ಈ ದೇಶಗಳಲ್ಲಿ ನೀವು ಗಳಿಸಿದ ಪ್ರತಿ ರೂಪಾಯಿ ನಿಮ್ಮದೇ: ನೌಕರರ ಸಂಬಳಕ್ಕೆ ತೆರಿಗೆ ವಿಧಿಸದ ರಾಷ್ಟ್ರಗಳಿವು! Income tax

ನವದೆಹಲಿ: ಯಾವುದೇ ಒಂದು ದೇಶ ಅಭಿವೃದ್ಧಿಯಾಗಬೇಕಾದರೆ ತೆರಿಗೆ ( Income tax ) ಪಡೆಯುವುದು ತುಂಬಾ ಮುಖ್ಯ. ಆದರೆ, ಅದು ಜನರಿಗೆ ಹೊರೆಯಾಗದಂತಿರಬೇಕು. ಕೆಲವು ದೇಶಗಳಲ್ಲಿ ದಿನ ನಿತ್ಯದ ಅಗತ್ಯ ವಸ್ತುಗಳಿಂದ ಪ್ರತಿಯೊಂದು ವಸ್ತುವಿಗೂ ತೆರಿಗೆ ವಿಧಿಸುತ್ತಾರೆ. ಅಲ್ಲದೆ, ನೌಕರರ ಸಂಬಳಕ್ಕೂ ತೆರಿಗೆ ಎಂಬ ಕತ್ತರಿ ಹಾಕುತ್ತಾರೆ. ತೆರಿಗೆಯಿಂದಲೇ ಹೈರಾಣಾಗಿ ಜನರು ಸರ್ಕಾರಕ್ಕೆ ಹಿಡಿಶಾಪ ಹಾಕುತ್ತಾರೆ. ಆದರೆ, ಪ್ರಪಂಚದಲ್ಲಿ ಕೆಲವು ಅದ್ಭುತ ದೇಶಗಳಿವೆ. ಅಲ್ಲಿ, ವೈಯಕ್ತಿಕ ಆದಾಯ ತೆರಿಗೆ ಸಂಪೂರ್ಣ ಶೂನ್ಯ.

ಹೌದು, ಈ ದೇಶಗಳಲ್ಲಿ ನೀವು ಗಳಿಸಿದ ಪ್ರತಿ ರೂಪಾಯಿ ನಿಮ್ಮದೇ ಆಗಿರುತ್ತದೆ. ಇಲ್ಲಿ ಕೇವಲ ಆ ದೇಶದ ಪ್ರಜೆಗಳಿಗೆ ಮಾತ್ರವಲ್ಲ, ವಲಸಿಗರಿಗೂ ತೆರಿಗೆ ವಿಧಿಸುವುದಿಲ್ಲ. ಈ ತೆರಿಗೆ ಮುಕ್ತ ದೇಶಗಳು ಕೇವಲ ಹಣ ಉಳಿಸುವುದಕ್ಕೆ ಮಾತ್ರವಲ್ಲ, ಉನ್ನತ ಜೀವನ ಮಟ್ಟ, ಸುರಕ್ಷತೆ, ವಿಶ್ವದರ್ಜೆಯ ಸೌಲಭ್ಯಗಳು ಮತ್ತು ಸಾಕಷ್ಟು ಅವಕಾಶಗಳನ್ನು ನೀಡುತ್ತವೆ. ಹಾಗಾದರೆ, ನೌಕರರ ಸಂಬಳಕ್ಕೆ ತೆರಿಗೆ ವಿಧಿಸದ ದೇಶಗಳು ಯಾವುವು ಎಂಬುದನ್ನು ನಾವೀಗ ತಿಳಿದುಕೊಳ್ಳೋಣ.

