ಇರಾನ್​ ಬಲಶಾಲಿ ಹೋರಾಟದ ಗುಟ್ಟೇನು..?

ಇರಾನ್ ವಿರುದ್ಧದ ಯುದ್ಧದಲ್ಲಿ ಅಮೆರಿಕದ ನಿರೀಕ್ಷೆ ತಲೆಕೆಳಕಾಗಿದ್ದು, ಯುದ್ಧ ನಿಲ್ಲಿಸಲು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬಳಿ ಸೂಕ್ತ ಯೋಜನೆಗಳೂ ಇಲ್ಲ ಎಂದು ಅಮೆರಿಕ ಮಾಧ್ಯಮಗಳೇ ವರದಿ ಮಾಡಿವೆ. 1989ರಿಂದ ಇರಾನ್​ನ ನೇತೃತ್ವ ವಹಿಸಿದ್ದ ಸವೋಚ್ಚ ನಾಯಕ ಅಯಾತೊಲ್ಲಾ ಅಲಿ ಖಮೇನಿ ಅವರನ್ನು ಯುದ್ಧ ಆರಂಭವಾದ ದಿನ ಫೆಬ್ರವರಿ 28ರಂದೇ ಅಮೆರಿಕ ಹೊಡೆದುರುಳಿಸಿತು. ಖಮೇನಿ ಹತರಾದ ಬಳಿಕ ಇನ್ನೇನು ಯುದ್ಧ ಗೆದ್ದಂತೆಯೇ ಎಂದು ಟ್ರಂಪ್ ಸಂಭ್ರಮಿಸಿದರು. ಆದರೆ ಅಯಾತೊಲ್ಲಾ ಅಲಿ ಖಮೇನಿ ಹತ್ಯೆಯ ನಂತರವೂ ಇರಾನ್ ಅಮೆರಿಕ ಮತ್ತು ಇಸ್ರೇಲ್ ವಿರುದ್ಧ ಬಲಶಾಲಿಯಾಗಿ ಹೋರಾಡುತ್ತಿರುವುದು ಜಾಗತಿಕ ರಾಜಕಾರಣದಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಇರಾನ್​ನಿಂದ ಈ ಪರಿಯ ಪ್ರತಿಕ್ರಿಯೆ ನಿರೀಕ್ಷೆ ಮಾಡದ ಅಮೆರಿಕ ಅನಿವಾರ್ಯವಾಗಿ ಯುದ್ಧ ಮುಂದುವರಿಸಿದೆ. ಖಮೇನಿ ಹತ್ಯೆಗೆ ಪ್ರತೀಕಾರ ಪಡೆದುಕೊಳ್ಳಬೇಕು ಎಂಬ ಹಠದಲ್ಲಿ ಇರಾನ್​ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕೋರ್(ಐಆರ್​ಜಿಸಿ) ನ ಪ್ರತಿ ಘಟಕ ಮತ್ತು ಅದರ ಮುಖ್ಯಸ್ಥರು ಭಾರಿ ಚಾಣಾಕ್ಷತೆ ಮತ್ತು ಯೋಜನಾಬದ್ಧವಾಗಿ ಅಮೆರಿಕದ ವಿರುದ್ಧ ತಿರುಗಿಬಿದ್ದಿದ್ದಾರೆ. ಹಾಗಾಗಿಯೇ, ಯುದ್ಧ ಆರಂಭವಾಗಿ ಎರಡು ವಾರಗಳು ಕಳೆದರೂ ಇರಾನ್ ಶಕ್ತಿಯುತವಾಗಿಯೇ ಹೋರಾಡುತ್ತಿದೆ.

