ಚೀನಾ-ಜಪಾನ್ ಮಧ್ಯೆ ಮಾತಿನ ಸಮರ! ಎರಡು ದೇಶಗಳ ನಡುವಿನ ಈ ವಿವಾದವೇನು? | China-Japan Tensions

ನವದೆಹಲಿ: ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಎರಡು ರಾಷ್ಟ್ರಗಳ ನಡುವೆ ಮತ್ತೊಂದು ಯುದ್ಧ ನಡೆಯಲಿದೆಯೇ? ಎಂಬ ಪ್ರಶ್ನೆ ಇದೀಗ ಮುನ್ನೆಲೆಗೆ ಬಂದಿದೆ. ರಷ್ಯಾ-ಯುಕ್ರೇನ್, ಇಸ್ರೇಲ್ ಮತ್ತು ಹಮಾಸ್ ನಡುವಿನ ಉದ್ವಿಗ್ನತೆ ಮತ್ತು ಅಮೆರಿಕದ ಸುಂಕ ಸಮರದಿಂದ ಈಗಾಗಲೇ ಅಸ್ತವ್ಯಸ್ತಗೊಂಡಿರುವ ಅಂತರರಾಷ್ಟ್ರೀಯ ವಾತಾವರಣದ ನಡುವೆ ಎರಡು ದೇಶಗಳ ನಾಯಕರ ನಡುವಿನ ಮಾತಿನ ಸಮರವು ಸದ್ಯ ಹೊಸ ಗೊಂದಲಕ್ಕೆ ಸಾಕ್ಷಿಯಾಗಿದೆ.

ಚೀನಾ ಮತ್ತು ಜಪಾನ್ ನಾಯಕರ ನಡುವಿನ ಮಾತಿನ ಸಮರ ದಿನದಿಂದ ದಿನಕ್ಕೆ ತೀವ್ರಗೊಳ್ಳುತ್ತಿದೆ. ತೈವಾನ್ ತನ್ನ ದೇಶದ ಅವಿಭಾಜ್ಯ ಅಂಗ ಎಂದು ಚೀನಾ ಯಾವಾಗಲೂ ಹೇಳಿಕೊಳ್ಳುತ್ತಿದೆ. ಆದಾಗ್ಯೂ, ಚೀನಾ ತೈವಾನ್ ವಿರುದ್ಧ ಮಿಲಿಟರಿ ಕ್ರಮಕ್ಕೆ ಸಿದ್ಧತೆ ನಡೆಸುತ್ತಿದೆ ಎಂದು ಸೂಚಿಸುವ ಇತ್ತೀಚಿನ ಬೆಳವಣಿಗೆಗಳು ತೀರ ಕಳವಳಕಾರಿಯಾಗಿದೆ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಜಪಾನ್ ಪ್ರತಿಕ್ರಿಯಿಸಿದ್ದಾರೆ.

ನವೆಂಬರ್ 7ರಂದು, ಜಪಾನ್‌ನ ಹೊಸ ಪ್ರಧಾನಿ ಸನೈ ತಕೈಚಿ ಸಂಸತ್ತಿನಲ್ಲಿ ಚೀನಾದ ನೌಕಾ ದಿಗ್ಬಂಧನ ಮತ್ತು ತೈವಾನ್ ವಿಷಯದಲ್ಲಿ ಇತರ ಆಕ್ರಮಣಕಾರಿ ಕ್ರಮಗಳು ಜಪಾನ್‌ನ ಮಿಲಿಟರಿ ಹಸ್ತಕ್ಷೇಪಕ್ಕೆ ಕಾರಣವಾಗಬಹುದು ಎಂದು ಹೇಳಿದ್ದರು. ಈ ಹೇಳಿಕೆಗಳನ್ನು ಚೀನಾ ಬಲವಾಗಿ ಖಂಡಿಸಿದೆ. ಟೋಕಿಯೋ ತನ್ನ ಮಿತಿಗಳನ್ನು ಮೀರಿದೆ ಎಂದು ಚೀನಾದ ವಿದೇಶಾಂಗ ಸಚಿವ ವಾಂಗ್ ಯಿ ಕಿಡಿಕಾರಿದ್ದಾರೆ. ಈ ಪರಿಣಾಮಕ್ಕೆ ಚೀನಾದ ವಿದೇಶಾಂಗ ಸಚಿವಾಲಯ ಹೇಳಿಕೆ ನೀಡಿದೆ.

