Dinchak Dinchak - ಜೊತೆಯಾಗಿ ಹಿತವಾಗಿ ಬಳಿಕ ಹೊಸ ಚಿತ್ರದಲ್ಲಿ ಅಗಸ್ತ್ಯ

ಕಳೆದ ವರ್ಷ "ಜೊತೆಯಾಗಿ ಹಿತವಾಗಿ' ಮೂಲಕ ನಾಯಕನಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದ ಯುವನಟ ಅಗಸ್ತ್ಯ, ಇದೀಗ ಮತ್ತೊಂದು ಹೊಸ ಕಥೆಯೊಂದಿಗೆ ವಾಪಸ್ಸಾಗಿದ್ದಾರೆ. ಇತ್ತೀಚೆಗಷ್ಟೆ ಚಿತ್ರದ ಹೆಸರು ರಿವೀಲ್​ ಮಾಡಲಾಗಿದ್ದು "ಡಿಂಚಕ್​ ಡಿಂಚಕ್​' ಎಂದು ನಾಮಕರಣ ಮಾಡಲಾಗಿದೆ. ಇತ್ತೀಚಿನ ದಿನಗಳಲ್ಲಿ ದಕ್ಷಿಣ ಭಾರತದಲ್ಲಿ ಜೆನ್​ಜೀ ಮತ್ತು ಜೆನ್​ ಆಲ್ಫಾಗಳನ್ನು ಗುರಿಯಾಗಿಸಿಕೊಂಡು ಬರುತ್ತಿರುವ ಕಥೆಗಳು ಹೆಚ್ಚು ಯಶಸ್ಸು ಕಾಣುತ್ತಿವೆ. ಹೀಗಾಗಿಯೇ ಆ ಅಲೆಯನ್ನು ಸದುಪಯೋಗಪಡಿಸಿಕೊಳ್ಳಲು ಇದೀಗ "ಡಿಂಚಕ್​ ಡಿಂಚಕ್​' ಟೀಂ ಮುಂದಾಗಿದೆ. ಹದಿಹರೆಯದ ಮನಸ್ಸುಗಳು ಮತ್ತು ಕೌಟುಂಬಿಕ ಪ್ರೇಕ್ಷಕರನ್ನು ಗಮನದಲ್ಲಿಟ್ಟುಕೊಂಡು ಈ ಕಥೆ ಮಾಡಿಕೊಳ್ಳಲಾಗಿದೆ. ಇನ್ನೇನು ಕೆಲವೇ ದಿನಗಳಲ್ಲಿ ಚಿತ್ರೀಕರಣ ಪ್ರಾರಂಭವಾಗಲಿದೆ. ನಾಯಕನಾಗಿ ನಟಿಸುವುದರ ಜತೆಜತೆಗೇ ಖುದ್ದು ಅಗಸ್ತ್ಯ ಅವರೇ ಈ ಚಿತ್ರದ ಕಥೆ, ಚಿತ್ರಕಥೆ ಮತ್ತು ನಿರ್ದೇಶನದ ಜವಾಬ್ದಾರಿಯನ್ನೂ ಹೊತ್ತಿರುವುದು ವಿಶೇಷ. ನಾಯಕಿ ಸೇರಿ ಉಳಿದ ತಾರಾಗಣದ ಬಗ್ಗೆ ಇನ್ನಷ್ಟೇ ಚಿತ್ರತಂಡ ಮಾಹಿತಿ ನೀಡಲಿದೆ. ಆನಂದ್​ ರಾಜ ವಿಕ್ರಮ್​ ಸಂಗೀತ ನಿರ್ದೇಶನದಲ್ಲಿ ಸಿನಿಮಾ ಮೂಡಿಬರಲಿದೆ.