ಇಸ್ರೇಲ್ ವಶವಾಗುವುದೇ ಗಾಜಾ..?

ಗಾಜಾ ಪಟ್ಟಿಯನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳುವುದು ಅಥವಾ ಅಲ್ಲಿ ತನ್ನ ಸೇನಾ ಹಿಡಿತ ಸಾಧಿಸುವುದು ಇಸ್ರೇಲ್​ಗೆ ಕೇವಲ ಭೌಗೋಳಿಕ ವಿಷಯವಲ್ಲ; ಅದು ಅದರ ಅಸ್ತಿತ್ವ, ಭದ್ರತೆ ಮತ್ತು ರಾಜಕೀಯದೊಂದಿಗೆ ಆಳವಾಗಿ ಬೆಸೆದುಕೊಂಡಿದೆ. 2007ರಿಂದ ಗಾಜಾವನ್ನು ಆಳುತ್ತಿರುವ ‘ಹಮಾಸ್’ ಸಂಘಟನೆಯನ್ನು ಇಸ್ರೇಲ್ ತನ್ನ ಅಸ್ತಿತ್ವಕ್ಕೆ ಇರುವ ದೊಡ್ಡ ಆಪತ್ತು ಎಂದು ಪರಿಗಣಿಸಿದೆ. ಇಸ್ರೇಲ್ ಮೇಲಿನ ನಿರಂತರ ರಾಕೆಟ್ ದಾಳಿಗಳು ಮತ್ತು ಆತ್ಮಹತ್ಯಾ ದಾಳಿಯಂತಹ ಘಟನೆಗಳು ಮರುಕಳಿಸದಂತೆ ತಡೆಯಲು ಹಮಾಸ್​ನ ಸಂಪೂರ್ಣ ನಿರ್ಮೂಲನೆ ಇಸ್ರೇಲ್​ಗೆ ಅತ್ಯಂತ ಮುಖ್ಯವಾಗಿದೆ. ಗಾಜಾದ ಗಡಿಯುದ್ದಕ್ಕೂ ಒಂದು ಸುರಕ್ಷಿತ ವಲಯವನ್ನು ನಿರ್ಮಿಸುವುದು ಇಸ್ರೇಲ್​ನ ಉದ್ದೇಶವಾಗಿದೆ. ಇದರ ಮೂಲಕ ಇಸ್ರೇಲ್​ನ ನಾಗರಿಕ ವಸಾಹತುಗಳ ಮೇಲೆ ನೇರ ದಾಳಿಗಳು ನಡೆಯದಂತೆ ತಡೆಯಬಹುದು ಎಂಬುದು ಅದರ ಲೆಕ್ಕಾಚಾರ. ಇಸ್ರೇಲ್ ರಕ್ಷಣಾ ಪಡೆಗಳು ಈಗಾಗಲೇ ಗಾಜಾದ ಉತ್ತರ ಮತ್ತು ಮಧ್ಯ ಭಾಗಗಳನ್ನು ದಾಟಿ, ದಕ್ಷಿಣದ ರಫಾ ಗಡಿಯವರೆಗೂ ತನ್ನ ಮಿಲಿಟರಿ ನಿಯಂತ್ರಣವನ್ನು ವಿಸ್ತರಿಸಿವೆ. ಹಮಾಸ್ ಮತ್ತು ಗಾಜಾದಲ್ಲಿರುವ ಇತರ ಸಶಸ್ತ್ರ ಗುಂಪುಗಳಿಗೆ ಇರಾನ್ ಆರ್ಥಿಕ ಮತ್ತು ಆಯುಧಗಳ ಬೆಂಬಲ ನೀಡುತ್ತಿದೆ. ಗಾಜಾವನ್ನು ನಿಯಂತ್ರಿಸುವುದರಿಂದ, ಇರಾನ್ ತನ್ನ ಗಡಿಯ ಬಳಿ ಪ್ರಭಾವ ಸಾಧಿಸುವುದನ್ನು ಇಸ್ರೇಲ್ ತಡೆಯಬಹುದು. ಅಲ್ಲದೆ, ಇಸ್ರೇಲ್​ನ ಪ್ರಸ್ತುತ ಸರ್ಕಾರಕ್ಕೆ ಮತ್ತು ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರಿಗೆ ಹಮಾಸ್ ವಿರುದ್ಧದ ಸಂಪೂರ್ಣ ಗೆಲುವು ಹಾಗೂ ಗಾಜಾದ ಮೇಲಿನ ಹಿಡಿತ ತಮ್ಮ ರಾಜಕೀಯ ಭವಿಷ್ಯವನ್ನು ಉಳಿಸಿಕೊಳ್ಳಲು ಅತ್ಯಗತ್ಯವಾಗಿದೆ.