ಪ್ರಸ್ತುತ ಯುದ್ಧವನ್ನು ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕೋರ್ ಮುನ್ನಡೆಸುತ್ತಿದೆ. ಮುಖ್ಯವಾಗಿ, ಇರಾನ್​ನ ಮಿಲಿಟರಿ ವ್ಯವಸ್ಥೆಯನ್ನು ಅಲಿ ಖಮೇನಿ ಅನುಪಸ್ಥಿತಿಯಲ್ಲೂ ಕಾರ್ಯನಿರ್ವಹಿಸುವಂತೆ ವಿನ್ಯಾಸಗೊಳಿಸಲಾಗಿದೆ. 2025ರ ಜೂನ್​ನಲ್ಲಿ ಸಂಭವಿಸಿದ ಯುದ್ಧದ ನಂತರ ಖಮೇನಿ ‘ರಹಸ್ಯ ಯುದ್ಧ ತಂತ್ರಗಾರಿಕೆ’ ಸಿದ್ಧಪಡಿಸಿದ್ದರು. ತಾವು ಹತರಾದರೂ ಅಮೆರಿಕ ಮತ್ತು ಇಸ್ರೇಲ್ ಮೇಲೆ ಹೇಗೆ ದಾಳಿ ಮಾಡಬೇಕೆಂದು ಅವರು ಮೊದಲೇ ಸೂಚನೆ ನೀಡಿದ್ದರು. ಇರಾನ್ ಈಗ ‘ಪ್ರತೀಕಾರದ ಕೆಂಪು ಬಾವುಟ’ ಹಾರಿಸಿದ್ದು, ಖಮೇನಿ ಹತ್ಯೆಗೆ ಸೇಡು ತೀರಿಸಿಕೊಳ್ಳಲು ಸನ್ನದ್ಧವಾಗಿದೆ.

ಇರಾನ್ ಸರ್ಕಾರವನ್ನು ಉರುಳಿಸುವ ಅಮೆರಿಕ-ಇಸ್ರೇಲ್ ಪ್ರಯತ್ನವೂ ಸಫಲವಾಗಿಲ್ಲ. ‘ಯುದ್ಧ ಇನ್ನೂ ಕೆಲವು ವಾರಗಳ ಕಾಲ ಮುಂದುವರಿದರೂ, ಸಮರ ಮುಂದುವರಿಸುತ್ತೇವೆ. ಅಮೆರಿಕದ ಜತೆ ಮಾತುಕತೆ ನಡೆಸುವ ಪ್ರಶ್ನೆಯೇ ಇಲ್ಲ’ ಎಂದು ಇರಾನ್ ಸ್ಪಷ್ಟಪಡಿಸಿದೆ. ಕಳೆದ 14 ದಿನಗಳಲ್ಲಿ ಇರಾನ್ ಯುದ್ಧದ ಪ್ರತಿ ವಿಭಾಗದಲ್ಲೂ ಅಮೆರಿಕಕ್ಕೆ ಬಲವಾದ ತಿರುಗೇಟು ನೀಡಿದೆ. ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ಮಿತ್ರರಾಷ್ಟ್ರಗಳಲ್ಲಿ ನಿರ್ವಣವಾದ ಅಮೆರಿಕ ಸೇನಾನೆಲೆಗಳನ್ನು ಹೊಡೆದುರುಳಿಸಿದೆ. 1990ರ ದಶಕದಲ್ಲಿ ಇರಾನ್ ಮತ್ತು ಇರಾಕ್ ನಡುವೆ 10 ವರ್ಷಗಳ ಕಾಲ ಯುದ್ಧ ನಡೆದಿತ್ತು. ಅದರಿಂದ ಪಾಠ ಕಲಿತಿರುವ ಇರಾನ್ ಈ ಬಾರಿ ರಣನೀತಿಯನ್ನೇ ಬದಲಿಸಿಕೊಂಡಿದ್ದು, ಸೇನೆಯ ಹಲವು ಘಟಕಗಳನ್ನೇ ನಿರ್ವಿುಸಿದೆ.

ಯುದ್ಧದ ಮೊದಲ ಹತ್ತು ದಿನಗಳಲ್ಲೇ ಇರಾನ್ 2 ಸಾವಿರಕ್ಕಿಂತ ಅಧಿಕ ಮಿಸೈಲ್ ಮತ್ತು 500ಕ್ಕಿಂತ ಅಧಿಕ ಡ್ರೋನ್​ಗಳನ್ನು ಪ್ರಯೋಗಿಸಿದೆ. ಮುಂಬರುವ ದಿನಗಳಲ್ಲಿ ಶಸ್ತ್ರಾಸ್ತ್ರಗಳ ಬಳಕೆ ತಗ್ಗಿಸಿ, ಗೆರಿಲ್ಲಾ ಯುದ್ಧತಂತ್ರವನ್ನು ಹೆಚ್ಚಾಗಿ ಬಳಸಲಿದೆ. ಈ ಮೂಲಕ ಯುದ್ಧವನ್ನು ಹಲವು ವಾರಗಳ ಕಾಲ ಮುಂದುವರಿಸುವ ಮತ್ತು ಅಮೆರಿಕಕ್ಕೆ ಪ್ರತಿಕ್ರಿಯೆ ನೀಡುವ ಪ್ರಕ್ರಿಯೆಯನ್ನು ಮುಂದುವರಿಸಲಿದೆ.

