ಇರಾನ್ ಜೊತೆಗಿನ ಒಪ್ಪಂದಕ್ಕೆ ಅಮೆರಿಕ ಅಧ್ಯಕ್ಷ ಟ್ರಂಪ್ ಸಮ್ಮತಿ! ಇದು ಅತ್ಯಂತ ಗಂಭೀರ ಹಾಗೂ ಐತಿಹಾಸಿಕ ಒಪ್ಪಂದವಾಗಲಿದೆ ಎಂದ ಶ್ವೇತಭವನ! Donald Trump

ಈ ಬಗ್ಗೆ ಟ್ರೂತ್ ಸೋಶಿಯಲ್ ಪೋಸ್ಟ್ ಹಾಕಿರುವ ಟ್ರಂಪ್, ಇರಾನ್ ಜೊತೆಗಿನ ಒಪ್ಪಂದವು ಅತ್ಯಂತ ಮಹತ್ತರ ಹಾಗೂ ಅರ್ಥಪೂರ್ಣವಾಗಿರಲಿದೆ, ಇಲ್ಲದಿದ್ದರೆ ಯಾವುದೇ ಒಪ್ಪಂದವೂ ಇರುವುದಿಲ್ಲ ಎಂದು ಅತ್ಯಂತ ಖಡಕ್ ಆಗಿ ಘೋಷಿಸಿದ್ದಾರೆ.

ಅಮೆರಿಕ ವಿಧಿಸಿರುವ ಕಠಿಣ ಷರತ್ತುಗಳಿಗೆ ಇರಾನ್ ಸಂಪೂರ್ಣವಾಗಿ ಒಪ್ಪದಿದ್ದರೆ ಯಾವುದೇ ಕಾರಣಕ್ಕೂ ಒಪ್ಪಂದಕ್ಕೆ ಸಹಿ ಹಾಕುವುದಿಲ್ಲ ಎಂಬ ಸ್ಪಷ್ಟ ಸಂದೇಶವನ್ನೂ ಈ ಮೂಲಕ ಟ್ರಂಪ್ ರವಾನಿಸಿದ್ದಾರೆ. ಇದೇ ವೇಳೆ, 2015 ರಲ್ಲಿ ಬರಾಕ್ ಒಬಾಮಾ ಆಡಳಿತವು ಇರಾನ್ ಜೊತೆ ಮಾಡಿಕೊಂಡಿದ್ದ JCPOA ಪರಮಾಣು ಒಪ್ಪಂದವನ್ನು ಟ್ರಂಪ್ ಕಟುವಾಗಿ ಟೀಕಿಸಿದ್ದಾರೆ.

ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಅವರ ವಿದೇಶಾಂಗ ನೀತಿಯನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡ ಟ್ರಂಪ್, 2015 ರ ಜೆಸಿಪಿಒಎ ಒಪ್ಪಂದವು ಇರಾನ್ ರಹಸ್ಯವಾಗಿ ಪರಮಾಣು ಬಾಂಬ್ ತಯಾರಿಸಲು ಮುಕ್ತ ಮತ್ತು ನೇರ ಹಾದಿ ಮಾಡಿಕೊಟ್ಟಿತ್ತು. ಈಗ ನಾನು ಮಾಡಲು ಹೊರಟಿರುವ ಒಪ್ಪಂದವು ಒಬಾಮಾ ಆಡಳಿತದ ಆ ವಿನಾಶಕಾರಿ ವಿಫಲ ನೀತಿಗೆ ಸಂಪೂರ್ಣ ವಿರುದ್ಧವಾಗಿರುತ್ತದೆ ಎಂದು ಹೇಳಿದ್ದಾರೆ.

ವಿರೋಧ ಪಕ್ಷವಾದ ಡೆಮೋಕ್ರಾಟ್‌ಗಳನ್ನು ತೀವ್ರ ನಿಂದನಾತ್ಮಕ ಶಬ್ದಗಳಿಂದ ಟೀಕಿಸಿದ ಟ್ರಂಪ್, ಅವರೆಲ್ಲರೂ ದಾರಿ ತಪ್ಪಿದ ಮೂರ್ಖರು. ಅವರಿಗೆ ನನ್ನ ರಾಜತಾಂತ್ರಿಕ ಗೆಲುವುಗಳನ್ನು ಸಹಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಅವರು ಕೇವಲ ದೇಶದಲ್ಲಿ ವಿಭಜನೆ ಮತ್ತು ನಷ್ಟವನ್ನು ಸೃಷ್ಟಿಸುತ್ತಿದ್ದಾರೆ. ಆದರೆ, ಇರಾನ್‌ನೊಂದಿಗೆ ನಾನು ಜಾಗತಿಕ ಹಿತಾಸಕ್ತಿಯ ಅತ್ಯಂತ ಭವ್ಯವಾದ ಒಪ್ಪಂದವನ್ನು ಮಾಡಿಕೊಳ್ಳಲಿದ್ದೇನೆ ಎಂದು ಸವಾಲು ಹಾಕಿದ್ದಾರೆ.