ತೈವಾನ್ ವಿಷಯದಲ್ಲಿ ಮಿಲಿಟರಿ ಹಸ್ತಕ್ಷೇಪಕ್ಕೆ ಪ್ರಯತ್ನಿಸುವುದಾಗಿ ಮತ್ತು ಸಂಬಂಧವಿಲ್ಲದ ವಿಷಯಗಳ ಬಗ್ಗೆ ಮಾತನಾಡುವುದಾಗಿ ಜಪಾನಿನ ನಾಯಕರು ಬಹಿರಂಗವಾಗಿ ಸುಳ್ಳು ಸಂಕೇತಗಳನ್ನು ಕಳುಹಿಸುತ್ತಿರುವುದು ಸದ್ಯ ಆಘಾತಕಾರಿಯಾಗಿದೆ. ಈ ವಿಷಯದಲ್ಲಿ ಜಪಾನ್ ರೆಡ್​ ಲೈನ್​ ದಾಟಲು ಪ್ರಯತ್ನಿಸುತ್ತಿದೆ. ನಾವು ದೃಢವಾಗಿ ಪ್ರತಿಕ್ರಿಯಿಸುತ್ತೇವೆ ಎಂದು ಅವರು ಹೇಳಿದ್ದಾರೆ. ಮತ್ತೊಂದೆಡೆ, ಚೀನಾ ಈಗಾಗಲೇ ವಿಶ್ವಸಂಸ್ಥೆಯ ಮುಖ್ಯಸ್ಥ ಆಂಟೋನಿಯೊ ಗುಟೆರೆಸ್‌ಗೆ ಪತ್ರ ಬರೆದಿದೆ. ಜಪಾನ್ ಪ್ರಧಾನಿ ತಕೈಚಿ ಅಂತರರಾಷ್ಟ್ರೀಯ ಕಾನೂನು ಮತ್ತು ರಾಜತಾಂತ್ರಿಕ ಮಾನದಂಡಗಳನ್ನು ಗಂಭೀರವಾಗಿ ಉಲ್ಲಂಘಿಸಿದ್ದಾರೆ ಎಂದು ಚೀನಾ ಆರೋಪಿಸಿದೆ.

ಆ ದೇಶವು ಸಶಸ್ತ್ರ ಹಸ್ತಕ್ಷೇಪವನ್ನು ಆಶ್ರಯಿಸುವ ಯಾವುದೇ ಪ್ರಯತ್ನವು ಆಕ್ರಮಣಕಾರಿ ಕೃತ್ಯವಾಗಿದೆ. ಅದು ತನ್ನ ಸಾರ್ವಭೌಮತ್ವ ಮತ್ತು ಪ್ರಾದೇಶಿಕ ಸಮಗ್ರತೆಯನ್ನು ರಕ್ಷಿಸುತ್ತದೆ ಎಂದು ಚೀನಾ ಸ್ಪಷ್ಟಪಡಿಸಿದೆ. ಶನಿವಾರ ವಿಶ್ವಸಂಸ್ಥೆಗೆ ಚೀನಾ ಬರೆದ ಪತ್ರಕ್ಕೆ ಜಪಾನ್ ವಿದೇಶಾಂಗ ಸಚಿವಾಲಯ ಪ್ರತಿಕ್ರಿಯಿಸಿದೆ. ಚೀನಾದ ಹಕ್ಕುಗಳು ಸಂಪೂರ್ಣವಾಗಿ ಸ್ವೀಕಾರಾರ್ಹವಲ್ಲ ಮತ್ತು ಶಾಂತಿಗೆ ಜಪಾನ್‌ನ ಬದ್ಧತೆ ಬದಲಾಗಿಲ್ಲ ಎಂದು ತಿಳಿಸಿದೆ.

ಜಿ20 ನಾಯಕರ ಶೃಂಗಸಭೆಯಲ್ಲಿ ಭಾಗವಹಿಸಿದ ಬಳಿಕ ದಕ್ಷಿಣ ಆಫ್ರಿಕಾದಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಸನೈ ತಕೈಚಿ, ಜಪಾನ್ ಚೀನಾದೊಂದಿಗೆ ಮಾತುಕತೆಗೆ ಸಿದ್ಧವಾಗಿದೆ ಎಂದು ಹೇಳಿದರು. "ನಾವು ಇಲ್ಲಿಗೆ ಮುಗಿಸುತ್ತಿಲ್ಲ. ಆದರೆ, ಜಪಾನ್ ಏನು ಹೇಳಬೇಕೆಂದು ಸ್ಪಷ್ಟವಾಗಿ ಹೇಳುವುದು ನಮ್ಮ ಕರ್ತವ್ಯ" ಎಂದು ಹೇಳಿದರು. ಯುನೈಟೆಡ್ ಸ್ಟೇಟ್ಸ್ ನಂತರ ಚೀನಾ ಜಪಾನ್‌ನ ಅತಿದೊಡ್ಡ ರಫ್ತು ಮಾರುಕಟ್ಟೆಯಾಗಿದೆ. UN COMTRADE ದತ್ತಾಂಶದ ಪ್ರಕಾರ, ಚೀನಾ 2024ರಲ್ಲಿ ಸುಮಾರು 125 ಶತಕೋಟಿ ಡಾಲರ್ ಮೌಲ್ಯದ ಜಪಾನಿನ ಸರಕುಗಳನ್ನು ಖರೀದಿಸಿತು. ಮುಖ್ಯವಾಗಿ ಕೈಗಾರಿಕಾ ಉಪಕರಣಗಳು, ಅರೆವಾಹಕಗಳು ಮತ್ತು ಆಟೋಮೊಬೈಲ್ ವಲಯಗಳಲ್ಲಿ ಎಂಬುದು ಗಮನಾರ್ಹ,(ಏಜೆನ್ಸೀಸ್).