ಯುಎಇ ವ್ಯಕ್ತಿಗಳ ಮೇಲೆ ಯಾವುದೇ ಆದಾಯ ತೆರಿಗೆ ವಿಧಿಸುವುದಿಲ್ಲ. ಆದಾಗ್ಯೂ, ಸರಕು ಮತ್ತು ಸೇವೆಗಳ ಖರೀದಿಯ ಮೇಲೆ ಶೇ. 5 ರಷ್ಟು ಮೌಲ್ಯವರ್ಧಿತ ತೆರಿಗೆಯನ್ನು ವಿಧಿಸುತ್ತದೆ. ಇದನ್ನು ಪೂರೈಕೆ ಸರಪಳಿಯ ಪ್ರತಿಯೊಂದು ಹಂತದಲ್ಲಿ ವಿಧಿಸಲಾಗುತ್ತದೆ ಮತ್ತು ಅಂತಿಮವಾಗಿ ಗ್ರಾಹಕರು ಇದನ್ನು ಭರಿಸುತ್ತಾರೆ. ಯುಎಇ ಆರೋಗ್ಯಕ್ಕೆ ಹಾನಿಕಾರಕವಾದ ನಿರ್ದಿಷ್ಟ ಸರಕುಗಳ ಮೇಲೆ ಅಬಕಾರಿ ತೆರಿಗೆಯನ್ನು ವಿಧಿಸುತ್ತದೆ. ಇದರೊಂದಿಗೆ ನಿಗಮಗಳು ಮತ್ತು ಇತರ ಘಟಕಗಳ ನಿವ್ವಳ ಆದಾಯ ಅಥವಾ ಲಾಭದ ಮೇಲೆ ಕಾರ್ಪೊರೇಟ್ ತೆರಿಗೆ ವಿಧಿಸುತ್ತದೆ. ತೈಲ ಕಂಪನಿಗಳು ಮತ್ತು ವಿದೇಶಿ ಬ್ಯಾಂಕ್‌ಗಳ ಶಾಖೆಗಳನ್ನು ಹೊರತುಪಡಿಸಿ, ವ್ಯಕ್ತಿಗಳು, ಹೂಡಿಕೆದಾರರು ಅಥವಾ ಕಾರ್ಪೊರೇಟ್‌ಗಳ ಮೇಲೆ ಯುಎಇ ಆದಾಯ ತೆರಿಗೆಯನ್ನು ವಿಧಿಸುವುದಿಲ್ಲ. ಆರಂಭದಿಂದಲೂ ಮುಕ್ತ ಆರ್ಥಿಕ ಮಾದರಿಯನ್ನು ಹೊಂದಿರುವ ದೇಶವಾಗಿ, ಇದು ವ್ಯಕ್ತಿಗಳು ಮತ್ತು ಹೂಡಿಕೆದಾರರು ತಮ್ಮ ಲಾಭವನ್ನು ಸಂಪೂರ್ಣವಾಗಿ ಸ್ವದೇಶಕ್ಕೆ ಹಿಂದಿರುಗಿಸಲು ಅನುವು ಮಾಡಿಕೊಡುತ್ತದೆ. ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಏಳು ಎಮಿರೇಟ್‌ಗಳನ್ನು ಒಳಗೊಂಡಿದೆ. ಅವುಗಳೆಂದರೆ, ಅಬುಧಾಬಿ, ದುಬೈ, ಶಾರ್ಜಾ, ಅಜ್ಮಾನ್, ಉಮ್ ಅಲ್ ಕುವೈನ್, ರಾಸ್ ಅಲ್ ಖೈಮಾ ಮತ್ತು ಫುಜೈರಾ. ಅಬುಧಾಬಿ ರಾಜಧಾನಿ ಮತ್ತು ಅತಿದೊಡ್ಡ ಎಮಿರೇಟ್ ಆಗಿದ್ದು, ದುಬೈ ಜಾಗತಿಕ ವ್ಯಾಪಾರ ಕೇಂದ್ರವಾಗಿ ಗುರುತಿಸಲ್ಪಟ್ಟಿದೆ.

ಸೌದಿ ಅರೇಬಿಯಾವು ಉದ್ಯೋಗದಿಂದ ಮಾತ್ರ ಪಡೆಯುವ ಗಳಿಕೆಯ ಮೇಲೆ ವೈಯಕ್ತಿಕ ಆದಾಯ ತೆರಿಗೆಯನ್ನು ವಿಧಿಸುವುದಿಲ್ಲ. ಉದ್ಯೋಗೇತರ ಆದಾಯವನ್ನು ಘಟಕ ಮಟ್ಟದಲ್ಲಿ ತೆರಿಗೆ ವಿಧಿಸಲಾಗುತ್ತದೆ. ಸೌದಿ ಅರೇಬಿಯಾ, ವಿದೇಶಿ ಹೂಡಿಕೆದಾರರು, ಉದ್ಯಮಿಗಳು ಮತ್ತು ರಿಯಲ್ ಎಸ್ಟೇಟ್ ಮಾಲೀಕರಿಗೆ ಪ್ರೀಮಿಯಂ ರೆಸಿಡೆನ್ಸಿ ವೀಸಾವನ್ನು ನೀಡುತ್ತದೆ.

