ಉದುರಿದ ಮಾವಿನ ಹಣ್ಣನ್ನೂ ಮುಟ್ಟುವಂತಿಲ್ಲ ಇಲ್ಲಿ! ಅಕಸ್ಮಾತ್​ ಮುಟ್ಟಿದ್ರೆ 3.5 ಲಕ್ಷ ರೂ. ದಂಡ, ಜೈಲೇ ಗತಿ | Mango

Fallen Mango: ಬೇಸಿಗೆಗಾಲ ಬಂತೆಂದರೆ ಸಾಕು ಏನಪ್ಪ ಇದು ಬಿಸಿಲು, ತಾಳಲಾರೆವು ಈ ಬೇಗೆ ಎಂದು ಜನರು ಹಿಡಿಶಾಪ ಹಾಕುತ್ತಾರೆ. ಅದೇ ಮತ್ತೊಂದೆಡೆ, ಹಣ್ಣುಗಳ ರಾಜ ಮಾವು ಮಾರುಕಟ್ಟೆಗೆ ಲಗ್ಗೆಯಿಡುವುದನ್ನು ಕಂಡು ಬಾಯಲ್ಲಿ ನೀರೂರಿಸುತ್ತಾರೆ. ಇದು ಸಿಟಿ ಜನಗಳ ಪಾಡಾದರೆ. ಹಳ್ಳಿ ಕಡೆ ಮತ್ತು ಪಟ್ಟಣಗಳಲ್ಲಿನ ಹಲವು ಮನೆಗಳಲ್ಲಿ ಮಾವಿನ ಮರಗಳು ವಿವಿಧ ತಳಿಯ ಹಣ್ಣುಗಳನ್ನು ಬಿಟ್ಟಿರುತ್ತವೆ. ಇದನ್ನು ನೋಡಿದಾಗ ಎಂಥವರಿಗಾದರೂ ಕಿತ್ತುಕೊಳ್ಳುವ ಆಸೆ ಇದ್ದೇ ಇರುತ್ತದೆ. ಇನ್ನೂ ಕೆಲವರು ಹತ್ತಲು ಸಾಧ್ಯವಿಲ್ಲದಿದ್ದರೆ, ಕೆಳಗೆ ಬಿದ್ದಿರುವುದನ್ನೇ ಎತ್ತಿಕೊಂಡು ತೃಪ್ತಿಪಟ್ಟುಕೊಳ್ಳುತ್ತಾರೆ. ಇದಕ್ಕೆ ಯಾರೂ ಅಷ್ಟಾಗಿ ಸಿಡಿಮಿಡಿ ಅನ್ನೋದಿಲ್ಲ. ಆದ್ರೆ, ಇಲ್ಲೊಂದು ಊರಿನಲ್ಲಿ ಉದುರಿದ ಮಾವನ್ನು ಮುಟ್ಟಿದರೆ ಬರೋಬ್ಬರಿ 3.5 ಲಕ್ಷ ರೂ. ದಂಡ ಮತ್ತು ಜೈಲಿಗೆ ಕಳುಹಿಸುತ್ತಾರೆ ಎಂದರೆ ನಂಬ್ತೀರಾ? ಇಲ್ಲ ಅಂದರೂ ನಂಬಲೇಬೇಕು.

