ಬಿಜೆಪಿ ಆಡಳಿತದ ಚುಕ್ಕಾಣಿ ಹಿಡಿದ ಬಳಿಕ ವಿವಿಧ ಯೋಜನೆಗಳ ಫಲಾನುಭವಿಗಳು ಸೇರಿಕೊಂಡು ‘ಹಬ್ಬ’ದ ರೀತಿಯಲ್ಲಿ ಸಾಧನಾ ಸಮಾವೇಶ ಸಂಘಟಿಸಲಿದ್ದಾರೆ ಎಂದು ಸರ್ಕಾರ ಬಿಂಬಿಸಿಕೊಂಡಿದೆ. ಕೇಂದ್ರ ಸರ್ಕಾರದ ಯೋಜನೆ, ಕಾರ್ಯಕ್ರಮಗಳ ಮಾಹಿತಿ ಹಂಚಿಕೆ. ಜತೆಗೆ ರಾಜ್ಯ ಸರ್ಕಾರ ಜಾರಿಗೆ ತಂದ ಜನಪರ ಯೋಜನೆಗಳು, ಅಭಿವೃದ್ಧಿ ಪ್ರಚಾರವೇ ಈ ಸಮಾವೇಶದ ತಿರುಳು. ಕರೊನಾ ಸಂಕಷ್ಟ ಬಳಿಕ ರಾಜ್ಯದ ಅಭಿವೃದ್ಧಿ, ಆರ್ಥಿಕತೆ ಮತ್ತೆ ಹಳಿಗೆ ತರಲಾಗಿದೆ. ಕಳೆದ ಮೂರು ವರ್ಷಗಳಲ್ಲಿ ಮಾಡಿದ ಕೆಲಸಗಳ ‘ರಿಪೋರ್ಟ್ ಕಾರ್ಡ್’ ಜನರ ಮುಂದಿಡುತ್ತೇವೆ ಎಂದು ಸಿಎಂ, ಸಚಿವರು ಹೇಳಿಕೊಂಡಿದ್ದಾರೆ. ‘ಮಿಷನ್ ದಕ್ಷಿಣ’ ಅಭಿಯಾನ ಭಾಗವಾಗಿ ಹಳೇ ಮೈಸೂರು ಭಾಗದಿಂದ ಸಮಾವೇಶಕ್ಕೆ ಚಾಲನೆ ನೀಡಿ, ಆ ಮೂಲಕ ಸಂಘಟನೆ ಬಲಪಡಿಸಲು ಪಕ್ಷದ ನಾಯಕರು ಯೋಚಿಸಿದ್ದಾರೆ. ದೊಡ್ಡಬಳ್ಳಾಪುರ ಕಾರ್ಯಕ್ರಮದಲ್ಲಿ ಬೆಂಗಳೂರು ಗ್ರಾಮಾಂತರ, ತುಮಕೂರು, ಕೋಲಾರ, ಭಾಗಶಃ ಬೆಂಗಳೂರು ನಗರ ಜಿಲ್ಲೆಯ ಲಕ್ಷಾಂತರ ಜನರನ್ನು ಸೇರಿಸಿ ಜನಬಲ ಪ್ರದರ್ಶನಕ್ಕೆ ಕಮಲ ಪಡೆ ಉತ್ಸುಕವಾಗಿದೆ.
