Area 51: ಭೂಮಿಯ ಮೇಲೆ ಮನುಷ್ಯರಿಗೆ ತಲುಪಲು ಸಾಧ್ಯವಾಗದ ಸ್ಥಳವಿದೆಯಾ? ಖಂಡಿತ ಇದೆ. ಅದುವೇ ಬೆರಳೆಣಿಕೆಯಷ್ಟು ಮಾತ್ರ. ಕೆಲವು ಕಾಲಿಡಲು ಆಗದೆ, ಕೇವಲ ಹಾರಾಟದ ಮೂಲಕ ನೋಡಬಹುದಾದರೆ, ಇನ್ನೂ ಕೆಲವು ಹೋಗಲು ಸಾಧ್ಯವಾದರೂ ಭಾರಿ ನಿಗೂಢ ಸ್ಥಳಗಳಾಗಿ ಮಾರ್ಪಟ್ಟಿರುವುದು ಇಂದಿಗೂ ಜನರಲ್ಲಿ ಆತಂಕ, ಗೊಂದಲಗಳನ್ನು ಸೃಷ್ಟಿಸಿವೆ. ಈ ಪೈಕಿ ಈ ಏರಿಯಾ 51 ಕೂಡ ಒಂದು.
ಮನುಷ್ಯರು ನೋಡಿದ ಮತ್ತು ತಿಳಿದಿರುವ ಅನೇಕ ಸ್ಥಳಗಳಿವೆ. ಆದರೆ, ಒಬ್ಬ ಸಾಮಾನ್ಯ ವ್ಯಕ್ತಿ ಎಂದಿಗೂ ಪ್ರವೇಶಿಸಲಾಗದ ಒಂದು ಸ್ಥಳ ಎಂದರೆ ಅದೇ ಈ ಏರಿಯಾ 51. ಅಮೆರಿಕದ ನೆವಾಡಾ ಮರುಭೂಮಿಯಲ್ಲಿ ಮರೆಯಾಗಿರುವ ಸ್ಥಳವು ಹಲವು ರಹಸ್ಯಗಳಿಂದ ಕೂಡಿದ ಪ್ರದೇಶ ಎನ್ನಲಾಗಿದೆ. ಈ ಸ್ಥಳವನ್ನು ಅನ್ಯಗ್ರಹ ಜೀವಿಗಳ ತಾಣ ಎಂದು ವ್ಯಾಪಕವಾಗಿ ಕರೆಯಲಾಗಿದ್ದು, ಯುನೈಟೆಡ್ ಸ್ಟೇಟ್ಸ್ ತನ್ನ ಶಸ್ತ್ರಾಸ್ತ್ರಗಳನ್ನು ಇಲ್ಲಿಯೇ ತಯಾರಿಕೆ ಮಾಡುತ್ತದೆ ಎಂದು ಕೂಡ ಹೇಳಲಾಗಿದೆ. ಅನ್ಯಗ್ರಹ ಜೀವಿಗಳು ಇರುವುದೇ ಇಲ್ಲಿ ಸಾಮಾನ್ಯ ಜನರಿಗೆ ಪ್ರವೇಶಿಸಲು ಸಾಧ್ಯವಾಗಿಲ್ಲ ಎಂಬ ವರದಿಗಳಿವೆ.
ಭದ್ರತೆ ಮತ್ತು ರಹಸ್ಯ ಪ್ರವೇಶ
ಏರಿಯಾ 51 ಪ್ರಸಿದ್ಧ ಯುಸ್ ಏರ್ ಫೋರ್ಸ್ ಬೇಸ್ ಆಗಿದೆ. ಅನ್ಯಲೋಕದ ಸ್ವರ್ಗವು ನೆವಾಡಾ ಮರುಭೂಮಿಯಲ್ಲಿರುವ ಒಣ ಸರೋವರವಾದ ಗ್ರೂಮ್ ಲೇಕ್‌ನಲ್ಲಿದೆ. ಏರಿಯಾ 51 ಲಾಸ್ ವೇಗಾಸ್‌ನ ಉತ್ತರಕ್ಕೆ 85 ಮೈಲಿಗಳು (135 ಕಿ.ಮೀ.) ಇದೆ. ಏರಿಯಾ 51 ರೊಳಗೆ ಏನಾಗುತ್ತದೆ ಎಂಬುದು ಅತ್ಯಂತ ರಹಸ್ಯವಾಗಿದೆ. ಸುತ್ತಲೂ ಎಚ್ಚರಿಕೆಯ ಫಲಕಗಳಿವೆ ಮತ್ತು ಕಾವಲುಗಾರರು ದಿನದ 24 ಗಂಟೆಗಳ ಕಾಲ ಅದನ್ನು ಆಯುಧಗಳೊಂದಿಗೆ ಕಾಯುತ್ತಾರೆ ಎನ್ನಲಾಗಿದೆ. ನೆವಾಡಾ ಮೂಲಕ ಹಾದು ಹೋಗುವ ರಾಜ್ಯ ಹೆದ್ದಾರಿ 375ರಿಂದ ಕಚ್ಚಾ ರಸ್ತೆ ಇದೆ. ಈ ರಸ್ತೆಯ ಕೊನೆಯಲ್ಲಿ ಏರಿಯಾ 51ಕ್ಕೆ ಪ್ರವೇಶದ್ವಾರವಿದೆ. ಇದನ್ನು ಸಾಮಾನ್ಯ ಪ್ರಯಾಣಿಕರು ತಿರುಗಿಯೂ ಸಹ ನೋಡುವುದಿಲ್ಲ ಎಂಬುದು ಆಶ್ಚರ್ಯಕರ.