ಈ ರಾಜ್ಯದಲ್ಲಿ ಜನರು ಆಸೆಯಿಂದ ಮರವೇರಿ ಮಾವಿನ ಹಣ್ಣನ್ನು ಕೀಳುವುದು ಬಿಡಿ, ಉದುರಿದ ಹಣ್ಣನ್ನೂ ಸಹ ಮುಟ್ಟುವಂತಿಲ್ಲ. ಇಲ್ಲಿ ಇದೊಂದು ಅಪರಾಧದಂತೆ ನೋಡುವುದು ನಿಜಕ್ಕೂ ಬೇಸರದ ಸಂಗತಿ. ಅಕಸ್ಮಾತ್​ ಈ ಕಟ್ಟುನಿಟ್ಟಿನ ನಿಯಮವನ್ನು ನೀವೇನಾದರೂ ತಿಳಿಯದೆ ಹಣ್ಣನ್ನು ಮುಟ್ಟಿದ್ದೇ ಆದರೆ, ನಿಮಗೆ ಲಕ್ಷಗಳಲ್ಲಿ ದಂಡ ಹಾಕಲಾಗುತ್ತದೆ. ಇದನ್ನೂ ಮೀರಿ ಹೋದರೆ, ಜೈಲಿಗೆ ಕಳುಹಿಸಿದರೂ ಆಶ್ಚರ್ಯವಿಲ್ಲ. ಹಾಗಿದ್ದರೆ, ಯಾವ ಊರಿದು? ಏಕಿಂತ ಹುಚ್ಚು ರೂಲ್ಸ್? ಎಂಬ ನಿಮ್ಮ ಕುತೂಹಲಕಾರಿ ಪ್ರಶ್ನೆಗಳಿಗೆ ಇಲ್ಲಿದೆ ನೋಡಿ ಉತ್ತರ.

ಆ ದೇಶ ಇನ್ಯಾವುದೂ ಅಲ್ಲ, ಅದೇ ಸಿಂಗಾಪುರ. ವಿಶ್ವದ ಅತ್ಯಂತ ಶಿಸ್ತು ಮತ್ತು ಕಠಿಣ ಕಾನೂನುಗಳನ್ನು ಹೊಂದಿರುವ ರಾಷ್ಟ್ರ. ಅಲ್ಲಿನ ಸರ್ಕಾರವು ಜನರ ಸಣ್ಣ ವಿಷಯಗಳಿಗೂ ಹೆಚ್ಚಿನ ಪ್ರಾಮುಖ್ಯತೆಯನ್ನು ನೀಡುತ್ತದೆ. ಇಲ್ಲಿನ ಜನತೆ ಕೂಡ ಮುಜುಗರಪಡದೆ ಅಂತಹ ನಿಯಮಗಳನ್ನು ಗೌರವಿಸುವುದು ವಿಚಿತ್ರ. ಹಲವು ಶಿಸ್ತಿನ ನಿಯಮಗಳು ಜನರಿಗೆ ಎಚ್ಚರಿಸಿದ್ದೇ ಆದರೂ ಒಂದೇ ಒಂದು ಮಾವಿನ ಹಣ್ಣನ್ನು ಮುಟ್ಟಿದರೆ ಏಕಿಂತ ದಂಡ ಮತ್ತು ಶಿಕ್ಷೆಗಳು ಎಂಬ ಪ್ರಶ್ನೆ ಸಾಕಷ್ಟು ಜನರನ್ನು ಬೆಂಬಿಡದೆ ಕಾಡುತ್ತಿದೆ.

ಸಿಂಗಾಪುರ ಸರ್ಕಾರವು ನೈಸರ್ಗಿಕ ಸಂಪನ್ಮೂಲಗಳನ್ನು ಸಾರ್ವಜನಿಕ ಆಸ್ತಿ ಎಂದೇ ಪರಿಗಣಿಸಿದೆ. ಹೀಗಾಗಿಯೇ ಅವುಗಳನ್ನು ರಕ್ಷಿಸಲು ಕಠಿಣ ಕಾನೂನುಗಳನ್ನು ಜಾರಿಗೆ ತರುತ್ತಿದೆ. ಇದರ ಭಾಗವಾಗಿ, ಮರ ಮತ್ತು ಹಣ್ಣುಗಳನ್ನು ಸಹ ಸರ್ಕಾರಿ ಆಸ್ತಿ ಎಂದು ಪರಿಗಣಿಸಲಾಗಿದೆ. ಈ ದಂಡಗಳ ಹಿಂದಿನ ಉದ್ದೇಶ ಪ್ರಕೃತಿಯನ್ನು ರಕ್ಷಿಸುವುದು ಎಂಬುದು ಗಮನಾರ್ಹ. ಮರಗಳು ಮತ್ತು ಹಣ್ಣುಗಳು ಮಾತ್ರವಲ್ಲ, ಹೂವುಗಳು ಸಹ ಈ ಸಂಪತ್ತಿನ ಭಾಗವಾಗಿದೆ. ಅವುಗಳನ್ನು ಲೂಟಿ ಮಾಡುವುದು ಅಥವಾ ಹಾಳು ಮಾಡುವುದು ಒಂದು ಅಪರಾಧವೇ ಸರಿ.