ಗಾಜಾದ ಮೇಲೆ ಇಸ್ರೇಲ್ ನಡೆಸುತ್ತಿರುವ ನಿರಂತರ ವಾಯು ಮತ್ತು ಭೂಸೇನಾ ದಾಳಿಗಳಿಂದಾಗಿ ಹಮಾಸ್ ತತ್ತರಿಸಿದೆ. ಇಸ್ರೇಲ್​ನ ದೊಡ್ಡ ಯಶಸ್ಸೆಂದರೆ ಹಮಾಸ್​ನ ಪ್ರಮುಖ ರಾಜಕೀಯ ಮತ್ತು ಮಿಲಿಟರಿ ನಾಯಕರನ್ನು ಬೇಟೆಯಾಡಿರುವುದು. ಹಮಾಸ್​ನ ರಾಜಕೀಯ ಮುಖ್ಯಸ್ಥನಾಗಿದ್ದ ಇಸ್ಮಾಯಿಲ್ ಹನಿಯೇ ಮತ್ತು ಅಕ್ಟೋಬರ್ 7ರ ದಾಳಿಯ ಮಾಸ್ಟರ್‌ಮೈಂಡ್ ಯಹ್ಯಾ ಸಿನ್ವರ್ ಸೇರಿದಂತೆ ಹಲವು ಉನ್ನತ ಮಟ್ಟದ ಕಮಾಂಡರ್​ಗಳನ್ನು ಇಸ್ರೇಲ್ ಸರಣಿ ಕಾರ್ಯಾಚರಣೆಗಳ ಮೂಲಕ ಹತ್ಯೆ ಮಾಡಿದೆ. ಇದು ಹಮಾಸ್​ನ ಕಮಾಂಡ್ ವ್ಯವಸ್ಥೆಯನ್ನು ಸಂಪೂರ್ಣವಾಗಿ ದುರ್ಬಲಗೊಳಿಸಿದೆ.

ಸುರಂಗ ಜಾಲಗಳ ನಾಶ: ಗಾಜಾದ ಭೂಗರ್ಭದಲ್ಲಿ ಹಮಾಸ್ ನಿರ್ಮಿಸಿದ್ದ ನೂರಾರು ಕಿಲೋಮೀಟರ್ ಉದ್ದದ ಭೀಕರ ಸುರಂಗಗಳ ಜಾಲವನ್ನು (ಇದನ್ನು ‘ಗಾಜಾ ಮೆಟ್ರೋ’ ಎನ್ನಲಾಗುತ್ತಿತ್ತು) ಇಸ್ರೇಲ್ ಸೈನ್ಯ ಪತ್ತೆ ಹಚ್ಚಿ, ಬಾಂಬ್ ಹಾಕಿ ಧ್ವಂಸಗೊಳಿಸಿದೆ. ಇದರೊಂದಿಗೆ ಹಮಾಸ್​ನ ಅಡಗುದಾಣಗಳು ಮತ್ತು ಆಯುಧ ಸಂಗ್ರಹಾಗಾರಗಳು ನಾಶವಾಗಿವೆ.

