ಇನ್ನೊಂದು ವರ್ಷ ಹೊರ್ಮುಜ್ ಬಂದ್ ಆಗಿಬಿಟ್ಟರೆ ನೆಲಕಚ್ಚಲಿದೆ ಬ್ರಿಟನ್ ಆರ್ಥಿಕತೆ? ಹೀಗಿದೆ ವರದಿ | Strait of Hormuz

ಬ್ರಿಟನ್: ಮಧ್ಯಪ್ರಾಚ್ಯದಲ್ಲಿ ಮುಸುಕಿದ್ದ ಯುದ್ಧದ ಕಾರ್ಮೋಡ ತಿಳಿಯಾಗುವ ಲಕ್ಷಣಗಳು ಕಾಣುತ್ತಿಲ್ಲ. ಇದಕ್ಕೆ ಇರಾನ್ ಮತ್ತು ಅಮೆರಿಕ ನಡುವೆ ಮತ್ತೆ ಭುಗಿಲೆದ್ದಿರುವ ಭೀಕರ ವೈಮಾನಿಕ ದಾಳಿಗಳೇ ಸಾಕ್ಷಿ. ಇರಾನಿನ ಬಂದರುಗಳ ಮೇಲೆ ಅಮೆರಿಕಾ ದಿಗ್ಬಂಧನ ಮುಂದುವರಿದಂತೆ ಹೊರ್ಮುಜ್​ ಜಲಮಾರ್ಗ (

Strait of Hormuz

) ಸಂಪೂರ್ಣವಾಗಿ ಸ್ಥಗಿತಗೊಳ್ಳುವ ಸಾಧ್ಯತೆ ಹೆಚ್ಚಾಗಿದೆ. ಇದರ ಬೆನ್ನಲ್ಲೇ ಬ್ರಿಟನ್​ಗೆ ಆರ್ಥಿಕ ಹೊಡೆತದ ಮುನ್ಸೂಚನೆ ಎದುರಾಗಿದೆ.

ಜಾಗತಿಕ ತೈಲ ಮತ್ತು ಅನಿಲ ಸಾಗಣೆಯಲ್ಲಿ ಪ್ರಮುಖ ಪಾತ್ರ ವಹಿಸುವ ಹೊರ್ಮುಜ್ ಮತ್ತೆ ಸುದ್ದಿಯಲ್ಲಿದೆ. ಈ ಜಲಸಂಧಿ ದೀರ್ಘಕಾಲ ಮುಚ್ಚಿದರೆ ಬ್ರಿಟನ್ ಆರ್ಥಿಕತೆಗೆ ಭಾರೀ ಹೊಡೆತ ಬೀಳಬಹುದು ಎಂದು ಜಾಗತಿಕ ಲೆಕ್ಕಪತ್ರ ಮತ್ತು ಸಲಹಾ ಸಂಸ್ಥೆ (EY) ಎಚ್ಚರಿಸಿದೆ. ಸಂಸ್ಥೆಯ ಇತ್ತೀಚಿನ ವರದಿಯ ಪ್ರಕಾರ, 2027ರವರೆಗೆ ಜಲಸಂಧಿಯಲ್ಲಿ ಅಡಚಣೆ ಮುಂದುವರಿದರೆ ಬ್ರಿಟನ್ ಆರ್ಥಿಕತೆ ಕುಸಿತಕ್ಕೆ ಜಾರುವ ಅಪಾಯವಿದ್ದು, ಹಣದುಬ್ಬರವೂ ಮತ್ತೆ ಏರಿಕೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಸಲಹಾ ಸಂಸ್ಥೆಯ ಅಂದಾಜಿನಂತೆ, ಸೆಪ್ಟೆಂಬರ್ ಅಂತ್ಯದೊಳಗೆ ಜಲಸಂಧಿಯಲ್ಲಿ ಹಡಗುಗಳ ಸಂಚಾರ ಮತ್ತೆ ಶುರುವಾದರೆ 2026ರಲ್ಲಿ ಬ್ರಿಟನ್ ಆರ್ಥಿಕತೆ ಶೇ.0.8 ಮತ್ತು 2027ರಲ್ಲಿ ಶೇ.1.2ರಷ್ಟು ಬೆಳವಣಿಗೆ ಸಾಧಿಸಬಹುದು. ಅದೇ, ಅಡಚಣೆ ಏನಾದರೂ 2027ರ ಆರಂಭ ಅಥವಾ ಮಧ್ಯಭಾಗದವರೆಗೂ ಮುಂದುವರಿದರೆ, 2026ರ ಬೆಳವಣಿಗೆ ಶೇ.0.5ಕ್ಕೆ ಇಳಿಯಲಿದ್ದು, 2027ರಲ್ಲಿ ಆರ್ಥಿಕತೆ ಶೇ.0.2ರಷ್ಟು ಕುಂಠಿತವಾಗುವ ಸಾಧ್ಯತೆಗಳಿವೆ ಎಂದು ವರದಿ ತಿಳಿಸಿದೆ.

ಹೊರ್ಮುಜ್ ಜಲಸಂಧಿ ಮುಚ್ಚಿದರೆ ಜಾಗತಿಕ ಮಾರುಕಟ್ಟೆಯಲ್ಲಿ ತೈಲ ಮತ್ತು ದ್ರವೀಕೃತ ನೈಸರ್ಗಿಕ ಅನಿಲ (LNG) ಪೂರೈಕೆಗೆ ಹೊಡೆತ ಬೀಳಲಿದೆ. ಇದರ ಪರಿಣಾಮ ಇಂಧನ ಬೆಲೆಗಳು ದಿಢೀರ್ ಏರಿಕೆಯಾಗಲಿದ್ದು, ಅದರ ನೇರ ಪರಿಣಾಮ ಗ್ರಾಹಕರು ಮತ್ತು ಉದ್ಯಮಗಳ ಮೇಲೆ ಬೀಳಲಿದೆ ಎಂದು ವರದಿ ಉಲ್ಲೇಖಿಸಿದೆ,(ಏಜೆನ್ಸೀಸ್).