ಪ್ರಸಕ್ತ ವರ್ಷದ ಫೆಬ್ರವರಿ 28 ರಂದು ಜಂಟಿ ಸೇನಾ ಕಾರ್ಯಾಚರಣೆಯಲ್ಲಿ ಇರಾನ್‌ನ ಅತ್ಯುನ್ನತ ಧಾರ್ಮಿಕ ನಾಯಕ ಆಯತೊಲ್ಲಾ ಅಲಿ ಖಮೇನಿ ಅವರ ಹತ್ಯೆಯಾದ ನಂತರ ಅಮೆರಿಕ ಮತ್ತು ಇರಾನ್ ನಡುವೆ ಭೀಕರ ಸಶಸ್ತ್ರ ಸಂಘರ್ಷ ಮತ್ತು ಬಂದರುಗಳ ದಿಗ್ಬಂಧನ ಆರಂಭವಾಗಿತ್ತು. ಇರಾನ್‌ನ ಪರಮಾಣು ಮಹತ್ವಾಕಾಂಕ್ಷೆಯು ಇಂದಿಗೂ ಉಭಯ ದೇಶಗಳ ನಡುವಿನ ಮುಖ್ಯ ಸಂಘರ್ಷದ ಕೇಂದ್ರಬಿಂದುವಾಗಿದೆ.

ಇರಾನ್ ತನ್ನ ಪರಮಾಣು ಯೋಜನೆ ಕೇವಲ ನಾಗರಿಕ ಮತ್ತು ಇಂಧನ ಬಳಕೆಗೆ ಮಾತ್ರ ಸೀಮಿತ ಎಂದು ವಾದಿಸುತ್ತಿದ್ದರೆ, ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರವಾದ ಇಸ್ರೇಲ್ ಮಾತ್ರ ಟೆಹ್ರಾನ್ ರಹಸ್ಯವಾಗಿ ಸಾಮೂಹಿಕ ವಿನಾಶಕಾರಿ ಪರಮಾಣು ಅಸ್ತ್ರಗಳನ್ನು ಸಿದ್ಧಪಡಿಸುತ್ತಿದೆ ಎಂದು ಆರೋಪಿಸುತ್ತಿವೆ. ಇರಾನ್ ತನ್ನಲ್ಲಿರುವ ಸಂವರ್ಧಿತ ಯುರೇನಿಯಂ ಅನ್ನು ಸಂಪೂರ್ಣವಾಗಿ ಹಸ್ತಾಂತರಿಸಬೇಕು ಎಂದು ಇಸ್ರೇಲ್ ಒತ್ತಾಯಿಸುತ್ತಿದೆ.

ಅಂತರರಾಷ್ಟ್ರೀಯ ಮಾಧ್ಯಮಗಳಾದ ‘ಅಕ್ಸಿಯೋಸ್’ಮತ್ತು ‘ಫೈನಾನ್ಷಿಯಲ್ ಟೈಮ್ಸ್’ ವರದಿಗಳ ಪ್ರಕಾರ, ಪಾಕಿಸ್ತಾನ ಮತ್ತು ಕತಾರ್ ದೇಶಗಳ ಮಧ್ಯಸ್ಥಿಕೆಯಲ್ಲಿ ಉಭಯ ದೇಶಗಳು ಐತಿಹಾಸಿಕ ಒಪ್ಪಂದದ ಸನಿಹಕ್ಕೆ ತಲುಪಿವೆ. ಈ ಹೊಸ ಕರಡು ಒಪ್ಪಂದದ ಅಡಿಯಲ್ಲಿ ಮುಂದಿನ 2 ತಿಂಗಳ ಅವಧಿಗೆ ಕದನ ವಿರಾಮವನ್ನು ವಿಸ್ತರಿಸಲಾಗುವುದು.

ಜಾಗತಿಕ ತೈಲ ಮಾರುಕಟ್ಟೆ ಮತ್ತು ಮಧ್ಯಪ್ರಾಚ್ಯದ ಶಾಂತಿಯ ದೃಷ್ಟಿಯಿಂದ ಈ ಒಪ್ಪಂದವು ಅತ್ಯಂತ ನಿರ್ಣಾಯಕವಾಗಿದ್ದು, ಮುಂಬರುವ ದಿನಗಳಲ್ಲಿ ಟ್ರಂಪ್ ಮತ್ತು ಇರಾನ್ ಆಡಳಿತ ಅಧಿಕೃತವಾಗಿ ಯಾವಾಗ ಒಪ್ಪಂದಕ್ಕೆ ಸಹಿ ಹಾಕಲಿವೆ ಎಂಬುದನ್ನು ಇಡೀ ಜಗತ್ತು ಕುತೂಹಲದಿಂದ ಎದುರುನೋಡುತ್ತಿದೆ,(ಏಜೆನ್ಸೀಸ್​).