ಅಮೆರಿಕ ಇಲ್ಲದಿದ್ದರೆ ನಾಟೋ ಬರಿ ಕಾಗದದ ಹುಲಿ! ಮಿತ್ರ ರಾಷ್ಟ್ರಗಳನ್ನು ಹೇಡಿಗಳು ಎಂದು ಟ್ರಂಪ್ ಆಕ್ರೋಶ | NATO

ತಮ್ಮ 'ಟ್ರೂತ್ ಸೋಶಿಯಲ್' (Truth Social) ಪ್ಲಾಟ್‌ಫಾರ್ಮ್‌ನಲ್ಲಿ ಪೋಸ್ಟ್ ಮಾಡಿರುವ ಟ್ರಂಪ್, ಮಿತ್ರ ರಾಷ್ಟ್ರಗಳು ಏರುತ್ತಿರುವ ತೈಲ ಬೆಲೆಗಳ ಬಗ್ಗೆ ದೂರು ನೀಡುತ್ತವೆ, ಆದರೆ ಹೊರ್ಮುಜ್ ಜಲಸಂಧಿಯನ್ನು ಮುಕ್ತಗೊಳಿಸಲು ಸಹಾಯ ಮಾಡಲು ಸಿದ್ಧರಿಲ್ಲ ಎಂದು ಕಿಡಿಕಾರಿದ್ದಾರೆ. "ನಾವು ನಾಟೋ (NATO) ಸಂಸ್ಥೆಗೆ ಇಷ್ಟೊಂದು ಸಹಾಯ ಮಾಡಿದ್ದರೂ, ನಮಗೆ ಬೆಂಬಲ ಸಿಗುತ್ತಿಲ್ಲ. ಇರಾನ್ ಪರಮಾಣು ಅಸ್ತ್ರ ಪಡೆಯುವುದನ್ನು ತಡೆಯುವುದು ಮಿತ್ರ ರಾಷ್ಟ್ರಗಳ ಹಿತಾಸಕ್ತಿಯೂ ಹೌದು" ಎಂದು ಅವರು ಗುಡುಗಿದ್ದಾರೆ. ಅಮೆರಿಕದ ಬೆಂಬಲವಿಲ್ಲದಿದ್ದರೆ ನಾಟೋ ಕೇವಲ 'ಕಾಗದದ ಹುಲಿ' ಎಂದು ಅವರು ಪರೋಕ್ಷವಾಗಿ ಕುಟುಕಿದ್ದಾರೆ.

ಇರಾನ್ ಯುದ್ಧವು 21ನೇ ದಿನಕ್ಕೆ ಕಾಲಿಟ್ಟಿದ್ದು, ಹೊರ್ಮುಜ್ ಜಲಸಂಧಿ ಬಹುತೇಕ ಮುಚ್ಚಲ್ಪಟ್ಟಿದೆ. ಇದರಿಂದಾಗಿ ಜಾಗತಿಕ ಮಾರುಕಟ್ಟೆಯಲ್ಲಿ ಭಾರಿ ಏರುಪೇರಾಗಿದೆ. ಯುದ್ಧಕ್ಕೂ ಮುನ್ನ ಬ್ಯಾರಲ್‌ಗೆ 70 ಡಾಲರ್ ಇದ್ದ ತೈಲ ಬೆಲೆ ಈಗ 108 ಡಾಲರ್‌ಗೆ ಏರಿಕೆಯಾಗಿದೆ.ಕಂಪ್ಯೂಟರ್ ಚಿಪ್‌ಗಳಿಗೆ ಬಳಸುವ ಹೀಲಿಯಂ ಮತ್ತು ರಸಗೊಬ್ಬರಕ್ಕೆ ಬೇಕಾದ ಸಲ್ಫರ್ ಪೂರೈಕೆಯಲ್ಲಿ ಅಡಚಣೆಯಾಗಿದ್ದು, ಪೂರೈಕೆ ಸರಪಳಿ (Supply Chain) ಸಂಪೂರ್ಣ ಹದಗೆಟ್ಟಿದೆ. ಅಲ್ಲದೆ, ಹೊರ್ಮುಜ್ ಮೂಲಕ ಸಾಗುವ ಹೆಚ್ಚಿನ ತೈಲ ಏಷ್ಯಾಕ್ಕೆ ತಲುಪುವುದರಿಂದ, ಭಾರತ ಸೇರಿದಂತೆ ಏಷ್ಯಾದ ರಾಷ್ಟ್ರಗಳ ಮೇಲೆ ಇದರ ಪ್ರಭಾವ ಹೆಚ್ಚಾಗಿದೆ.

ಟ್ರಂಪ್ ಅವರ ವಾಗ್ದಾಳಿಯ ಬೆನ್ನಲ್ಲೇ, ಬ್ರಿಟನ್, ಫ್ರಾನ್ಸ್, ಜರ್ಮನಿ, ಇಟಲಿ, ನೆದರ್ಲ್ಯಾಂಡ್ಸ್ ಮತ್ತು ಜಪಾನ್ ದೇಶಗಳು ಜಂಟಿ ಹೇಳಿಕೆ ಬಿಡುಗಡೆ ಮಾಡಿವೆ. ಇರಾನ್ ನಡೆಸುತ್ತಿರುವ ಡ್ರೋನ್ ಮತ್ತು ಕ್ಷಿಪಣಿ ದಾಳಿಗಳನ್ನು ಖಂಡಿಸಿರುವ ಈ ರಾಷ್ಟ್ರಗಳು, ಸುರಕ್ಷಿತ ಹಡಗು ಸಂಚಾರಕ್ಕಾಗಿ "ಸೂಕ್ತ ಪ್ರಯತ್ನ"ಗಳನ್ನು ಮಾಡುವುದಾಗಿ ಒಪ್ಪಿಕೊಂಡಿವೆ. ಬ್ರಿಟನ್ ಪ್ರಧಾನಿ ಕೀರ್ ಸ್ಟಾರ್ಮರ್ ಅವರ ಕಚೇರಿಯಿಂದ ಹೊರಬಿದ್ದ ಈ ಹೇಳಿಕೆಯು ಇರಾನ್ ತನ್ನ ಬೆದರಿಕೆಗಳನ್ನು ಕೂಡಲೇ ನಿಲ್ಲಿಸಬೇಕೆಂದು ಆಗ್ರಹಿಸಿದೆ.

ಇರಾನ್‌ನ ಪ್ರತಿದಾಳಿಯಿಂದಾಗಿ ಇದುವರೆಗೆ ಸುಮಾರು 23 ವಾಣಿಜ್ಯ ಹಡಗುಗಳು ದಾಳಿಗೊಳಗಾಗಿದ್ದು, ಜಾಗತಿಕ ಆರ್ಥಿಕತೆ ಅಸ್ಥಿರತೆಯತ್ತ ಸಾಗುತ್ತಿದೆ,(ಏಜೆನ್ಸೀಸ್​).