ಪ್ರಾದೇಶಿಕ ಒತ್ತಡ: ಇರಾನ್ ತನ್ನ ಮಿತ್ರಪಡೆಗಳಾದ ಹೆಜ್ಬೊಲ್ಲಾ (ಲೆಬನಾನ್), ಹೌತಿಗಳು (ಯೆಮೆನ್) ಮತ್ತು ಇರಾಕ್​ನ ಶಿಯಾ ಗುಂಪುಗಳ ಮೂಲಕ ಏಕಕಾಲದಲ್ಲಿ ಹಲವು ಕಡೆಗಳಿಂದ ಅಮೆರಿಕದ ಮೇಲೆ ಒತ್ತಡ ಹೇರುತ್ತಿದೆ. ಈ ಗುಂಪುಗಳು ಶೀಘ್ರದಲ್ಲೇ ಯುದ್ಧದಲ್ಲಿ ಭಾಗಿಯಾಗುವ ಸಾಧ್ಯತೆಗಳಿವೆ.

ಆರ್ಥಿಕ ಆಘಾತ: ಹಾಮುಜ್ ಜಲಸಂಧಿಯನ್ನು ಬಂದ್ ಮಾಡುವ ಬೆದರಿಕೆ ಹಾಕುವ ಮೂಲಕ ಇರಾನ್ ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ಕಂಪನ ಸೃಷ್ಟಿಸಿದೆ. ರಷ್ಯಾದಿಂದ ಕಚ್ಚಾ ತೈಲ ಖರೀದಿಗೆ ಅಮೆರಿಕ ಸಮ್ಮತಿಸಿದ್ದು, ತನ್ನ ಒತ್ತಡ ತಂತ್ರಕ್ಕೆ ಸಿಕ್ಕ ಜಯ ಎಂದು ಇರಾನ್ ಬಣ್ಣಿಸಿದೆ.

ವೆಚ್ಚದ ಆಟ: ಅಮೆರಿಕದ ದುಬಾರಿ ಕ್ಷಿಪಣಿ ನಿರೋಧಕ ವ್ಯವಸ್ಥೆಗಳನ್ನು ಸೋಲಿಸಲು ಇರಾನ್ ಅಗ್ಗದ ದರದ ಡ್ರೋನ್​ಗಳನ್ನು ಸಾವಿರಾರು ಸಂಖ್ಯೆಯಲ್ಲಿ ಬಳಸಿ ಅಮೆರಿಕದ ಮಿಲಿಟರಿ ವೆಚ್ಚವನ್ನು ಹೆಚ್ಚಿಸುತ್ತಿದೆ.

ಅಯಾತೊಲ್ಲಾ ಅಲಿ ಖಮೇನಿ ಪುತ್ರ ಮೊಜ್ತಾಬಾ ಅವರನ್ನು ಇರಾನ್​ನ ಹೊಸ ಸವೋಚ್ಚ ನಾಯಕ ಎಂದು ನೇಮಿಸಲಾಗಿದೆ. ‘ಅಮೆರಿಕದ ಮೇಲೆ ದಾಳಿ ಮುಂದುವರಿಯಲಿದೆ’ ಎಂದು ಮೊಜ್ತಾಬಾ ಘೋಷಿಸಿದ್ದಾರೆ. ಮಿಲಿಟರಿ ಕಾರ್ಯಾಚರಣೆಗಳ ಸಂಪೂರ್ಣ ಜವಾ ಬ್ದಾರಿಯನ್ನು ರೆವಲ್ಯೂಷನರಿ ಗಾರ್ಡ್ಸ್​ನ ಕಮಾಂಡರ್​ಗಳು ವಹಿಸಿಕೊಂಡಿದ್ದಾರೆ.

ಡ್ರೋನ್​ಗಳು: ‘ಶಾಹೆದ್-136’ ಮತ್ತು ‘ಶಾಹೆದ್-131’ ಕಾಮಿಕೇಜ್ ಡ್ರೋನ್​ಗಳನ್ನು ಹೆಚ್ಚಾಗಿ ಬಳಸುತ್ತಿದೆ. ಇವುಗಳನ್ನು ಪತ್ತೆ ಮಾಡುವುದು ಕಷ್ಟ ಮತ್ತು ಇವು ಅಮೆರಿಕದ ನೆಲೆಗಳ ಮೇಲೆ ಸಮೂಹ ದಾಳಿ ಮಾಡುತ್ತಿವೆ.

