ಯಾರ ಬೇಡಿಕೆ ಅವಿವೇಕದ್ದು..? ಅಮೆರಿಕದ ಅಂತಿಮ ಆಫರ್ ತಿರಸ್ಕರಿಸಿದ ಇರಾನ್! ಇಸ್ಲಾಮಾಬಾದ್‌ನಲ್ಲಿ 21 ಗಂಟೆಗಳ ಕಾಲ ನಡೆದಿದ್ದೇನು? US-Iran Peace Talks

ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ನೇತೃತ್ವದ ನಿಯೋಗವು ಶನಿವಾರ ಇಡೀ ದಿನ ಇರಾನ್ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಿತು. ಆದರೂ, ಎರಡೂ ದೇಶಗಳ ನಡುವಿನ ಭಿನ್ನಾಭಿಪ್ರಾಯಗಳು ಶಮನವಾಗಲಿಲ್ಲ. ಇದು ಅಮೆರಿಕಕ್ಕಿಂತ ಇರಾನ್‌ಗೆ ದೊಡ್ಡ ಮಟ್ಟದ ಕೆಟ್ಟ ಸುದ್ದಿ ಎಂದು ವ್ಯಾನ್ಸ್ ಕಿಡಿಕಾರಿದ್ದಾರೆ.

ಅಣ್ವಸ್ತ್ರ ಹಠ: ಇರಾನ್ ಯಾವುದೇ ಕಾರಣಕ್ಕೂ ಅಣ್ವಸ್ತ್ರ ತಯಾರಿಸುವುದಿಲ್ಲ ಮತ್ತು ಅದಕ್ಕೆ ಪೂರಕವಾದ ತಾಂತ್ರಿಕತೆಯನ್ನು ಹೊಂದುವುದಿಲ್ಲ ಎಂಬ ದೃಢ ಬದ್ಧತೆಯನ್ನು ಅಮೆರಿಕ ಬಯಸಿತ್ತು. ಆದರೆ, ದೀರ್ಘಾವಧಿಯ ಬದ್ಧತೆ ನೀಡಲು ಇರಾನ್ ನಿರಾಕರಿಸಿದೆ.

ಅಮೆರಿಕದ ಕಠಿಣ ಷರತ್ತು: ನಮಗೆ ಕೇವಲ ಎರಡು ವರ್ಷಗಳ ಭರವಸೆ ಬೇಡ, ದೀರ್ಘಾವಧಿಯ ಬದ್ಧತೆ ಬೇಕು. ಇರಾನ್‌ನ ಮನಸ್ಥಿತಿಯಲ್ಲಿ ಅಂತಹ ಬದಲಾವಣೆ ನಮಗೆ ಕಾಣುತ್ತಿಲ್ಲ ಎಂದು ಜೆಡಿ ವ್ಯಾನ್ಸ್ ನೇರವಾಗಿ ಹೇಳಿದ್ದಾರೆ.

ಹೋರ್ಮುಜ್ ಜಲಸಂಧಿ ವಿವಾದ: ಇರಾನ್ ತನ್ನ ವಶದಲ್ಲಿರುವ ಹೋರ್ಮುಜ್ ಜಲಸಂಧಿಯನ್ನು ಮುಕ್ತವಾಗಿರಿಸುವ ಬಗ್ಗೆ ಯಾವುದೇ ಅಧಿಕೃತ ಒಪ್ಪಂದಕ್ಕೆ ಸಹಿ ಹಾಕಲು ಸಿದ್ಧವಿಲ್ಲದಿರುವುದು ಸಂಧಾನಕ್ಕೆ ದೊಡ್ಡ ಅಡ್ಡಿಯಾಗಿದೆ.

