ಕೇದಾರನಾಥ, ಉತ್ತರಾಖಂಡ : ದ್ವಾದಶ ಜ್ಯೋತಿರ್ಲಿಂಗಗಳಲ್ಲಿ ಒಂದಾದ ಹಿಮಾಲಯ ಪರ್ವತದಲ್ಲಿರುವ ಕೇದಾರನಾಥ ಮಂದಿರದ ಬಾಗಿಲು ಶುಕ್ರವಾರ ತೆರೆಯಲಾಗಿದ್ದು, ದೇಶದ ವಿವಿಧ ಪ್ರಾಂತಗಳಿಂದ ಆಗಮಿಸಿದ್ದ ಲಕ್ಷಾಂತರ ಭಕ್ತರು ಇದಕ್ಕೆ ಸಾಕ್ಷಿಯಾದರು.
ಕೇದಾರನಾಥನ ದೇವಾಲಯವು ಆರು ತಿಂಗಳು ತೆರೆದಿದ್ದರೆ ಇನ್ನಾರು ತಿಂಗಳು ಮುಚ್ಚಿರುತ್ತದೆ. ಈ ವೇಳೆ ಕೇದಾರನಾಥನ ಉತ್ಸವ ಮೂರ್ತಿಗೆ ಊಖಿಮಠದಲ್ಲಿ ಪೂಜೆ ನಡೆಯುತ್ತದೆ. ಹೀಗೆ ಬಾಗಿಲು ತೆರೆಯುವ ಮತ್ತು ಮುಚ್ಚುವ ಅಧಿಕಾರ ವೈರಾಗ್ಯ ಪೀಠದ ಜಗದ್ಗುರುಗಳಿಗಿದ್ದು, ಪರಂಪರೆಯಂತೆ ಕೇದಾರ ಜಗದ್ಗುರು ರಾವಲ್ ಭೀಮಾಶಂಕರಲಿಂಗ ಶಿವಾಚಾರ್ಯ ಭಗವತ್ಪಾದರು ಅಕ್ಷಯ ತೃತೀಯಾದ ಶುಭ ಮುಹೂರ್ತದಲ್ಲಿ ಬಾಗಿಲು ತೆರೆದು ಕೇದಾರನಾಥನಿಗೆ ಪ್ರಥಮ ಪೂಜೆ ನೆರವೇರಿಸಿದರು.
ಊಖಿಮಠದ ಗದ್ದಿಸ್ಥಾನದಲ್ಲಿ ಭೈರವನಾಥನ ಪೂಜೆಯೊಂದಿಗೆ ಧಾರ್ಮಿಕ ವಿಧಿವಿಧಾನಗಳಿಗೆ ಚಾಲನೆ ನೀಡಲಾಯಿತು. ಕೇದಾರನಾಥನ ಉತ್ಸವ ಮೂರ್ತಿಯ ಪಲ್ಲಕ್ಕಿಯು ಸಕಲ ಮಿಲಿಟರಿ ಬ್ಯಾಂಡ್ ಸಹಿತವಾಗಿ ಗುಪ್ತಕಾಶಿ, ಪಾಠಾ, ಗೌರಿಕುಂಡದ ಮೂಲಕ ಗುರುವಾರ ಕೇದಾರನಾಥ ಧಾಮವನ್ನು ತಲುಪಿತು.
