ನಮ್ಮ ಶತ್ರು ನೀವಲ್ಲ, ಅಮೆರಿಕ! ಗಲ್ಫ್ ರಾಷ್ಟ್ರಗಳಿಗೆ ಇರಾನ್ ವಿದೇಶಾಂಗ ಸಚಿವ ನೀಡಿದ ಆ ಒಂದು ಶಾಕಿಂಗ್ ಸಂದೇಶವೇನು? Abbas Araghchi

ಈ ಬಗ್ಗೆ Xನಲ್ಲಿ ಪೋಸ್ಟ್​ ಮಾಡಿರುವ ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಗ್ಚಿ, ಸೌದಿ ಅರೇಬಿಯಾವನ್ನು ಸಹೋದರ ರಾಷ್ಟ್ರ ಎಂದು ಬಣ್ಣಿಸಿದ್ದಾರೆ. ಸೌದಿಯ ಪ್ರಿನ್ಸ್ ಸುಲ್ತಾನ್ ವಾಯುನೆಲೆಯ ಮೇಲೆ ಇರಾನ್ ನಡೆಸಿದ ಕ್ಷಿಪಣಿ ದಾಳಿಯಲ್ಲಿ ಅಮೆರಿಕದ ಅತ್ಯಾಧುನಿಕ E-3 ಸೆಂಟ್ರಿ ವಿಮಾನ ಧ್ವಂಸವಾಗಿರುವ ಚಿತ್ರವನ್ನು ಹಂಚಿಕೊಂಡಿರುವ ಅರಾಗ್ಚಿ, ನಮ್ಮ ಕಾರ್ಯಾಚರಣೆಗಳು ಕೇವಲ ಶತ್ರು ಅತಿಕ್ರಮಣಕಾರರ ವಿರುದ್ಧ ಮಾತ್ರವಾಗಿದ್ದು. ಅರಬ್ಬರಾಗಲಿ ಅಥವಾ ಇರಾನಿಯನ್ನರಾಗಲಿ, ಅಮೆರಿಕ ಯಾರಿಗೂ ಸುರಕ್ಷತೆ ನೀಡಲಾರದು. ಅಮೆರಿಕದ ಸೈನ್ಯವನ್ನು ನಿಮ್ಮ ನೆಲದಿಂದ ಹೊರಹಾಕಲು ಇದು ಸರಿಯಾದ ಸಮಯ ಎಂದು ಕರೆ ನೀಡಿದ್ದಾರೆ.

ಒಂದೆಡೆ ಇರಾನ್ ಸಮಾಧಾನದ ಮಾತುಗಳನ್ನಾಡುತ್ತಿದ್ದರೆ, ಮತ್ತೊಂದೆಡೆ ಅಮೆರಿಕದ ಸಾಂಪ್ರದಾಯಿಕ ಮಿತ್ರ ರಾಷ್ಟ್ರಗಳಾದ ಸೌದಿ ಅರೇಬಿಯಾ, ಯುಎಇ, ಕುವೈತ್ ಮತ್ತು ಬಹ್ರೇನ್ ಗುಪ್ತವಾಗಿ ವಿಭಿನ್ನ ತಂತ್ರ ಹೂಡಿವೆ ಎಂದು ವರದಿಯಾಗಿದೆ. ಅಸೋಸಿಯೇಟೆಡ್ ಪ್ರೆಸ್ ವರದಿಯ ಪ್ರಕಾರ, ಈ ದೇಶಗಳು ಅಧ್ಯಕ್ಷ ಟ್ರಂಪ್ ಅವರಿಗೆ ಇರಾನ್ ವಿರುದ್ಧದ ಯುದ್ಧವನ್ನು ಈಗಲೇ ನಿಲ್ಲಿಸಬೇಡಿ ಎಂದು ಖಾಸಗಿಯಾಗಿ ಮನವಿ ಮಾಡಿವೆ. ಇರಾನ್‌ನ ಇಸ್ಲಾಮಿಕ್ ಆಡಳಿತವನ್ನು ಸಂಪೂರ್ಣವಾಗಿ ದುರ್ಬಲಗೊಳಿಸಲು ಇದೊಂದು ಐತಿಹಾಸಿಕ ಅವಕಾಶ ಎಂದು ಈ ರಾಷ್ಟ್ರಗಳು ವಾದಿಸುತ್ತಿವೆ.