ಮಿಲಿಟರಿ ಸಾಮರ್ಥ್ಯದ ಕುಸಿತ: ದಾಳಿಗೆ ಮುನ್ನ ಹಮಾಸ್ ಹೊಂದಿದ್ದ ಶೇಕಡ 80ಕ್ಕೂ ಹೆಚ್ಚು ರಾಕೆಟ್ ಲಾಂಚರ್​ಗಳು, ಡ್ರೋನ್​ಗಳು ಮತ್ತು ಆಯುಧ ತಯಾರಿಕಾ ಕಾರ್ಖಾನೆಗಳನ್ನು ಇಸ್ರೇಲ್ ಧ್ವಂಸಗೊಳಿಸಿದೆ. ಹಮಾಸ್​ನ ಸಾವಿರಾರು ಸಶಸ್ತ್ರ ಹೋರಾಟಗಾರರು ಈ ಯುದ್ಧದಲ್ಲಿ ಹತರಾಗಿದ್ದಾರೆ ಅಥವಾ ಸೆರೆಸಿಕ್ಕಿದ್ದಾರೆ.

ಹಣಕಾಸು ಮತ್ತು ಪೂರೈಕೆ ಮಾರ್ಗಗಳ ಬಂದ್: ಗಾಜಾ ಮತ್ತು ಈಜಿಪ್ತ್ ಗಡಿಯಲ್ಲಿದ್ದ ಸುರಂಗಗಳನ್ನು ಇಸ್ರೇಲ್ ವಶಪಡಿಸಿಕೊಂಡಿರುವುದರಿಂದ, ಹಮಾಸ್​ಗೆ ಹೊರದೇಶಗಳಿಂದ ಬರುತ್ತಿದ್ದ ಕಳ್ಳಸಾಗಣೆ ಆಯುಧಗಳು ಮತ್ತು ಆರ್ಥಿಕ ನೆರವು ಬಹುತೇಕ ಸ್ಥಗಿತಗೊಂಡಿದೆ.

ಗಾಜಾ ಪಟ್ಟಿಯು ಮೆಡಿಟರೇನಿಯನ್ ಸಮುದ್ರದ ಕರಾವಳಿಯಲ್ಲಿದ್ದು, ಇಸ್ರೇಲ್ ಮತ್ತು ಈಜಿಪ್ತ್ ದೇಶಗಳ ನಡುವೆ ಇದೆ. 1948ರಲ್ಲಿ ಇಸ್ರೇಲ್ ದೇಶದ ಸ್ಥಾಪನೆಯಾದಾಗಿನಿಂದಲೂ ಈ ಪ್ರದೇಶವು ಸಂಘರ್ಷದ ಕೇಂದ್ರಬಿಂದುವಾಗಿದೆ. ಮೊದಲು ಈಜಿಪ್ತ್ ನಿಯಂತ್ರಣದಲ್ಲಿದ್ದ ಇದನ್ನು 1967ರ ಆರು ದಿನಗಳ ಯುದ್ಧದಲ್ಲಿ ಇಸ್ರೇಲ್ ವಶಪಡಿಸಿಕೊಂಡಿತು. ನಂತರ 2005ರಲ್ಲಿ ಇಸ್ರೇಲ್ ತನ್ನ ಸೈನ್ಯವನ್ನು ಹಿಂಪಡೆಯಿತು. 2007ರಿಂದ ಗಾಜಾ ಪಟ್ಟಿಯನ್ನು ಹಮಾಸ್ ಎಂಬ ಇಸ್ಲಾಮಿಕ್ ಸಶಸ್ತ್ರ ಸಂಘಟನೆ ಸಂಪೂರ್ಣವಾಗಿ ನಿಯಂತ್ರಿಸುತ್ತಿದೆ. ಹಮಾಸ್ ಅನ್ನು ಇಸ್ರೇಲ್ ಮತ್ತು ಪಾಶ್ಚಿಮಾತ್ಯ ದೇಶಗಳು ಭಯೋತ್ಪಾದಕ ಸಂಘಟನೆ ಎಂದು ಘೋಷಿಸಿವೆ. ಗಾಜಾ ಪಟ್ಟಿಯಲ್ಲಿ 22 ಲಕ್ಷಕ್ಕೂ ಹೆಚ್ಚು ಪ್ಯಾಲೆಸ್ತೀನಿಯನ್ನರು ವಾಸಿಸುತ್ತಿದ್ದಾರೆ.