ಬ್ಯಾಲಿಸ್ಟಿಕ್ ಕ್ಷಿಪಣಿಗಳು: ‘ಶಹಾಬ್-3’ ಮತ್ತು ‘ಫತ್ತಾಹ್’ ಎಂಬ ಹೈಪರ್ ಸಾನಿಕ್ ಕ್ಷಿಪಣಿಗಳನ್ನು ಇರಾನ್ ಬಳಸುತ್ತಿದೆ. ಇವು ಶಬ್ದಕ್ಕಿಂತ 15 ಪಟ್ಟು ಹೆಚ್ಚು ವೇಗದಲ್ಲಿ ಚಲಿಸಬಲ್ಲವು ಎಂದು ಇರಾನ್ ಹೇಳಿಕೊಂಡಿದೆ.

ಕ್ರೂಸ್ ಕ್ಷಿಪಣಿಗಳು: ‘ಸೌಮಾರ್’ ಮತ್ತು ‘ಪಾವೆಹ್’ನಂತಹ ದೂರಗಾಮಿಕ್ಷಿಪಣಿಗಳು ಅಮೆರಿಕದ ನೌಕಾಪಡೆಗಳಿಗೆ ಸವಾಲಾಗಿವೆ.

ಇದರಲ್ಲಿ ಕೇವಲ ಸೈನಿಕರಲ್ಲದೆ, ‘ಬಸಿಜ್’ ಎಂಬ ನಾಗರಿಕ ಸ್ವಯಂಸೇವಕ ಪಡೆಯನ್ನು ಬಳಸಿಕೊಳ್ಳಲಾಗುತ್ತಿದೆ. ಶತ್ರು ಸೇನೆ ಹಳ್ಳಿ ಅಥವಾ ನಗರ ಪ್ರವೇಶಿಸಿದಾಗ ಪ್ರತಿಯೊಬ್ಬ ಪ್ರಜೆಯೂ ಸೈನಿಕನಂತೆ ಕಾರ್ಯನಿರ್ವಹಿಸಿ, ಶತ್ರುಗಳನ್ನು ಹಿಮ್ಮೆಟ್ಟಿಸಲು ಯತ್ನಿಸುತ್ತಾನೆ.

ಬೃಹತ್ ಸೇನೆಯನ್ನು ಎದುರಿಸಲು ಸಣ್ಣ ಸಣ್ಣ ಗುಂಪುಗಳು ‘ಹೊಡೆದು ಓಡುವ’ ಗೆರಿಲ್ಲಾ ತಂತ್ರವನ್ನು ಬಳಸುತ್ತವೆ. ಇದರಿಂದ ಶತ್ರುಗಳಿಗೆ ಯಾರ ಮೇಲೆ ದಾಳಿ ಮಾಡಬೇಕೆಂದು ತಿಳಿಯುವುದಿಲ್ಲ. ಇರಾನ್ ಮೊದಲಿನಿಂದಲೂ ಈ ತಂತ್ರಗಾರಿಕೆಯಲ್ಲಿ ನಿಪುಣವಾಗಿದೆ.

ಸ್ಥಳೀಯ ಸಂಪನ್ಮೂಲ: ಪ್ರತಿ ಘಟಕಕ್ಕೂ ತನ್ನದೇ ಆದ ಆಯುಧ ಸಂಗ್ರಹ ಮತ್ತು ಆಹಾರ ಪೂರೈಕೆ ಇರುತ್ತದೆ. ಇದರಿಂದ ಹೊರಗಿನ ಸಂಪರ್ಕ ಕಡಿತಗೊಂಡರೂ ಅವರು ತಿಂಗಳುಗಟ್ಟಲೇ ಹೋರಾಡಬಲ್ಲರು.