ಕುವೈತ್​ನಲ್ಲಿ ಯಾವುದೇ ವ್ಯಕ್ತಿಗಳು ಗಳಿಸುವ ಆದಾಯವು ಪ್ರಸ್ತುತ ಆದಾಯ ತೆರಿಗೆ ವ್ಯಾಪ್ತಿಗೆ ಒಳಪಡುವುದಿಲ್ಲ. ಕುವೈತ್‌ನಲ್ಲಿ ನೌಕರರ ಸಂಬಳಕ್ಕೆ ತೆರಿಗೆ ವಿಧಿಸದಿರುವುದು ದೇಶದ ಆರ್ಥಿಕ ನೀತಿಯಿಂದಾಗಿ. ಇದು ತೈಲ ಸಂಪನ್ಮೂಲಗಳಿಂದ ಬಹುತೇಕ ಆದಾಯ ಪಡೆಯುವ ದೇಶವಾದ್ದರಿಂದ ಸರ್ಕಾರಿ ಆದಾಯಕ್ಕೆ ವೈಯಕ್ತಿಕ ಆದಾಯ ತೆರಿಗೆಯ ಅಗತ್ಯವಿಲ್ಲ, ಇದರಿಂದ ವಿದೇಶಿ ಕಾರ್ಮಿಕರನ್ನು ಆಕರ್ಷಿಸಿ ಆರ್ಥಿಕ ಬೆಳವಣಿಗೆಗೆ ಸಹಾಯ ಮಾಡುತ್ತದೆ ಮತ್ತು ನಾಗರಿಕರಿಗೆ ಸಾಮಾಜಿಕ ಒಡಂಬಡಿಕೆಯಡಿ ತೆರಿಗೆ-ರಹಿತ ಸೌಲಭ್ಯ ನೀಡುತ್ತದೆ.

ಒಮನ್ ಪ್ರಸ್ತುತ ಯಾವುದೇ ವೈಯಕ್ತಿಕ ಆದಾಯ ತೆರಿಗೆಯನ್ನು ವಿಧಿಸುವುದಿಲ್ಲ. ಆದಾಗ್ಯೂ, ಗಲ್ಫ್ ಸಹಕಾರ ಮಂಡಳಿ (ಜಿಸಿಸಿ) ಪ್ರದೇಶದಲ್ಲಿ, ಓಮನ್ ಶೀಘ್ರದಲ್ಲೇ ವೈಯಕ್ತಿಕ ಆದಾಯ ತೆರಿಗೆ ವಿಧಿಸುವ ಮೊದಲ ದೇಶವಾಗಲಿದೆ. ಒಮಾನ್‌ನ ವೈಯಕ್ತಿಕ ಆದಾಯ ತೆರಿಗೆ ಕಾನೂನು ಜನವರಿ 1, 2028 ರಿಂದ ಜಾರಿಗೆ ಬರಲಿದೆ. ವಾರ್ಷಿಕ ಒಟ್ಟು ಆದಾಯ OMR 42,000 (ಸರಿಸುಮಾರು USD 109,200) ಮೀರಿದ ವ್ಯಕ್ತಿಗಳ ಮೇಲೆ ಶೇ. 5ರಷ್ಟು ಆದಾಯ ತೆರಿಗೆಯನ್ನು ಕುವೈತ್​ ವಿಧಿಸಲಿದೆ. ಇದು ಜಾಗತಿಕವಾಗಿ ಅತೀ ಕಡಿಮೆ ದರವಾಗಿದೆ. ಓಮನ್ ತೆರಿಗೆ ಪ್ರಾಧಿಕಾರದ ಪ್ರಕಾರ, ಜನಸಂಖ್ಯೆಯ 99 ಪ್ರತಿಶತದಷ್ಟು ಜನರಿಗೆ ಈ ತೆರಿಗೆಯಿಂದ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ನಿರೀಕ್ಷಿಸಲಾಗಿದೆ.

ಕತಾರ್ ವಿಶ್ವದ ಅತ್ಯಂತ ಕಡಿಮೆ ತೆರಿಗೆ ವಿಧಿಸುವ ದೇಶಗಳಲ್ಲಿ ಒಂದಾಗಿದೆ. ಕತಾರ್‌ನಲ್ಲಿ ವೈಯಕ್ತಿಕ ಆದಾಯದ ಮೇಲೆ ಯಾವುದೇ ತೆರಿಗೆ ಇಲ್ಲ. ಇದು ಕೂಡ ನೈಸರ್ಗಿಕ ಅನಿಲ ಮತ್ತು ತೈಲ ಸಂಪನ್ಮೂಲಗಳಿಂದ ಬಹುತೇಕ ಆದಾಯ ಪಡೆಯುವ ದೇಶವಾದ್ದರಿಂದ ಸರ್ಕಾರಿ ಆದಾಯಕ್ಕೆ ವೈಯಕ್ತಿಕ ತೆರಿಗೆಯ ಅಗತ್ಯವಿಲ್ಲ. ಕಂಪನಿಯ ಒಟ್ಟು ಆದಾಯದ ಶೇ. 10 ರಷ್ಟು ವಾರ್ಷಿಕ ಸ್ಥಿರ ತೆರಿಗೆ ದರವನ್ನು ಪಡೆಯುತ್ತವೆ.