ಹನ್ನೊಂದು ಜನರ ಸಾವಿಗೆ ಕಾರಣವಾಯಿತು ಕಾಬೂಲ್ ಗುರುದ್ವಾರದ ಮೇಲಿನ ಉಗ್ರ ದಾಳಿ: ಹೊಣೆಗಾರಿಕೆ ಹೊತ್ತುಕೊಂಡಿತು ಐಸಿಸ್

ಕಾಬೂಲ್: ಅಫ್ಘಾನಿಸ್ತಾನದಲ್ಲಿ ಅಲ್ಪಸಂಖ್ಯಾತ ಸಮುದಾಯವಾಗಿರುವ ಸಿಖ್ಖರ ಪ್ರಾರ್ಥನಾ ಮಂದಿರದ ಮೇಲೆ ಬುಧವಾರ ಉಗ್ರ ದಾಳಿ ನಡೆದಿದ್ದು, ಹನ್ನೊಂದು ಜನ ಮೃತಪಟ್ಟಿದ್ದಾರೆ. ಹಲವರು ಗಾಯಗೊಂಡಿದ್ದಾರೆ. ಅಫ್ಘಾನಿಸ್ತಾನದ ರಾಜಧಾನಿ ಕಾಬೂಲ್‍ನಲ್ಲೇ ಈ ದಾಳಿ ನಡೆದಿದ್ದು, ದೇಶದಲ್ಲಿ ಅಲ್ಪಸಂಖ್ಯಾತ ಸಮುದಾಯದ ಮೇಲೆ ಇಂತಹ ಡೆಡ್ಲಿ ಅಟ್ಯಾಕ್ ನಡೆದಿರುವುದು ಇದೇ ಮೊದಲ ಸಲ ಎಂದು ಮಾಧ್ಯಮಗಳು ವರದಿಮಾಡಿವೆ.

ಕಾಬೂಲ್‍ನ ಶೋರ್ ಬಜಾರ್ ಏರಿಯಾದಲ್ಲಿ ಸ್ಥಳೀಯ ಕಾಲಮಾನ ಬುಧವಾರ ಬೆಳಗ್ಗೆ 7.45ಕ್ಕೆ ಬಂದೂಕುಧಾರಿಗಳು ದಾಳಿ ನಡೆಸಿದ್ದಾರೆ. ಈ ಸಂದರ್ಭದಲ್ಲಿ 150 ಭಕ್ತರು ಗುರುದ್ವಾರದ ಒಳಗೆ ಇದ್ದರು. ದಾಳಿ ಇನ್ನೂ ಮುಂದುವರಿದಿದ್ದು, ಭದ್ರತಾ ಪಡೆಗಳು ಭಕ್ತರ ರಕ್ಷಣಾ ಕಾರ್ಯಾಚರಣೆ ಮುನ್ನಡೆಸಿವೆ. ಈ ನಡುವೆ, 11 ಮಕ್ಕಳನ್ನು ಗುರುದ್ವಾರದ ಒಳಗಿನಿಂದ ಬಚಾವ್ ಮಾಡಲಾಗಿದೆ ಎಂದು ಟೋಲೋ ನ್ಯೂಸ್ ವರದಿ ಮಾಡಿದೆ.

ಇಸ್ಲಾಮಿಕ್ ಸ್ಟೇಟ್ಸ್ ಗ್ರೂಪ್‍ (ಐಸಿಸ್‍) ಉಗ್ರ ಸಂಘಟನೆ ಈ ದಾಳಿಯ ಹೊಣೆಗಾರಿಕೆ ಹೊತ್ತುಕೊಂಡಿದೆ. ಹಳೆ ಕಾಬೂಲ್‍ನಲ್ಲಿರುವ ಈ ಪ್ರದೇಶವನ್ನು ರಕ್ಷಣಾ ಪಡೆಗಳು ಸುತ್ತುವರಿದಿವೆ. ಬಂದೂಕುಧಾರಿಗಳ ಮೇಲೆ ಪ್ರತಿದಾಳಿ ಆರಂಭವಾಗಿದ್ದು, ರಕ್ಷಣಾ ಕಾರ್ಯ ಮುಂದುವರಿದಿದೆ.

ಇತ್ತೀಚಿನ ಮಾಹಿತಿ ಪ್ರಕಾರ, ಈ ದಾಳಿ ಮತ್ತು ರಕ್ಷಣಾ ಕಾರ್ಯಾಚರಣೆ ವಿಚಾರವಾಗಿ ಇಂಟೀರಿಯರ್ ಮಿನಿಸ್ಟ್ರಿ ವಕ್ತಾರ ತಾರಿಕ್ ಅರಿಯನ್‍ ಟ್ವೀಟ್ ಮಾಡಿದ್ದು, ಸಿಖ್ ಗುರುದ್ವಾರದ ಮೊದಲ ಮಹಡಿಯನ್ನು ತೆರವುಗೊಳಿಸಲಾಗಿದೆ. ಕಟ್ಟಡದೊಳಗೆ ಸಿಲುಕಿದ್ದ ಹಲವರನ್ನು ಹೊರ ಕರೆತರಲಾಗಿದೆ ಎಂಬ ಮಾಹಿತಿ ನೀಡಿದ್ದಾರೆ.

ಇದಕ್ಕೂ ಮುನ್ನ ಈ ದಾಳಿಯನ್ನು ಅಲ್ಲಿಯದ್ದೇ ಉಗ್ರ ಸಂಘಟನೆ ತಾಲೀಬಾನ್ ಮಾಡಿರಬಹುದು ಎಂಬ ಶಂಕೆ ವ್ಯಕ್ತವಾಗಿತ್ತು. ಆದರೆ, ಅದು ಈ ದಾಳಿಯ ಹೊಣೆಗಾರಿಕೆಯನ್ನು ನಿರಾಕರಿಸಿತ್ತು. ಈ ಸಂಬಂಧ ಅದರ ವಕ್ತಾರ ಜಬೀವುಲ್ಲಾ ಮುಜಾಹಿದ್  ಶೋರ್ ಬಜಾರ್ ಪ್ರದೇಶದಲ್ಲಿನ ದಾಳಿಗೂ ತಮಗೂ ಸಂಬಂಧ ಇಲ್ಲ ಎಂದು ಸ್ಪಷ್ಟಪಡಿಸಿದ್ದಾಗಿ ಖಮಾ ನ್ಯೂಸ್ ಏಜೆನ್ಸಿ ವರದಿ ಮಾಡಿತ್ತು.

                     | ನರೇಂದ್ರ ಮೋದಿ ಭಾರತದ ಪ್ರಧಾನಮಂತ್ರಿ

(ಏಜೆನ್ಸೀಸ್) 

https://www.vijayavani.net/prime-minister-modis-interaction-with-citizens-of-varanasi/