ಪಿಎಸಿಗೆ ತಡೆ, ಸ್ಪೀಕರ್ ಅನುಮಾನಾಸ್ಪದ ನಡೆ

ಬೆಂಗಳೂರು: ಕರೊನಾ ನಿಯಂತ್ರಣಕ್ಕಾಗಿ ನಡೆಸಲಾದ ವೈದ್ಯಕೀಯ ಪರಿಕರಗಳ ಖರೀದಿ ಪ್ರಕ್ರಿಯೆಯಲ್ಲಿ ಅಕ್ರಮಗಳಾಗಿರುವ ಕುರಿತಂತೆ ಸ್ಥಳ ಪರಿಶೀಲನೆಗೆ ಮುಂದಾಗಿದ್ದ ಸಾರ್ವಜನಿಕ ಲೆಕ್ಕಪತ್ರ ಸಮಿತಿಗೆ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ತಡೆ ಹಾಕಿರುವುದು ಅನುಮಾನಗಳಿಗೆ ಎಡೆ ಮಾಡಿದೆ.

ಆರೋಗ್ಯ ಪರಿಕರ ಹಾಗೂ ವೈದ್ಯಕೀಯ ಉಪಕರಣಗಳ ಖರೀದಿಯಲ್ಲಿ ಭ್ರಷ್ಟಾಚಾರವಾಗಿದೆ ಎಂಬ ದೂರುಗಳು ಬಂದ ಹಿನ್ನೆಲೆಯಲ್ಲಿ ಗುರುವಾರ ಸಾರ್ವಜನಿಕ ಲೆಕ್ಕಪತ್ರ ಸಮಿತಿ ಸುರಕ್ಷತಾ ಕ್ರಮಗಳ ಪರಿಶೀಲನೆ, ತನಿಖೆ ಹಾಗೂ ಸ್ಥಳ ತಪಾಸಣೆಗೆ ನಿರ್ಧರಿಸಿ ಈ ವಿಚಾರವನ್ನು 26ರಂದು ಸ್ಪೀಕರ್ ಗಮನಕ್ಕೆ ತಂದಿತ್ತು. ಎಚ್.ಕೆ. ಪಾಟೀಲ್ ಅಧ್ಯಕ್ಷತೆಯ ಸಮಿತಿ ಈ ಪತ್ರ ಕೊಟ್ಟ ದಿನವೇ ವಿಧಾನಸಭಾಧ್ಯಕ್ಷರ ಆದೇಶದಂತೆ ಕಾರ್ಯದರ್ಶಿ ಎಂ.ಕೆ.ವಿಶಾಲಾಕ್ಷಿ ಪ್ರಕಟಣೆ ಹೊರಡಿಸಿದ್ದಾರೆ.

ಇದನ್ನೂ ಓದಿ   ಕಾಡಾನೆ ನಿಯಂತ್ರಣಕ್ಕೆ ಜಿಲ್ಲಾಡಳಿತ, ಪೊಲೀಸ್ ಇಲಾಖೆಗೆ ಮನವಿ

ಆರೋಗ್ಯ ಮತ್ತು ಸಾಮಾಜಿಕ ಅಂತರ ಕಾಪಾಡುವ ದೃಷ್ಟಿಯಿಂದ ಮುಂದಿನ ಆದೇಶದವರೆಗೆ ರಾಜ್ಯದೊಳಗೆ ಅಥವಾ ಹೊರ ರಾಜ್ಯಗಳಲ್ಲಿ ಯಾವುದೇ ಅಧ್ಯಯನ ಪ್ರವಾಸ ಹಾಗೂ ಸ್ಥಳೀಯವಾಗಿಯೂ ಯಾವುದೇ ಭೇಟಿ ಅಥವಾ ಸ್ಥಳ ಪರಿಶೀಲನೆಗಳನ್ನು ಕೈಗೊಳ್ಳಬಾರದು ಎಂದು ತಿಳಿಸಿದ್ದರು. ಇದರ ವಿರುದ್ಧ ಸಮಿತಿ ತೀವ್ರ ಅಸಮಾಧಾನಗೊಂಡಿದೆ.

ಸ್ಪೀಕರ್ ಭೇಟಿಯಾದ ಎಚ್.ಕೆ.ಪಾಟೀಲ್

ವಿಧಾನಸಭಾಧ್ಯಕ್ಷರನ್ನು ಗುರುವಾರ ಭೇಟಿಯಾದ ಎಚ್.ಕೆ.ಪಾಟೀಲ್ ತನಿಖೆಗೆ ಅನುಮತಿ ಕೋರಿ ಮತ್ತೊಂದು ಪತ್ರ ನೀಡಿದರಲ್ಲದೆ ಸಮಿತಿಯ ತನಿಖೆ ಉದ್ದೇಶವನ್ನು ವಿವರಿಸಿದ್ದಾರೆ. ತಪಾಸಣೆಗೆ ತಡೆಯೊಡ್ಡುವುದು ಭ್ರಷ್ಟಾಚಾರಕ್ಕೆ ಪೋಷಣೆ ನೀಡಿದಂತಾಗಲಿದೆ ಎಂಬ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಸಾರ್ವಜನಿಕ ಲೆಕ್ಕಪತ್ರ ಸಮಿತಿಗೂ ಶಿಷ್ಟಾಚಾರ ಅನ್ವಯವಾಗಲಿದೆ. ಅದು ಹೇಗೆ ಕಾರ್ಯನಿರ್ವಹಿಸಬೇಕು ಎಂದು ವಿಧಾನಸಭಾಧ್ಯಕ್ಷರು ನಿರ್ಧರಿಸಲಿದ್ದಾರೆ. ಪಿಪಿಇ ಕಿಟ್ ಖರೀದಿಯಲ್ಲಿ ಲೋಪಗಳಾಗಿದ್ದರೆ ಸಿಎಂ ಇಲ್ಲವೇ ಸ್ಪೀಕರ್​ಗೆ ಪತ್ರ ಅಥವಾ ದೂರು ನೀಡಲಿ, ಅವರು ತನಿಖೆಗೆ ಆದೇಶಿಸಬಹುದು.

