ಬಾಗಲಕೋಟೆ: ಉತ್ತರ ಕರ್ನಾಟಕ ನೀರಾವರಿ ಯೋಜನೆಗಳನ್ನು ಎರಡು ವರ್ಷದಲ್ಲಿ ಪೂರ್ಣಗೊಳಿಸುವಂತೆ ಆಗ್ರಹಿಸಿ ಕಾಂಗ್ರೆಸ್ ಹಿರಿಯ ನಾಯಕ ಎಸ್.ಆರ್.ಪಾಟೀಲ್ ನೇತೃತ್ವದಲ್ಲಿ ಉ.ಕ. ಸ್ವಾಭಿಮಾನ ವೇದಿಕೆ ಕೈಗೊಂಡಿರುವ ಟ್ರ್ಯಾಕ್ಟರ್ ರ್ಯಾಲಿ ಶನಿವಾರ ನಾಲ್ಕು ದಿನ ಪೂರೈಸಿದೆ. ಗದಗ ಜಿಲ್ಲೆಯ ನರಗುಂದದಿಂದ ಆರಂಭವಾಗಿರುವ ಈ ಸಂಕಲ್ಪ ಯಾತ್ರೆಗೆ ನಿರೀಕ್ಷೆಗೂ ಮೀರಿ ಜನಬೆಂಬಲ ವ್ಯಕ್ತವಾಗುತ್ತಿದ್ದು, ಹೋರಾಟಗಾರರಲ್ಲೂ ಹುಮ್ಮಸ್ಸು ಹೆಚ್ಚಿಸಿದೆ. ಶನಿವಾರ ವಿಜಯಪುರ ಜಿಲ್ಲೆಯಿಂದ ಬಾಗಲಕೋಟೆ ಜಿಲ್ಲೆ ಪ್ರವೇಶಿಸಿದ ಸಂಕಲ್ಪ ಯಾತ್ರೆಯು ಹೊಸೂರ ಕ್ರಾಸ್, ಗಲಗಲಿ, ರಬಕವಿ ಕ್ರಾಸ್, ಹಂಚಿನಾಳ ಕ್ರಾಸ್, ಮುಂಡಗನೂರ, ಚಿನಕುಂಡಿ, ಜಕನೂರ, ಜಮಖಂಡಿ ತಾಲೂಕು ಹಾಯ್ದು ಮುಧೋಳ ತಾಲೂಕು ಪ್ರವೇಶಿಸಿ ವಾಸ್ತವ್ಯ ಮಾಡಿದೆ.
