ಖೆಶ್ಮ್ ದ್ವೀಪದ ಮೇಲೆ ಯುಎಸ್ ವೈಮಾನಿಕ ದಾಳಿ: ಅಮೆರಿಕ-ಇರಾನ್ ಶಾಂತಿ ಒಪ್ಪಂದಕ್ಕೆ ನೆತನ್ಯಾಹು ಬ್ರೇಕ್? Qeshm Island

ವಾಷಿಂಗ್ಟನ್​​: ಕಳೆದ ಎಂಟು ತಿಂಗಳಿನಿಂದ ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಅಮೆರಿಕ, ಇರಾನ್​ ನಡುವಿನ ಸಂಘರ್ಷಕ್ಕೆ ಕೊನೆ ಹಾಡಲು ಒಂದು ಕಡೆ ಶಾಂತಿ ಮಾತುಕತೆ ನಡೆಯುತ್ತಿದ್ದರೆ, ಇನ್ನೊಂದು ಕಡೆ ಯುಎಸ್​ ಪಡೆಗಳು ಇರಾನ್​​ ಮೇಲೆ ದಾಳಿ ಮುಂದುವರಿಸಿದೆ ಎಂದು ವರದಿಯಾಗುತ್ತಿದೆ.

ಕೆಲ ದಿನಗಳ ಹಿಂದೆ, ಅಮೆರಿಕ ಮತ್ತು ಇರಾನ್​ ಎರಡು ದೇಶಗಳು ಶಾಂತಿ ಒಪ್ಪಂದಕ್ಕೆ ಮನಸ್ಸು ಮಾಡಿದ್ದು, ಕೆಲವೇ ದಿನಗಳಲ್ಲಿ ಕತಾರ್​ನಲ್ಲಿ ಮಾತುಕತೆ ಆರಂಭವಾಗಲಿದೆ ಎಂದು ಹೇಳಲಾಗುತ್ತಿತ್ತು. ಆದರೆ, ಹೊರ್ಮುಜ್​ ಜಲಸಂಧಿ ಸಮೀಪದಲ್ಲಿರುವ ಖೆಶ್ಮ್ ದ್ವೀಪ (Qeshm Island) ದ ಮೇಲೆ ಅಮೆರಿಕ ಪಡೆಗಳು ಮಿಸೈಲ್​ ದಾಳಿ ನಡೆಸಿವೆ ಎಂದು ತಿಳಿದುಬಂದಿದೆ.

ಖೆಶ್ಮ್ ದ್ವೀಪದ ಮೇಲೆ ಮಿಸೈಲ್​ ಅಟ್ಯಾಕ್​!

ಜಾಗತಿಕ ಮಾಧ್ಯಮಗಳ ವರದಿ ಪ್ರಕಾರ, ಹೊರ್ಮುಜ್​ ಜಲಸಂಧಿಗೆ ಹತ್ತಿರದಲ್ಲಿರುವ ಖೆಶ್ಮ್ ದ್ವೀಪದ ಮೇಲೆ ಅಮೆರಿಕ ವೈಮಾನಿಕ ದಾಳಿ ಮಾಡಿದೆ, ಹಾಗೂ ದ್ವೀಪದ ನಿವಾಸಿಗಳು ಎರಡು ವಿಮಾನಗಳ ಹಾರಾಟವನ್ನು ಗುರುತಿಸಿದ್ದಾಗಿ ಹೇಳಿದ್ದಾರೆಂದು ಇರಾನ್​ ಮಾಧ್ಯಮಗಳು ವರದಿ ಮಾಡಿದೆ.

ಈ ಮಾತನ್ನು ಭಗಶಃ ತಳ್ಳಿ ಹಾಕಿರುವ ಅಮರಿಕ ಮಾಧ್ಯಮಗಳು, ