2016 ರಲ್ಲಿ ಹೆಬ್ರಾನ್‌ನಲ್ಲಿ ಗಾಯಗೊಂಡಿದ್ದ ಪ್ಯಾಲಸ್ಟೈನ್ ದಾಳಿಕೋರನನ್ನು ಗುಂಡಿಕ್ಕಿ ಕೊಂದ ಇಸ್ರೇಲ್ ಸೈನಿಕ ಎಲೋರ್ ಅಜಾರಿಯಾ ಪ್ರಕರಣದ ತನಿಖೆ ಮತ್ತು ವಿಚಾರಣೆಯನ್ನು ಬೆಂಬಲಿಸುವ ಮೂಲಕ ಐಸೆನ್‌ಕೋಟ್ ಸುದ್ದಿಯಲ್ಲಿದ್ದರು. ರಾಜಕೀಯ ಒತ್ತಡಗಳ ನಡುವೆಯೂ ಸೇನಾ ಶಿಸ್ತು ಮತ್ತು ನೈತಿಕತೆಯನ್ನು ಕಾಯ್ದುಕೊಳ್ಳುವಲ್ಲಿ ಅವರು ಬದ್ಧರಾಗಿದ್ದರು.
ರಾಜಕೀಯ ಪ್ರವೇಶ ಮತ್ತು ವೈಯಕ್ತಿಕ ನೋವು
2022ರಲ್ಲಿ ಬೆನ್ನಿ ಗಾಂಟ್ಜ್ ಜತೆ ಸೇರಿ ರಾಜಕೀಯಕ್ಕೆ ಬಂದ ಐಸೆನ್‌ಕೋಟ್, ಅಕ್ಟೋಬರ್ 7ರ ಹಮಾಸ್ ದಾಳಿಯ ಬಳಿಕ ದೇಶಕ್ಕಾಗಿ ನೆತನ್ಯಾಹು ಅವರ ತುರ್ತು ಸರ್ಕಾರ ಸೇರಿದ್ದರು. ಆದರೆ, ಗಾಜಾ ಯುದ್ಧದ ನಂತರ ಸೂಕ್ತ ಯೋಜನೆಯಿಲ್ಲವೆಂದು ಜೂನ್ 2024ರಲ್ಲಿ ಆ ಸರ್ಕಾರ ತೊರೆದರು. ಈ ಯುದ್ಧದಲ್ಲಿ ಅವರ 25 ವರ್ಷದ ಮಗ ಗ್ಯಾಲ್ ಹಾಗೂ ಇಬ್ಬರು ಸೋದರಳಿಯಂದಿರು ಹುತಾತ್ಮರಾಗಿದ್ದಾರೆ.
ಜಾತಿ ನಿಂದನೆ ಮತ್ತು ವಿವಾದ
ಇಸ್ರೇಲಿ ಟಿವಿ ನಿರೂಪಕ ಯಿನಾನ್ ಮಗಾಲ್, ಐಸೆನ್‌ಕೋಟ್ ಅವರ ಮೊರೊಕ್ಕೊ-ಮಿಜ್ರಾಹಿ ಹಿನ್ನೆಲೆಯನ್ನು ಗುರಿಯಾಗಿಸಿಕೊಂಡು ‘ಅಶ್ಕೆನಾಜಿ ಗಣ್ಯರ ಕೈಗೊಂಬೆ’ ಎಂದು ಟೀಕಿಸಿದ್ದು ದೊಡ್ಡ ವಿವಾದ ಸೃಷ್ಟಿಸಿತು. ಈ ಹೇಳಿಕೆಗೆ ವ್ಯಾಪಕ ಖಂಡನೆ ವ್ಯಕ್ತವಾದಾಗ, ಮಗಾಲ್ ಸ್ಪಷ್ಟನೆ ನೀಡಿ ತಾನು ಅವರ ಮೂಲದ ಬಗ್ಗೆ ಹಗುರವಾಗಿ ಮಾತನಾಡಲಿಲ್ಲ ಎಂದರು. ಸ್ವತಃ ಪ್ರಧಾನಿ ನೆತನ್ಯಾಹು ಕೂಡ ಈ ಟೀಕೆಯನ್ನು ಖಂಡಿಸಿದ್ದಾರೆ.
