸರ್ಕಾರಕ್ಕೆ ಹಳೆಯ ದುರಂತ ನೆನಪಿಸಲು ಈ ನಡೆ ಎಂದ ಎಡರಂಗ ಸರ್ಕಾರ !

ತಿರುವನಂತಪುರ: ಕೇರಳದಲ್ಲಿ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ನೇತೃತ್ವದ ಸರ್ಕಾರ ಶುಕ್ರವಾರ ವಿಧಾನಸಭೆಯಲ್ಲಿ ಮಂಡಿಸಿದ 2020-21ನೇ ಸಾಲಿನ ರಾಜ್ಯ ಮುಂಗಡ ಪತ್ರದ ಮುಖಪುಟ ಈಗ ವಿವಾದದ ಕೇಂದ್ರ ಬಿಂದು.

ಪಿಣರಾಯಿ ವಿಜಯನ್ ನೇತೃತ್ವದ ಸರ್ಕಾರದ ಈ ರಾಜಕೀಯ ನಡೆ ವ್ಯಾಪಕ ಟೀಕೆಗೊಳಗಾಗಿದೆ. ಹಣಕಾಸು ಸಚಿವ ಥಾಮಸ್ ಐಸಾಕ್ ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದು, ನನ್ನ ಬಜೆಟ್​ ಭಾಷಣದ ಮುಖಪುಟ ಖಚಿತವಾಗಿಯೂ ಒಂದು ರಾಜಕೀಯ ನಡೆ. ಮಹಾತ್ಮ ಗಾಂಧಿ ಅವರ ಹತ್ಯೆ ಕುರಿತಂತೆ ಮಲಯಾಳಿ ಕಲಾವಿದರೊಬ್ಬರು ರಚಿಸಿದ ವರ್ಣಚಿತ್ರ ಅದು. ಮಹಾತ್ಮ ಗಾಂಧಿ ಅವರ ಹತ್ಯೆಯನ್ನು ನಾವು ಮರೆಯುವುದಿಲ್ಲ ಎಂಬ ಸಂದೇಶ ರವಾನಿಸುವುದಕ್ಕಾಗಿ ಈ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಸಮಜಾಯಿಷಿ ನೀಡಿದ್ದಾರೆ.

ಕೇಂದ್ರ ಸರ್ಕಾರದ ಎನ್​ಆರ್​ಸಿ, ಸಿಎಎ ಮುಂತಾದ ಕ್ರಮಗಳನ್ನು ನೇರವಾಗಿ ವಿರೋಧಿಸುತ್ತಿರುವ ಎಡರಂಗ ಸರ್ಕಾರದ ನಿಲುವನ್ನು ಮತ್ತೊಮ್ಮೆ ಸ್ಪಷ್ಟಪಡಿಸಿದ ಥಾಮಸ್​, ಯಾವಾಗ ಇತಿಹಾಸವನ್ನು ಮರುರಚಿಸಲಾಗುತ್ತದೆಯೋ ಅಂತಹ ಸನ್ನಿವೇಶದಲ್ಲಿ ಇದು ಬಹಳ ಪ್ರಾಮುಖ್ಯತೆ ಪಡೆಯುತ್ತದೆ. ಕೆಲವು ಜನಪ್ರಿಯ ನೆನಪುಗಳನ್ನು ಅಳಿಸಿಹಾಕುವ ಪ್ರಯತ್ನ ನಡೆಯುತ್ತಿದೆ. ದೇಶದ ಜನರನ್ನು ಕೋಮು ಭಾವನೆಗಳ ಮೂಲಕ ವಿಭಜಿಸುವ ಸಲುವಾಗಿ ಎನ್​ಆರ್​ಸಿಯನ್ನು ಬಳಸಲಾಗುತ್ತಿದೆ. ಕೇರಳ ಈ ವಿಚಾರದಲ್ಲಿ ಐಕ್ಯತೆಯನ್ನು ತೋರಿಸಲಿದೆ ಎಂದು ಹೇಳಿದರು.

ಈ ನಡೆಯಲ್ಲಿರುವ ಸಂದೇಶ ಸ್ಪಷ್ಟವಾಗಿದೆ. ಹಿಂದು ಕೋಮುವಾದಿಗಳು ಮಹಾತ್ಮ ಗಾಂಧಿ ಅವರ ಹತ್ಯೆ ಮಾಡಿದ್ದು. ಇಂದು ಕೇಂದ್ರ ಸರ್ಕಾರದ ಆಡಳಿತ ಚುಕ್ಕಾಣಿ ಹಿಡಿದಿರುವವರೂ ಅದೇ ಹಿಂದು ಕೋಮುವಾದಿಗಳು. ಅವರನ್ನು ಎಚ್ಚರಿಸುವ ಸಲುವಾಗಿ ಈ ರೀತಿ ನಡೆಯನ್ನು ನಾವು ಅನುಸರಿಸಿದ್ದೇವೆ ಎಂದು ಸಚಿವ ಥಾಮಸ್ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಚಿತ್ರದ ಬಗ್ಗೆ ಒಂದಿಷ್ಟು: ಟಾಮ್ ವೆಟ್ಟಕುಯಿ ಎಂಬ ಕಲಾವಿದನ ಡೆತ್ ಆಫ್ ಗಾಂಧಿ ಎಂಬ ಚಿತ್ರ ಇದು. ಇದರಲ್ಲಿ, ರಕ್ತ ಸಿಕ್ತವಾಗಿ ನೆಲದ ಮೇಲೆ ಉರುಳಿದ ಗಾಂಧಿ ಮತ್ತು ಅವರ ಸುತ್ತ ಇರುವ ಜನ ಕಂಬನಿ ಮಿಡಿಯುತ್ತಿರುವ ದೃಶ್ಯ ಇದರಲ್ಲಿದೆ. (ಏಜೆನ್ಸೀಸ್)