ರಹಸ್ಯ ಕಾರ್ಯಾಚರಣೆಯ ಅಸಲಿ ಕಥೆ ಬಿಚ್ಚಿಟ್ಟ ಝೆಲೆನ್ಸ್ಕಿ: ಅರಬ್ ರಾಷ್ಟ್ರಗಳ ಆಕಾಶದಲ್ಲಿ ಇರಾನ್ ಡ್ರೋನ್‌ಗಳನ್ನು ಬೇಟೆಯಾಡಿದ್ದು ಹೇಗೆ..? Volodymyr Zelensky

ಈ ಕಾರ್ಯಾಚರಣೆಯ ಬಗ್ಗೆ ಮಾಹಿತಿ ನೀಡಿದ ಝೆಲೆನ್ಸ್ಕಿ, ಇದು ಕೇವಲ ತರಬೇತಿ ಅಥವಾ ತಾಲೀಮು ಆಗಿರಲಿಲ್ಲ. ನಮ್ಮ ಸೈನಿಕರು ರಣರಂಗದಲ್ಲಿ ಪರೀಕ್ಷಿಸಲ್ಪಟ್ಟ, ಯುಕ್ರೇನ್‌ನಲ್ಲಿಯೇ ತಯಾರಾದ ಅತ್ಯಾಧುನಿಕ ಇಂಟರ್ಸೆಪ್ಟರ್ ಡ್ರೋನ್​ಗಳನ್ನು ಬಳಸಿ ಶತ್ರು ಡ್ರೋನ್‌ಗಳನ್ನು ಹೊಡೆದುರುಳಿಸಿದ್ದಾರೆ ಎಂದು ತಿಳಿಸಿದ್ದಾರೆ.

ರಷ್ಯಾವು ಯುಕ್ರೇನ್ ಮೇಲೆ ದಾಳಿ ಮಾಡಲು ಇದೇ ಇರಾನ್ ನಿರ್ಮಿತ ಶಾಹೆದ್ ಡ್ರೋನ್‌ಗಳನ್ನು ಬಳಸುತ್ತಿದೆ. ಹೀಗಾಗಿ, ಈ ಡ್ರೋನ್‌ಗಳನ್ನು ಹೇಗೆ ಎದುರಿಸಬೇಕು ಎಂಬ ಬಗ್ಗೆ ಯುಕ್ರೇನ್ ಸೈನಿಕರಿಗೆ ಅಪಾರ ಅನುಭವವಿದೆ. ಇದೇ ಅನುಭವವನ್ನು ಬಳಸಿ ಮಧ್ಯಪ್ರಾಚ್ಯದ ಮಿತ್ರ ರಾಷ್ಟ್ರಗಳಿಗೆ ಯುಕ್ರೇನ್ ನೆರವು ನೀಡಿದೆ.

ಈ ಕಾರ್ಯಾಚರಣೆಯ ಹಿಂದೆ ದೊಡ್ಡ ರಾಜತಾಂತ್ರಿಕ ಒಪ್ಪಂದವಡಗಿದೆ. ಈ ನೆರವಿನ ಬದಲಾಗಿ ಯುಕ್ರೇನ್‌ಗೆ ಹಲವು ಲಾಭಗಳು ಸಿಗುತ್ತಿವೆ.

ತೈಲ ಪೂರೈಕೆ: ಇಂಧನ ಕೊರತೆ ಎದುರಿಸುತ್ತಿರುವ ಯುಕ್ರೇನ್‌ಗೆ ಮಧ್ಯಪ್ರಾಚ್ಯ ದೇಶಗಳು ತೈಲ ಮತ್ತು ಡೀಸೆಲ್ ಪೂರೈಸಲು ಒಪ್ಪಿಕೊಂಡಿವೆ.

ವಾಯು ರಕ್ಷಣಾ ವ್ಯವಸ್ಥೆ: ಯುಕ್ರೇನ್‌ನ ಇಂಧನ ಮೂಲಸೌಕರ್ಯಗಳನ್ನು ರಕ್ಷಿಸಲು ಪ್ರತಿಯಾಗಿ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಮತ್ತು ರಕ್ಷಣಾ ವ್ಯವಸ್ಥೆಗಳನ್ನು ಮಿತ್ರ ರಾಷ್ಟ್ರಗಳು ಒದಗಿಸುತ್ತಿವೆ.

ಹಣಕಾಸಿನ ನೆರವು: ಕೆಲವು ಪ್ರಕರಣಗಳಲ್ಲಿ ಯುಕ್ರೇನ್‌ಗೆ ದೊಡ್ಡ ಮೊತ್ತದ ಹಣಕಾಸಿನ ನೆರವು ಕೂಡ ಸಿಗುತ್ತಿದೆ ಎಂದು ಝೆಲೆನ್ಸ್ಕಿ ಬಹಿರಂಗಪಡಿಸಿದ್ದಾರೆ.

ಝೆಲೆನ್ಸ್ಕಿ ಅವರು ಈ ಕಾರ್ಯಾಚರಣೆ ನಡೆದ ದೇಶಗಳ ಹೆಸರನ್ನು ಬಹಿರಂಗಪಡಿಸಿಲ್ಲ. ಆದರೆ, ಕನಿಷ್ಠ ನಾಲ್ಕು ಮಧ್ಯಪ್ರಾಚ್ಯ ದೇಶಗಳಲ್ಲಿ ಯುಕ್ರೇನ್‌ನ ಸುಮಾರು 228 ತಜ್ಞರು ಈ ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದಾರೆ ಎಂಬುದು ತಿಳಿದುಬಂದಿದೆ. ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ದಾಳಿ ನಡೆಸಿದಾಗ, ಪ್ರತಿಯಾಗಿ ಇರಾನ್ ಉಡಾಯಿಸಿದ ಡ್ರೋನ್‌ಗಳನ್ನು ತಡೆಯಲು ಯುಕ್ರೇನ್ ಸೈನಿಕರು ನೆರವಾಗಿದ್ದಾರೆ.

ಈಗಾಗಲೇ ಪಾಕಿಸ್ತಾನದ ಇಸ್ಲಾಮಾಬಾದ್‌ನಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಕದನ ವಿರಾಮದ ಮಾತುಕತೆಗಳು ಶುರುವಾಗುತ್ತಿರುವಾಗಲೇ ಈ ವಿಷಯ ಹೊರಬಿದ್ದಿದೆ. ಇರಾನ್ ವಿರುದ್ಧ ಯುಕ್ರೇನ್ ಸೈನಿಕರು ನೇರವಾಗಿ ಕಣಕ್ಕಿಳಿದಿರುವುದು ಇರಾನ್ ಅನ್ನು ಕೆರಳಿಸುವ ಸಾಧ್ಯತೆಯಿದೆ. ರಷ್ಯಾ-ಉಕ್ರೇನ್ ಯುದ್ಧ ಮತ್ತು ಪಶ್ಚಿಮ ಏಷ್ಯಾದ ಯುದ್ಧ ಈಗ ಒಂದಕ್ಕೊಂದು ಬೆಸೆದುಕೊಂಡಿರುವುದು ಜಾಗತಿಕ ಮಟ್ಟದಲ್ಲಿ ಭದ್ರತಾ ಆತಂಕವನ್ನು ಹೆಚ್ಚಿಸಿದೆ,(ಏಜೆನ್ಸೀಸ್​).