ಜಾಫರಿ ರೂಪಿಸಿದ ಪ್ರಸಿದ್ಧ ರಕ್ಷಣಾ ತಂತ್ರವೇ ‘ಮೊಸೈಕ್ ಡಿಫೆನ್ಸ್’. ಮೊಸೈಕ್ ಡಿಫೆನ್ಸ್ ಎಂದರೆ ಇರಾನನ್ನು ಒಂದು ‘ಜೇನುಗೂಡಿನಂತೆ’ ಮಾಡಲಾಗಿದೆ. ಶತ್ರುಗಳು ಗೂಡಿನ ಒಂದು ಭಾಗವನ್ನು ನಾಶಪಡಿಸಿದರೂ, ಉಳಿದ ಭಾಗಗಳಿಂದ ನೂರಾರು ಜೇನುನೊಣಗಳು (ಸೈನಿಕರು) ದಾಳಿ ಮಾಡುತ್ತಲೇ ಇರುತ್ತಾರೆ. ಇದರಲ್ಲಿ ವಿಕೇಂದ್ರೀಕೃತ ಕಮಾಂಡ್​ಗೆ ಆದ್ಯತೆ ನೀಡಲಾಗಿದೆ. ಸಾಮಾನ್ಯ ಯುದ್ಧಗಳಲ್ಲಿ ಒಬ್ಬನೇ ಮುಖ್ಯಸ್ಥ ಇರುತ್ತಾನೆ. ಆದರೆ ಮೊಸೈಕ್ ಡಿಫೆನ್ಸ್​ನಲ್ಲಿ ಇಡೀ ದೇಶವನ್ನು ಸಣ್ಣ ಸಣ್ಣ ಸ್ವತಂತ್ರ ಘಟಕಗಳಾಗಿ ವಿಂಗಡಿಸಲಾಗಿದೆ.

ಒಂದು ವೇಳೆ ಕೇಂದ್ರ ನಾಯಕತ್ವ ಹತನಾದರೂ, ಪ್ರತಿ ಪ್ರಾಂತ್ಯದ ಕಮಾಂಡರ್ ತನ್ನದೇ ಆದ ನಿರ್ಧಾರ ತೆಗೆದುಕೊಂಡು ಯುದ್ಧ ಮುಂದುವರಿಸಬಹುದು. ಮಾತ್ರವಲ್ಲ, ಸೇನೆ ಅಥವಾ ಸರ್ಕಾರದ ಯಾವುದೇ ಮುಖ್ಯಸ್ಥ ಯುದ್ಧದ ವೇಳೆ ಹತನಾದರೆ ಅಥವಾ ಗಂಭೀರವಾಗಿ ಗಾಯಗೊಂಡರೆ ಅವರ ಜಾಗ ತುಂಬಲು ಒಬ್ಬಿಬ್ಬರಲ್ಲ ಆಯಾ ವಿಭಾಗಕ್ಕೆ ನಾಲ್ಕು-ನಾಲ್ಕು ಉತ್ತರಾಧಿಕಾರಿಗಳನ್ನು ಮೊಸೈಕ್ ಡಿಫೆನ್ಸ್ ತಂತ್ರಗಾರಿಕೆಯಲ್ಲೇ ಸಜ್ಜುಗೊಳಿಸಲಾಗಿದೆ.

ಮೊಹಮ್ಮದ್ ಅಲಿ ಜಾಫರಿ 2007ರಿಂದ 2019ರವರೆಗೆ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕೋರ್​ನ ಪ್ರಧಾನ ಕಮಾಂಡರ್ ಆಗಿದ್ದವರು. ಇವರು ಪ್ರಸಿದ್ಧ ತಂತ್ರಜ್ಞ. ಇರಾನ್ ಮತ್ತು ಇರಾಕ್ ಯುದ್ಧದ ಸಮಯದಲ್ಲಿ ಮಿಲಿಟರಿ ಕಾರ್ಯಾಚರಣೆಗಳಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಇರಾನ್​ನ ಆಂತರಿಕ ಭದ್ರತೆ ಮತ್ತು ವಿದೇಶಿ ಶಕ್ತಿಗಳ ವಿರುದ್ಧದ ರಕ್ಷಣಾ ವ್ಯವಸ್ಥೆಯನ್ನು ಆಧುನೀಕರಿಸಿದ ಹೆಗ್ಗಳಿಕೆ ಜಾಫರಿ ಅವರದ್ದು. ಅಲ್ಲದೆ, ಮಧ್ಯಪ್ರಾಚ್ಯದಾದ್ಯಂತ (ಲೆಬನಾನ್, ಸಿರಿಯಾ, ಯೆಮೆನ್) ಮಿಲಿಟರಿ ಗುಂಪುಗಳನ್ನು ಸಂಘಟಿಸಿ ಅಮೆರಿಕದ ವಿರುದ್ಧ ನಿಲ್ಲುವಂತೆ ಮಾಡಿದ್ದಾರೆ.