ರಾಷ್ಟ್ರೀಯ ಅಂತರ ರಾಜ್ಯ ಅಥ್ಲೆಟಿಕ್ಸ್​: ಕರ್ನಾಟಕಕ್ಕೆ 3 ಚಿನ್ನ ಸಹಿತ ಒಟ್ಟು 15 ಪದಕ

ಮಹಿಳೆಯರ ಹೈಜಂಪ್​ ಸ್ಪರ್ಧೆಯಲ್ಲಿ ರಾಜ್ಯದ ಸುಪ್ರಿಯಾ ಬಿ. 1.80 ಮೀ. ಎತ್ತರ ಜಿಗಿಯುವ ಮೂಲಕ ಬೆಳ್ಳಿ ಪದಕ ಒಲಿಸಿಕೊಂಡರು. ಈ ಮೂಲಕ ಅವರು ಏಷ್ಯನ್​ ಗೇಮ್ಸ್​ ಅರ್ಹತೆಯ ಮಾನದಂಡವನ್ನೂ (1.80 ಮೀ) ಸಾಧಿಸಿದರು. ಹರಿಯಾಣದ ಪೂಜಾ 1.83 ಮೀ. ಜಿಗಿದು ಚಿನ್ನ ಜಯಿಸಿದರು.

ಪುರುಷರ 4/400 ಮೀ. ರಿಲೇಯಲ್ಲಿ ಕಶ್ಯಪ, ಮಿಜೋ ಕುರಿಯನ್​, ತೀರ್ಥೇಶ್​ ಶೆಟ್ಟಿ, ಯಶಸ್​ ಒಳಗೊಂಡ ರಾಜ್ಯ ತಂಡ 3 ನಿಮಿಷ, 9.51 ಸೆಕೆಂಡ್​ಗಳಲ್ಲಿ ಸ್ಪರ್ಧೆ ಮುಗಿಸಿ ಬೆಳ್ಳಿ ಗೆದ್ದುಕೊಂಡಿತು. ಮಹಿಳೆಯರ 4/400 ಮೀ. ರಿಲೇಯಲ್ಲಿ ಸಿಂಚಲ್​, ವಿಜಯಕುಮಾರಿ ಜಿ.ಕೆ., ಪೂವಮ್ಮ ಎಂ.ಆರ್​, ಪ್ರಿಯಾ ಮೋಹನ್​ ಒಳಗೊಂಡ ರಾಜ್ಯ ತಂಡ 3 ನಿಮಿಷ, 36.18 ಸೆಕೆಂಡ್​ಗಳಲ್ಲಿ ಓಡಿ ರಜತ ಪದಕ ಜಯಿಸಿತು. ಪುರುಷರ 10 ಸಾವಿರ ಮೀ. ಓಟದಲ್ಲಿ ರಾಜ್ಯದ ಶೈಲೇಶ್​ ಕುಶ್​ವಾಹ 30 ನಿಮಿಷ, 23.13 ಸೆಕೆಂಡ್​ಗಳಲ್ಲಿ ಸ್ಪರ್ಧೆ ಮುಗಿಸಿ ಕಂಚಿನ ಪದಕ ಒಲಿಸಿಕೊಂಡರು.