| ಎಸ್. ಸುರೇಶ್​ಕುಮಾರ್, ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಇಲಾಖೆ ಸಚಿವ

ಇದನ್ನೂ ಓದಿ  ಪರಸ್ಪರ ಅಂತರದೊಂದಿಗೆ ಬೀಜ ವಿತರಿಸಿಅವ್ಯವಹಾರ ಆರೋಪ

ಕರೊನಾ ನಿರ್ವಹಣೆಗೆ ಅಗತ್ಯವಾದ ಆರೋಗ್ಯ ಸುರಕ್ಷತಾ ಸಾಧನಗಳು, ವೈದ್ಯಕೀಯ ಪರಿಕರಗಳ ಖರೀದಿಯಲ್ಲಿ ಅವ್ಯವಹಾರ, ಪಾರದರ್ಶಕ ಕಾಯ್ದೆ ಉಲ್ಲಂಘನೆ ಹಾಗೂ ಕಳಪೆ ರ್ಯಾಪಿಡ್ ಕಿಟ್​ಗಳ ಪೂರೈಕೆ ಆರೋಪಗಳ ಕುರಿತಾದ ದೂರುಗಳು ಸಮಿತಿಗೆ ಸಲ್ಲಿಕೆಯಾಗಿದ್ದವು. ಸಂಕಷ್ಟ ಕಾಲದಲ್ಲಿ ಪದೇ ಪದೆ ಅವ್ಯವಹಾರದ ದೂರುಗಳು ಬಂದಿರುವುದು ಗಂಭೀರವಾಗಿದೆ ಎಂದು ಸಮಿತಿ ಕಳವಳ ವ್ಯಕ್ತಪಡಿಸಿ, ಈ ಕುರಿತು ಮೇ 19 ಮತ್ತು 26ರ ಸಮಿತಿ ಸಭೆಯಲ್ಲಿ ಸದಸ್ಯರೊಂದಿಗೆ ರ್ಚಚಿಸಿ ವಿಮಾನ ನಿಲ್ದಾಣ, ಆಸ್ಪತ್ರೆಗಳಿಗೆ ಭೇಟಿ, ಪರಿಕರಗಳ ಖರೀದಿ ದರ ಪರಿಶೀಲನೆ, ಇಲಾಖೆ ಅಧಿಕಾರಿಗಳು ಹಾಗೂ ತಜ್ಞರೊಂದಿಗೆ ರ್ಚಚಿಸಲು ಒಮ್ಮತ ನಿರ್ಧಾರ ಕೈಗೊಂಡಿತ್ತು.

ಕರೊನಾ ಸಂಕಷ್ಟದಲ್ಲೂ ಭ್ರಷ್ಟಾಚಾರ ನಡೆದಿದೆ. ಸಾರ್ವಜನಿಕ ಲೆಕ್ಕಪತ್ರ ಸಮಿತಿ ತನಿಖೆ ಹಾಗೂ ಸ್ಥಳ ತಪಾಸಣೆಗೆ ಅಡ್ಡಿಪಡಿಸುವ ತೀರ್ವನವನ್ನು ವಿಧಾನಸಭಾಧ್ಯಕ್ಷರು ತೆಗೆದುಕೊಂಡಿದ್ದಾರೆ. ವಿಧಾನ ಮಂಡಲದ ಸಮಿತಿಗಳ ಅಧಿಕಾರ ಮೊಟಕು ಹಾಗೂ ಭ್ರಷ್ಟಾಚಾರ ಪೋಷಿಸುವ ಪ್ರಯತ್ನವನ್ನು ಸ್ಪೀಕರ್ ಕೈಬಿಡಬೇಕು.

| ಎಚ್.ಕೆ. ಪಾಟೀಲ್

ಅಧ್ಯಕ್ಷ, ವಿಧಾನ ಮಂಡಲದ ಸಾರ್ವಜನಿಕ ಲೆಕ್ಕಪತ್ರ ಸಮಿತಿ

ಲಾಕ್ ಡೌನ್ ಹಿನ್ನೆಲೆಯಲ್ಲಿ ಸರ್ಕಾರದ ಮಾರ್ಗಸೂಚಿ ಅನ್ವಯ ಆದೇಶ ಹೊರಡಿಸಲಾಗಿದೆ. ಯಾವುದೇ ಸಮಿತಿ ಅಧ್ಯಕ್ಷರು ಸಭಾಧ್ಯಕ್ಷರ ಆದೇಶವನ್ನು ಪಾಲಿಸಬೇಕು. ಎಚ್.ಕೆ.ಪಾಟೀಲ್ ಪತ್ರ ಬರೆದಿರುವುದನ್ನು ಪರಿಶೀಲಿಸುತ್ತೇನೆ. ಲಾಕ್​ಡೌನ್ ಸಡಿಲಿಕೆ ಬಳಿಕ ಆದೇಶದ ಬಗ್ಗೆ ಮರು ಪರಿಶೀಲಿಸಲಾಗುವುದು.

| ವಿಶ್ವೇಶ್ವರ ಹೆಗಡೆ ಕಾಗೇರಿ ವಿಧಾನಸಭಾಧ್ಯಕ್ಷ

https://www.vijayavani.net/amit-shah-speaks-to-cms-of-all-states-regarding-lockdown-5-0/