ತೈಲ ಬರಿದಾದರೂ ಬದುಕಬಹುದು, ಆದರೆ ಇದು ಮುಗಿದರೆ? ಅರಬ್ ನಾಡನ್ನು ಬೆಚ್ಚಿಬೀಳಿಸುತ್ತಿದೆ ಈ ಹೊಸ ಭೀತಿ! Gulf Water Crisis

ಸೌದಿ ಅರೇಬಿಯಾ, ಯುಎಇ, ಕತಾರ್ ಮತ್ತು ಕುವೈತ್‌ನಂತಹ ರಾಷ್ಟ್ರಗಳು ನೈಸರ್ಗಿಕ ಸಿಹಿನೀರಿನ ಮೂಲಗಳನ್ನು ಹೊಂದಿಲ್ಲ. ಇವು ಕೇವಲ ಮರಳುಗಾಡಿನ ದೇಶಗಳಲ್ಲ, ಇವು ಉಪ್ಪುನೀರಿನ ಸಾಮ್ರಾಜ್ಯಗಳು. ಇಲ್ಲಿನ ಸುಮಾರು 6.2 ಕೋಟಿ ಜನಸಂಖ್ಯೆ ಬದುಕಿರುವುದು ಸಮುದ್ರದ ನೀರನ್ನು ಕುಡಿಯುವ ನೀರನ್ನಾಗಿ ಪರಿವರ್ತಿಸುವ ಬೃಹತ್ ಯಂತ್ರಾಗಾರಗಳಿಂದಾಗಿ ಬದುಕುಳಿದಿವೆ.

ಈ ದೇಶಗಳಲ್ಲಿ ಒಂದು ದಿನ ತೈಲ ಸರಬರಾಜು ನಿಂತರೆ ಆರ್ಥಿಕತೆಗೆ ಹೊಡೆತ ಬೀಳಬಹುದು, ಆದರೆ ಒಂದು ದಿನ ನೀರಿನ ಘಟಕಗಳು ನಿಂತರೆ ಅದು ನೇರ ಮಾನವೀಯ ದುರಂತಕ್ಕೆ ದಾರಿಯಾಗುತ್ತದೆ. ತೈಲ ಟ್ಯಾಂಕರ್‌ಗಳನ್ನು ಬೇರೆ ಮಾರ್ಗಕ್ಕೆ ತಿರುಗಿಸಬಹುದು, ಆದರೆ ಬಾಂಬ್ ದಾಳಿಗೆ ಒಳಗಾದ ಡಿಸಲಿನೇಷನ್ ಪ್ಲಾಂಟ್‌ಗಳನ್ನು ಒಂದೇ ದಿನದಲ್ಲಿ ಸರಿಪಡಿಸಲು ಸಾಧ್ಯವಿಲ್ಲ.

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್‌ನ ವಿದ್ಯುತ್ ಸ್ಥಾವರಗಳ ಮೇಲೆ ದಾಳಿ ನಡೆಸುವ ಎಚ್ಚರಿಕೆ ನೀಡಿದ ಬೆನ್ನಲ್ಲೇ, ಇರಾನ್ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಗೇರ್ ಖಾಲಿಬಾಫ್ ಪ್ರತಿಯೇಟು ನೀಡಿದ್ದಾರೆ. ನಮ್ಮ ಮೂಲಸೌಕರ್ಯಗಳ ಮೇಲೆ ದಾಳಿಯಾದರೆ, ಈ ಭಾಗದ ಎಲ್ಲಾ ಎನರ್ಜಿ ಮತ್ತು ಡಿಸಲಿನೇಷನ್ ಘಟಕಗಳನ್ನು ನಾವು ಕಾನೂನುಬದ್ಧ ಗುರಿಗಳೆಂದು ಪರಿಗಣಿಸಿ ಶಾಶ್ವತವಾಗಿ ನಾಶ ಮಾಡುತ್ತೇವೆ ಎಂದು ಗುಡುಗಿದ್ದಾರೆ.

ಇದು ಕೇವಲ ಮಾತಲ್ಲ ಎಂಬುದು ಈಗಾಗಲೇ ಸಾಬೀತಾಗಿದೆ. ಇತ್ತೀಚೆಗೆ ಇರಾನ್‌ನ ಕ್ಯೂಶಮ್ ದ್ವೀಪದ ನೀರಿನ ಘಟಕದ ಮೇಲೆ ದಾಳಿಯಾದ 24 ಗಂಟೆಗಳಲ್ಲೇ, ಬಹ್ರೇನ್‌ನ ಮುಹರ್ರಾಕ್ ಬಳಿಯ ಘಟಕದ ಮೇಲೆ ಇರಾನ್ ಡ್ರೋನ್ ದಾಳಿ ನಡೆಸಿ ಹಾನಿ ಮಾಡಿದೆ.

