ಸೌಮ್ಯ ಸ್ವಭಾವದ ಸುಂದರ್ ಕೆರಳಿದ್ದೇಕೆ? ಡೇವಿಡ್ ಮಿಲ್ಲರ್ ಕ್ರೀಸ್ ದಾಟಿದ್ದೇ ದೊಡ್ಡ ತಪ್ಪಾಯ್ತಾ? ಮೈದಾನದಲ್ಲೇ ಹೈ-ಡ್ರಾಮಾ! Washington-Miller Controversy

ದಕ್ಷಿಣ ಆಫ್ರಿಕಾ ಬ್ಯಾಟಿಂಗ್ ಮಾಡುತ್ತಿದ್ದಾಗ, ಬೌಲರ್ ವಾಷಿಂಗ್ಟನ್ ಸುಂದರ್ ಚೆಂಡನ್ನು ಎಸೆಯುವ ಮುನ್ನವೇ ಡೇವಿಡ್ ಮಿಲ್ಲರ್ ಪದೇಪದೆ ಕ್ರೀಸ್‌ನಿಂದ ಬಹಳ ದೂರ ಮುಂದೆ ಹೋಗುತ್ತಿದ್ದರು. ಇದರಿಂದ ಅಸಮಾಧಾನಗೊಂಡ ಸುಂದರ್, ಈ ಬಗ್ಗೆ ಅಂಪೈರ್ ಕ್ರಿಸ್ ಗ್ಯಾಫೆನಿ ಅವರಿಗೆ ದೂರು ನೀಡಿದರು. ಇದು ಮಿಲ್ಲರ್ ಅವರ ಕೆರಳುವಿಕೆಗೆ ಕಾರಣವಾಯಿತು. ಸಾಮಾನ್ಯವಾಗಿ ಮೈದಾನದಲ್ಲಿ ಅತಿ ಶಾಂತವಾಗಿರುವ ಮಿಲ್ಲರ್, ಸುಂದರ್ ಅವರ ಬಳಿ ಬಂದು ಆಕ್ರೋಶದಿಂದ ಏನನ್ನೋ ಹೇಳಿದಾಗ ಪರಿಸ್ಥಿತಿ ಕೈಮೀರಿತು.

ಇಬ್ಬರ ನಡುವಿನ ಶಬ್ದ ಯುದ್ಧ ಹೆಚ್ಚಾಗುತ್ತಿದ್ದಂತೆ, ಮೈದಾನದಲ್ಲಿದ್ದ ಅಂಪೈರ್ ಮತ್ತು ಭಾರತದ ನಾಯಕ ಸೂರ್ಯಕುಮಾರ್ ಯಾದವ್ ತಕ್ಷಣವೇ ಮಧ್ಯ ಪ್ರವೇಶಿಸಿದರು. ಮಿಲ್ಲರ್ ಸಾಕಷ್ಟು ಕೋಪಗೊಂಡಿದ್ದು ಕಂಡುಬಂತು, ಆದರೆ ಸುಂದರ್ ಕೂಡ ಕಮ್ಮಿಯಿಲ್ಲ ಎಂಬಂತೆ ತಿರುಗೇಟು ನೀಡುತ್ತಿದ್ದರು. ಕೊನೆಗೆ ನಾಯಕ ಸೂರ್ಯಕುಮಾರ್ ಅವರು ಸುಂದರ್ ಅವರನ್ನು ದೂರ ಕರೆದೊಯ್ದು ಪರಿಸ್ಥಿತಿಯನ್ನು ತಿಳಿಗೊಳಿಸಿದರು.

ಮೈದಾನದ ಈ ಸಂಘರ್ಷದ ಹೊರತಾಗಿ, ಪಂದ್ಯದ ಫಲಿತಾಂಶ ಭಾರತದ ಪಾಲಿಗೆ ನಿರಾಸೆ ತಂದಿದೆ. ಡೇವಿಡ್ ಮಿಲ್ಲರ್ ಅವರ ಸ್ಫೋಟಕ 63 ರನ್ ಮತ್ತು ಮಾರ್ಕೊ ಜಾನ್ಸೆನ್ ಅವರ ಮಾರಕ ಬೌಲಿಂಗ್ (4/22) ನೆರವಿನಿಂದ ದಕ್ಷಿಣ ಆಫ್ರಿಕಾ 76 ರನ್‌ಗಳ ಬೃಹತ್ ಜಯ ಸಾಧಿಸಿದೆ. 188 ರನ್‌ಗಳ ಗುರಿ ಬೆನ್ನಟ್ಟಿದ ಭಾರತ ಕೇವಲ 111 ರನ್‌ಗಳಿಗೆ ಆಲೌಟ್ ಆಗುವ ಮೂಲಕ ಸೆಮಿಫೈನಲ್ ಹಾದಿಯನ್ನು ಕಠಿಣಗೊಳಿಸಿಕೊಂಡಿದೆ,(ಏಜೆನ್ಸೀಸ್​).