ನಿರಂತರ ರಾಕೆಟ್ ದಾಳಿಗಳು: ಹಮಾಸ್ ಗಾಜಾದ ಜನನಿಬಿಡ ಪ್ರದೇಶಗಳಿಂದ ಇಸ್ರೇಲ್​ನ ಟೆಲ್ ಅವಿವ್ ಮತ್ತು ಜೆರುಸಲೇಂನಂತಹ ಪ್ರಮುಖ ನಗರಗಳ ಮೇಲೆ ಹತ್ತಾರು ಸಾವಿರ ರಾಕೆಟ್​ಗಳನ್ನು ಉಡಾಯಿಸಿದೆ. ಇಸ್ರೇಲ್​ನ ಐರನ್ ಡೋಮ್ ರಕ್ಷಣಾ ವ್ಯವಸ್ಥೆಯು ಹೆಚ್ಚಿನ ರಾಕೆಟ್​ಗಳನ್ನು ತಡೆದರೂ, ಇವು ನಾಗರಿಕರ ಜೀವಕ್ಕೆ ನಿರಂತರ ಭೀತಿ ಹುಟ್ಟಿಸಿವೆ.

ಆತ್ಮಹತ್ಯಾ ಬಾಂಬ್ ದಾಳಿಗಳು: ಹಮಾಸ್ 1990 ಮತ್ತು 2000ರ ದಶಕದ ಆರಂಭದಲ್ಲಿ ಇಸ್ರೇಲ್​ನ ಸಾರ್ವಜನಿಕ ಬಸ್​ಗಳು, ರೆಸ್ಟೋರೆಂಟ್​ಗಳು ಮತ್ತು ಶಾಪಿಂಗ್ ಮಾಲ್​ಗಳಲ್ಲಿ ಸರಣಿ ಆತ್ಮಹತ್ಯಾ ಬಾಂಬ್ ದಾಳಿಗಳನ್ನು ನಡೆಸಿ ನೂರಾರು ಸಾಮಾನ್ಯ ನಾಗರಿಕರ ಆಕಸ್ಮಿಕ ಸಾವಿಗೆ ಕಾರಣವಾಗಿದೆ.

ಹಮಾಸ್​ನ ಹಿಮ್ಮೆಟ್ಟುವಿಕೆ: ಹಮಾಸ್​ನ ಸುರಂಗ ಜಾಲಗಳು ಮತ್ತು ಕಮಾಂಡ್ ಸೆಂಟರ್​ಗಳನ್ನು ಧ್ವಂಸಗೊಳಿಸಲು ಇಸ್ರೇಲ್​ಗೆ ಮತ್ತಷ್ಟು ಮುಕ್ತ ಅವಕಾಶ ಸಿಗುತ್ತದೆ.

ಯುದ್ಧಭೀತಿ: ಗಾಜಾದ ಮೇಲಿನ ಇಸ್ರೇಲ್ ಹಿಡಿತವು ಲೆಬನಾನ್​ನ ಹೆಜ್ಬೊಲ್ಲಾ ಸಂಘಟನೆ, ಯಮನ್​ನ ಹೂತಿ ಬಂಡುಕೋರರು ಮತ್ತು ನೇರವಾಗಿ ಇರಾನ್ ದೇಶವನ್ನು ಪ್ರಚೋದಿಸಬಹುದು. ಇದು ಇಡೀ ಮಧ್ಯಪ್ರಾಚ್ಯ ವಲಯವನ್ನು ಒಂದು ಮಹಾಯುದ್ಧದ ಕಡೆಗೆ ದೂಡಬಹುದು.