ಈ ರಾಷ್ಟ್ರಗಳು ನೀರಿನ ಮೇಲೆ ಎಷ್ಟು ಅವಲಂಬಿತವಾಗಿವೆ ಎಂಬುದು ಈ ಕೆಳಗಿನ ಮಾಹಿತಿಯಿಂದ ಸ್ಪಷ್ಟವಾಗುತ್ತದೆ:

ದೇಶ-  ಕುಡಿಯುವ ನೀರಿನಲ್ಲಿ ಡಿಸಲಿನೇಷನ್ ಪಾಲು

ಕುವೈತ್ - 90%

ಓಮನ್-  86%

ಸೌದಿ ಅರೇಬಿಯಾ- 70%

ಕತಾರ್- 99% (ಒಟ್ಟು ಬಳಕೆಯಲ್ಲಿ 61%)

ಬಹ್ರೇನ್- 90%

2008ರ ಅಮೆರಿಕದ ಗುಪ್ತಚರ ವರದಿಯೊಂದು ಆಘಾತಕಾರಿ ಅಂಶವನ್ನು ಬಹಿರಂಗಪಡಿಸಿತ್ತು. ಸೌದಿ ಅರೇಬಿಯಾದ ರಾಜಧಾನಿ ರಿಯಾದ್‌ಗೆ ನೀರುಣಿಸುವ ಜುಬೈಲ್ ಘಟಕ ಅಥವಾ ಅದರ ಪೈಪ್‌ಲೈನ್‌ಗೆ ಹಾನಿಯಾದರೆ, ಇಡೀ ನಗರವನ್ನು ಕೇವಲ ಒಂದು ವಾರದೊಳಗೆ ಖಾಲಿ ಮಾಡಬೇಕಾಗುತ್ತದೆ. ಇಲ್ಲಿ ನೀರಿನ ಪರ್ಯಾಯ ವ್ಯವಸ್ಥೆಯೇ ಇಲ್ಲದಿರುವುದು ಈ ರಾಷ್ಟ್ರಗಳ ಅತಿದೊಡ್ಡ ದೌರ್ಬಲ್ಯವಾಗಿದೆ.

1990-91ರ ಗಲ್ಫ್ ಯುದ್ಧದ ಸಮಯದಲ್ಲಿ ಇರಾಕಿ ಪಡೆಗಳು ಕುತಂತ್ರದಿಂದ ಸಮುದ್ರಕ್ಕೆ ಕೋಟ್ಯಂತರ ಬ್ಯಾರೆಲ್ ತೈಲವನ್ನು ಚೆಲ್ಲಿದ್ದವು. ಅದು ಇತಿಹಾಸದ ಅತಿದೊಡ್ಡ ತೈಲ ಸೋರಿಕೆಯಾಗಿತ್ತು ಮತ್ತು ನೀರಿನ ಘಟಕಗಳನ್ನು ಸ್ಥಗಿತಗೊಳಿಸಿತ್ತು. ಅಂದು ಶುರುವಾದ ಆತಂಕ ಇಂದು ಯುದ್ಧದ ಅಂಚಿನಲ್ಲಿರುವಾಗ ಮತ್ತಷ್ಟು ತೀವ್ರಗೊಂಡಿದೆ.

ಜಗತ್ತು ಹಾರ್ಮುಜ್ ಜಲಸಂಧಿಯಲ್ಲಿನ ತೈಲ ಟ್ಯಾಂಕರ್‌ಗಳನ್ನು ಎಣಿಸುತ್ತಿರುವಾಗ, ಇತ್ತ ಗಡಿಯಾರ ನೀರಿನ ಹನಿಗಳಿಗಾಗಿ ಟಿಕ್ ಟಿಕ್ ಎನ್ನುತ್ತಿದೆ. ಇರಾನ್ ಮತ್ತು ಅಮೆರಿಕ ನಡುವಿನ ಈ ಅಹಂನ ಹೋರಾಟದಲ್ಲಿ ಕೋಟ್ಯಂತರ ಜನರ ಕುಡಿಯುವ ನೀರು ಆಹುತಿಯಾಗುವ ಲಕ್ಷಣಗಳು ದಟ್ಟವಾಗಿವೆ. ಒಂದು ವೇಳೆ ಡಿಸಲಿನೇಷನ್ ಪ್ಲಾಂಟ್‌ಗಳು ಧ್ವಂಸಗೊಂಡರೆ, ಅದು ಕೇವಲ ಆರ್ಥಿಕ ಬಿಕ್ಕಟ್ಟಾಗದೆ, ಇತಿಹಾಸ ಕಂಡ ಅತಿದೊಡ್ಡ ಜಲ ವಲಸೆಗೆ ಕಾರಣವಾಗಲಿದೆ,(ಏಜೆನ್ಸೀಸ್).