ಶೀತಲ ಸಮರದ ಸಮಯದಲ್ಲಿ ಹುಟ್ಟಿದ ರಹಸ್ಯ ಪ್ರಯೋಗಗಳು
ಏರಿಯಾ 51 ಅನ್ನು ಯುನೈಟೆಡ್ ಸ್ಟೇಟ್ಸ್ ಮತ್ತು ಸೋವಿಯತ್ ಒಕ್ಕೂಟದ ನಡುವಿನ ಶೀತಲ ಸಮರದ ಸಮಯದಲ್ಲಿ U-2 ಮತ್ತು SR-71 ಬ್ಲ್ಯಾಕ್‌ಬರ್ಡ್ ವಿಮಾನಗಳನ್ನು ಒಳಗೊಂಡಂತೆ ವಿಮಾನಗಳ ಪರೀಕ್ಷಾ ಮತ್ತು ಅಭಿವೃದ್ಧಿ ಕೇಂದ್ರವಾಗಿ ರಚಿಸಲಾಯಿತು. ಏರಿಯಾ 51 1955ರಲ್ಲಿ ಕಾರ್ಯನಿರ್ವಹಿಸಲು ಪ್ರಾರಂಭಿಸಿದರೂ, ಆಗಸ್ಟ್ 2013 ರವರೆಗೆ ಸಿಐಎ (ಸೆಂಟ್ರಲ್ ಇಂಟೆಲಿಜೆನ್ಸ್ ಏಜೆನ್ಸಿ) ಯಿಂದ ಏರಿಯಾ 51 ಅನ್ನು ಅಧಿಕೃತವಾಗಿ ಗುರುತಿಸಲಾಗಿಲ್ಲ. ಸಿಐಎ ಬಹಿರಂಗಪಡಿಸಿದ ನಾಲ್ಕು ತಿಂಗಳ ನಂತರ, ಅಧ್ಯಕ್ಷ ಒಬಾಮಾ ಏರಿಯಾ 51 ಅನ್ನು ಸಾರ್ವಜನಿಕವಾಗಿ ಉಲ್ಲೇಖಿಸಿದ ಮೊದಲ ಯುಎಸ್ ಅಧ್ಯಕ್ಷರಾದರು. ಈಗಲೂ ಈ ಸ್ಥಳವನ್ನು ಅಧಿಕೃತವಾಗಿ ನೆವಾಡಾ ಟೆಸ್ಟ್ ಮತ್ತು ಟ್ರೇನಿಂಗ್ ಎಂದು ಕರೆಯಲಾಗುತ್ತದೆ.
1949ರಲ್ಲಿ ಅಮೆರಿಕಾದ ಮೊದಲ ಚಂದ್ರನ ಲ್ಯಾಂಡಿಂಗ್ ನಂತರ ಚಿತ್ರಗಳನ್ನು ಇಲ್ಲಿಂದ ತೆಗೆಯಲಾಗಿದೆ ಎಂದೇ ನಂಬಲಾಗಿದೆ. ಏರಿಯಾ 51ರ ಬಗ್ಗೆ ಅಧಿಕೃತ ಮಾಹಿತಿಯು ವಿರಳವಾಗಿದ್ದರೂ, ಯುಎಸ್ ಮಿಲಿಟರಿಯು ಅತ್ಯಾಧುನಿಕ ವಿಮಾನಗಳನ್ನು ಅಭಿವೃದ್ಧಿಪಡಿಸಲು ಏರಿಯಾ 51 ಅನ್ನು ಬಳಸುವುದನ್ನು ಮುಂದುವರೆಸಿದೆ ಎಂದು ವಿವರಿಸಲಾಗಿದೆ. ಸುಮಾರು 1,500 ಜನರು ಅಲ್ಲಿ ಕೆಲಸ ಮಾಡುತ್ತಾರೆ. ವಿಶೇಷವಾಗಿ ಆಯ್ಕೆಯಾದವರು ಮಾತ್ರ ಏರಿಯಾ 51ರಲ್ಲಿ ಕೆಲಸ ಮಾಡುತ್ತಾರೆ. ಲಾಸ್ ವೇಗಾಸ್‌ನಿಂದ ವಿಶೇಷವಾಗಿ ತಯಾರಾದ ಹೆಲಿಕಾಪ್ಟರ್‌ಗಳಲ್ಲಿ ಅಧಿಕಾರಿಗಳು ಇಲ್ಲಿಗೆ ಆಗಮಿಸುತ್ತಾರೆ. ಏರಿಯಾ 51ರ ಪ್ರದೇಶದಲ್ಲಿ ಇನ್ಯಾವುದೇ ವಿಮಾನ ಹಾರುವುದಿಲ್ಲ ಎಂದೂ ಹೇಳಲಾಗಿದೆ.