ಪ್ರಕೃತಿಯ ರಕ್ಷಣೆಗಾಗಿ ಸಿಂಗಾಪುರದಲ್ಲಿ ರಚಿಸಲಾದ ಕಾನೂನು ಹೀಗಿದೆ. ಉದ್ಯಾನವನಗಳು ಮತ್ತು ಮರಗಳ ಕಾಯ್ದೆ. ಇದು ಆಗಸ್ಟ್ 1, 2005ರಂದು ಜಾರಿಗೆ ಬಂದಿತು. ಈ ಕಾನೂನು ಸಾರ್ವಜನಿಕ ಭೂಮಿ, ಉದ್ಯಾನವನಗಳು (ಪಾರ್ಕ್​), ರಸ್ತೆಬದಿಯ ಮರಗಳು ಮತ್ತು ಪ್ರಕೃತಿ ಮೀಸಲು ಪ್ರದೇಶಗಳಿಗೆ ಅನ್ವಯಿಸುತ್ತದೆ. ಸಾರ್ವಜನಿಕ ಸ್ಥಳಗಳಲ್ಲಿ ಬೆಳೆಯುವ ಮರಗಳಿಂದ ಹಣ್ಣುಗಳನ್ನು ಆರಿಸುವುದು ಅಥವಾ ಬಿದ್ದ ಹಣ್ಣುಗಳನ್ನು ಹೊತ್ತೊಯ್ಯುವುದು ಕೂಡ ಅಪರಾಧವಾಗಿದೆ.

ಅದಕ್ಕಾಗಿಯೇ, ಇಲ್ಲಿ ಬಿದ್ದಿರುವ ಮಾವಿನ ಹಣ್ಣನ್ನು ತೆಗೆದುಕೊಂಡು ಹೋಗುವ ಮಂದಿಗೆ 5,000 ಸಿಂಗಾಪುರ್ ಡಾಲರ್ (ಭಾರತೀಯ ಕರೆನ್ಸಿಯಲ್ಲಿ ಸುಮಾರು 3.5 ಲಕ್ಷ ರೂ.) ದಂಡವನ್ನು ವಿಧಿಸಲಾಗುತ್ತದೆ. ಈ ತಪ್ಪು ಪ್ರಕೃತಿ ಮೀಸಲು ಅಥವಾ ರಾಷ್ಟ್ರೀಯ ಉದ್ಯಾನವನದಲ್ಲಿ ನಡೆದರೆ, ದಂಡವು 50,000 ಸಿಂಗಾಪುರ್ ಡಾಲರ್‌ಗಳಿಗೆ (ಅಂದರೆ 12.5 ಲಕ್ಷ ರೂ.) ಏರಿಕೆಯಾಗುತ್ತದೆ. ಇದರೊಟ್ಟಿಗೆ, 6 ತಿಂಗಳ ಜೈಲು ಶಿಕ್ಷೆ ಕೂಡ ವಿಧಿಸುವ ಸಾಧ್ಯತೆಗಳಿವೆ. ಈ ಕುರಿತಾಗಿ ಪ್ರಿಯಾಂಕಾ ಸಿನ್ಹಾ ಎಂಬ ಭಾರತೀಯ ಮಹಿಳೆ ತಮ್ಮ ಇನ್​ಸ್ಟಾಗ್ರಾಮ್​ ಖಾತೆಯಲ್ಲಿ ಹಂಚಿಕೊಂಡ ಪೋಸ್ಟ್ ಸದ್ಯ ಭಾರೀ ವೈರಲ್ ಆಗಿದೆ,(ಏಜೆನ್ಸೀಸ್).