ಗಲ್ಫ್ ರಾಷ್ಟ್ರಗಳ ಪೈಕಿ ಯುಎಇ ಅತ್ಯಂತ ಆಕ್ರಮಣಕಾರಿ ನಿಲುವನ್ನು ತಳೆದಿದ್ದು, ಇರಾನ್ ಮೇಲೆ ಭೂಸೇನಾ ದಾಳಿ ನಡೆಸುವಂತೆ ಟ್ರಂಪ್ ಮೇಲೆ ಒತ್ತಡ ಹೇರುತ್ತಿದೆ ಎನ್ನಲಾಗಿದೆ. ಕುವೈತ್ ಮತ್ತು ಬಹ್ರೇನ್ ಕೂಡ ಇದೇ ಅಭಿಪ್ರಾಯ ಹೊಂದಿವೆ. ಸೌದಿ ಅರೇಬಿಯಾ ಒಂದು ಹೆಜ್ಜೆ ಮುಂದೆ ಹೋಗಿ, ಈಗಲೇ ಯುದ್ಧ ನಿಲ್ಲಿಸಿದರೆ ಅದು ಉತ್ತಮ ಒಪ್ಪಂದವಾಗಲಾರದು. ಇರಾನ್‌ನ ನಾಯಕತ್ವದಲ್ಲಿ ಬದಲಾವಣೆಯಾಗುವವರೆಗೆ ಅಥವಾ ಅವರ ನಡವಳಿಕೆಯಲ್ಲಿ ಸಂಪೂರ್ಣ ಬದಲಾವಣೆ ಬರುವವರೆಗೆ ಮಿಲಿಟರಿ ಕಾರ್ಯಾಚರಣೆ ಮುಂದುವರಿಯಲಿ ಎಂದು ಅಮೆರಿಕಕ್ಕೆ ತಿಳಿಸಿದೆ ಎನ್ನಲಾಗಿದೆ.

ಸೌದಿ ಮತ್ತು ಯುಎಇ ಯುದ್ಧದ ಪರವಾಗಿದ್ದರೆ, ಒಮಾನ್ ಮತ್ತು ಕತಾರ್ ದೇಶಗಳು ಮಾತ್ರ ಭಿನ್ನ ಹಾದಿ ಹಿಡಿದಿವೆ. ಐತಿಹಾಸಿಕವಾಗಿ ಇರಾನ್ ಮತ್ತು ಪಶ್ಚಿಮ ದೇಶಗಳ ನಡುವೆ ಸೇತುವೆಯಾಗಿ ಕೆಲಸ ಮಾಡುವ ಈ ಎರಡೂ ರಾಷ್ಟ್ರಗಳು, ರಾಜತಾಂತ್ರಿಕವಾಗಿ ಸಮಸ್ಯೆಯನ್ನು ಬಗೆಹರಿಸುವಂತೆ ಮನವಿ ಮಾಡುತ್ತಿವೆ. ಯುದ್ಧ ಮುಂದುವರಿದರೆ ಇಡೀ ಪ್ರದೇಶದ ಆರ್ಥಿಕತೆ ಹದಗೆಡಬಹುದು ಎಂಬ ಆತಂಕ ಇವರದ್ದಾಗಿದೆ.

ಇರಾನ್ ಈಗ ಅರಬ್ ಸೌಹಾರ್ದತೆಯ ಕಾರ್ಡ್ ಪ್ಲೇ ಮಾಡುತ್ತಿದ್ದರೂ, ಗಲ್ಫ್ ರಾಷ್ಟ್ರಗಳಿಗೆ ಟೆಹ್ರಾನ್ ಮೇಲಿರುವ ಅಪನಂಬಿಕೆ ಕಡಿಮೆಯಾದಂತೆ ಕಾಣುತ್ತಿಲ್ಲ. ಅಮೆರಿಕದ ನೆಲೆಗಳನ್ನು ಬಳಸಿಕೊಂಡು ಇರಾನ್ ಮೇಲೆ ದಾಳಿ ನಡೆಯುತ್ತಿರುವುದರಿಂದ, ಇರಾನ್ ಅನಿವಾರ್ಯವಾಗಿ ಗಲ್ಫ್ ರಾಷ್ಟ್ರಗಳ ಮಣ್ಣಿನ ಮೇಲೆ ಕ್ಷಿಪಣಿಗಳನ್ನು ಉಡಾಯಿಸುತ್ತಿದೆ. ಇದು ಅರಬ್ ದೇಶಗಳನ್ನು ಸಂಕಷ್ಟಕ್ಕೆ ದೂಡಿದೆ.

ಟ್ರಂಪ್ ಈಗ ಮಿತ್ರ ರಾಷ್ಟ್ರಗಳ ಒತ್ತಡಕ್ಕೆ ಮಣಿದು ಯುದ್ಧವನ್ನು ವಿಸ್ತರಿಸುತ್ತಾರಾ ಅಥವಾ ಇರಾನ್‌ನ ಅಮೆರಿಕವನ್ನು ಹೊರಹಾಕಿ ಎಂಬ ಆಹ್ವಾನಕ್ಕೆ ಗಲ್ಫ್ ರಾಷ್ಟ್ರಗಳು ಹೇಗೆ ಪ್ರತಿಕ್ರಿಯಿಸುತ್ತವೆ ಎಂಬುದು ಸದ್ಯದ ಕುತೂಹಲ. ಪಶ್ಚಿಮ ಏಷ್ಯಾದ ಈ ಚದುರಂಗದಾಟ ಜಾಗತಿಕ ರಾಜಕೀಯದ ದಿಕ್ಕನ್ನೇ ಬದಲಿಸುವ ಮುನ್ಸೂಚನೆ ನೀಡುತ್ತಿದೆ,(ಏಜೆನ್ಸೀಸ್).