MiddleEastCrisis: ಯುದ್ಧ ನಿಲ್ಲಿಸುತ್ತಾ ಪಾಕ್​ನ ಈ ಮಾತುಕತೆ? ಅಮೆರಿಕ-ಇರಾನ್ ಮುಖಾಮುಖಿಗೆ ಇಸ್ಲಾಮಾಬಾದ್ ಫುಲ್ ಲಾಕ್‌ಡೌನ್!

ಅಮೆರಿಕ ಮತ್ತು ಇರಾನ್ ನಡುವಿನ ಈ ಹೈ-ಪ್ರೊಫೈಲ್ ಮಾತುಕತೆಯ ಹಿನ್ನೆಲೆಯಲ್ಲಿ ಇಸ್ಲಾಮಾಬಾದ್ ನಗರವನ್ನು ಅಕ್ಷರಶಃ ಭದ್ರತಾ ಕೋಟೆಯನ್ನಾಗಿ ಪರಿವರ್ತಿಸಲಾಗಿದೆ. ಪ್ರಮುಖ ರಸ್ತೆಗಳು ಮತ್ತು ಸರ್ಕಾರಿ ಕಚೇರಿಗಳ ಸುತ್ತಲೂ ಸೇನಾ ಪಡೆಗಳು ಮತ್ತು ಸಶಸ್ತ್ರ ಪೊಲೀಸರು ಹದ್ದಿನ ಕಣ್ಣಿಟ್ಟಿದ್ದಾರೆ.

ರೆಡ್ ಜೋನ್ ಸೀಲ್ಡೌನ್: ಸಂಸತ್ತು, ರಾಯಭಾರ ಕಚೇರಿಗಳು ಮತ್ತು ಐಷಾರಾಮಿ ಹೋಟೆಲ್‌ಗಳಿರುವ 'ರೆಡ್ ಜೋನ್' ಪ್ರದೇಶಕ್ಕೆ ಸಾರ್ವಜನಿಕರ ಪ್ರವೇಶವನ್ನು ಸಂಪೂರ್ಣವಾಗಿ ನಿರ್ಬಂಧಿಸಲಾಗಿದೆ.

ಎರಡು ದಿನ ರಜೆ ಘೋಷಣೆ: ನಾಗರಿಕರ ಸಂಚಾರವನ್ನು ಕಡಿಮೆ ಮಾಡಲು ಮತ್ತು ಗಣ್ಯರ ಭದ್ರತೆಗಾಗಿ ಗುರುವಾರ ಮತ್ತು ಶುಕ್ರವಾರ ನಗರದಲ್ಲಿ ಸಾರ್ವಜನಿಕ ರಜೆ ಘೋಷಿಸಲಾಗಿದೆ. ಶಾಲೆಗಳು ಮತ್ತು ವ್ಯಾಪಾರ ಮಳಿಗೆಗಳನ್ನು ಮುಚ್ಚಲಾಗಿದ್ದು, ಇಡೀ ನಗರ ಸ್ತಬ್ಧವಾಗಿದೆ.

ಕಳೆದ ಫೆಬ್ರವರಿ 28ರಂದು ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ಹತ್ಯೆಯಾಗಿತ್ತು. ಈ ಘಟನೆಯು ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ ಕವಿಯುವಂತೆ ಮಾಡಿತ್ತು. ಆದರೆ ಪಾಕಿಸ್ತಾನದ ರಾಜತಾಂತ್ರಿಕ ಮಧ್ಯಸ್ಥಿಕೆಯಿಂದಾಗಿ ಕಳೆದ ಎರಡು ವಾರಗಳಿಂದ ತಾತ್ಕಾಲಿಕ ಕದನ ವಿರಾಮ ಘೋಷಿಸಲಾಗಿದ್ದು, ಇದೀಗ ಮಾತುಕತೆಯ ಮೂಲಕ ಶಾಶ್ವತ ಪರಿಹಾರ ಕಂಡುಕೊಳ್ಳಲು ಉಭಯ ದೇಶಗಳು ಮುಂದಾಗಿವೆ.

ಪಾಕಿಸ್ತಾನದ ಆಂತರಿಕ ಸಚಿವ ಮೊಹ್ಸಿನ್ ನಖ್ವಿ ಅವರು ಅಮೆರಿಕದ ರಾಯಭಾರಿಯನ್ನು ಭೇಟಿಯಾಗಿ, ಭೇಟಿ ನೀಡುವ ನಿಯೋಗಕ್ಕೆ "ಫೂಲ್‌ಪ್ರೂಫ್ ಸೆಕ್ಯೂರಿಟಿ" (ಸಂಪೂರ್ಣ ಭದ್ರತೆ) ನೀಡುವುದಾಗಿ ಭರವಸೆ ನೀಡಿದ್ದಾರೆ. ಈಗಾಗಲೇ 30 ಸದಸ್ಯರ ಅಮೆರಿಕನ್ ಮುಂಗಡ ಭದ್ರತಾ ತಂಡವು ಇಸ್ಲಾಮಾಬಾದ್‌ಗೆ ಆಗಮಿಸಿದ್ದು, ಹೋಟೆಲ್ ಸೆರೆನಾದಲ್ಲಿ ನಡೆಯಲಿರುವ ಮಾತುಕತೆಯ ಸ್ಥಳವನ್ನು ಪರಿಶೀಲಿಸಿದೆ.

ಈ ಮಾತುಕತೆಯಲ್ಲಿ ಭಾಗವಹಿಸುವ ಪ್ರತಿನಿಧಿಗಳು ಮತ್ತು ವರದಿಗಾರರಿಗೆ ಪಾಕಿಸ್ತಾನ ಸರ್ಕಾರವು 'ವೀಸಾ-ಆನ್-ಅರೈವಲ್' (ಆಗಮಿಸಿದ ತಕ್ಷಣ ವೀಸಾ) ಸೌಲಭ್ಯವನ್ನು ಘೋಷಿಸಿದೆ. ವಿಮಾನ ನಿಲ್ದಾಣಗಳಲ್ಲಿ ವಿಶೇಷ ಸಹಾಯ ಕೇಂದ್ರಗಳನ್ನು ಸ್ಥಾಪಿಸಲಾಗಿದ್ದು, ಯಾವುದೇ ಅಡೆತಡೆಯಿಲ್ಲದೆ ಮಾತುಕತೆ ನಡೆಯಲು ಪಾಕಿಸ್ತಾನ ವಿದೇಶಾಂಗ ಸಚಿವ ಇಶಾಕ್ ದಾರ್ ಅವರು ಸಕಲ ಸಿದ್ಧತೆಗಳನ್ನು ಕೈಗೊಂಡಿದ್ದಾರೆ,(ಏಜೆನ್ಸೀಸ್).