ಇನ್ನೊಂದೆಡೆ, ಅಮೆರಿಕದ ಅತಿಯಾದ ಮತ್ತು ಅವಿವೇಕದ ಬೇಡಿಕೆಗಳೇ ಮಾತುಕತೆ ವಿಫಲವಾಗಲು ಕಾರಣ ಎಂದು ಇರಾನ್‌ನ ಸರ್ಕಾರಿ ಸುದ್ದಿ ಸಂಸ್ಥೆ IRIB ವರದಿ ಮಾಡಿದೆ. ಇರಾನ್ ಜನರ ರಾಷ್ಟ್ರೀಯ ಹಿತಾಸಕ್ತಿಗಳನ್ನು ರಕ್ಷಿಸಲು ನಾವು ಪ್ರಯತ್ನಿಸಿದೆವು, ಆದರೆ ಅಮೆರಿಕವು ಸಂಧಾನಕ್ಕೆ ಪೂರಕವಲ್ಲದ ಷರತ್ತುಗಳನ್ನು ಹೇರಿದೆ ಎಂದು ಇರಾನ್ ದೂರಿದೆ.

ಕುತೂಹಲಕಾರಿ ವಿಷಯವೆಂದರೆ, ಈ ಮಾತುಕತೆಗಳಿಗಿಂತ ಮೊದಲೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮಗೆ ಯಾವುದೇ ಬ್ಯಾಕ್ ಅಪ್ ಪ್ಲಾನ್ ಇಲ್ಲ ಎಂದು ಘೋಷಿಸಿದ್ದರು. ಅವರ ಮಿಲಿಟರಿ ಸೋತಿದೆ, ಅವರ ಉತ್ಪಾದನಾ ಸಾಮರ್ಥ್ಯ ಕುಸಿದಿದೆ. ನಾವು ಅವರನ್ನು ತೀವ್ರವಾಗಿ ಹೊಡೆದಿದ್ದೇವೆ, ಹೀಗಾಗಿ ನಮಗೆ ಬೇರೆ ಪ್ಲಾನ್ ಅವಶ್ಯಕತೆಯಿಲ್ಲ ಎಂದು ಟ್ರಂಪ್ ವಿಶ್ವಾಸ ವ್ಯಕ್ತಪಡಿಸಿದ್ದರು. ಆದರೆ ಈಗ ಸಂಧಾನ ವಿಫಲವಾಗಿರುವುದು ಟ್ರಂಪ್ ಮುಂದಿನ ನಡೆಯ ಬಗ್ಗೆ ಕುತೂಹಲ ಮೂಡಿಸಿದೆ.

ಮಾತುಕತೆಗಳು ಮುರಿದುಬಿದ್ದಿರುವುದರಿಂದ ಹೋರ್ಮುಜ್ ಜಲಸಂಧಿಯ ಬಿಕ್ಕಟ್ಟು ಮುಂದುವರಿಯಲಿದೆ. ಇದರಿಂದಾಗಿ ವಿಶ್ವದ ಶೇ. 25ರಷ್ಟು ತೈಲ ಸಾಗಣೆಗೆ ತಡೆ ಉಂಟಾಗುವ ಆತಂಕವಿದೆ. ಇದು ಜಾಗತಿಕ ಪೂರೈಕೆ ಸರಪಳಿಯನ್ನು ಅಸ್ತವ್ಯಸ್ತಗೊಳಿಸಲಿದ್ದು, ಭಾರತ ಸೇರಿದಂತೆ ಹಲವು ದೇಶಗಳಲ್ಲಿ ಇಂಧನ ದರ ಏರಿಕೆಗೆ ಕಾರಣವಾಗಬಹುದು.

ಕಳೆದ ಫೆಬ್ರವರಿಯಿಂದ ನಡೆಯುತ್ತಿದ್ದ ಭೀಕರ ಯುದ್ಧಕ್ಕೆ ಎರಡು ವಾರಗಳ ಹಿಂದೆ ತಾತ್ಕಾಲಿಕ ವಿರಾಮ ನೀಡಲಾಗಿತ್ತು. ಆದರೆ, ಈಗಿನ ಬೆಳವಣಿಗೆಯಿಂದಾಗಿ ಈ ಕದನ ವಿರಾಮ ಯಾವುದೇ ಕ್ಷಣದಲ್ಲಿ ಕೊನೆಗೊಂಡು, ಪಶ್ಚಿಮ ಏಷ್ಯಾದಲ್ಲಿ ಮತ್ತೆ ಕ್ಷಿಪಣಿಗಳ ಆರ್ಭಟ ಶುರುವಾಗುವ ಸಾಧ್ಯತೆ ದಟ್ಟವಾಗಿದೆ,(ಏಜೆನ್ಸೀಸ್).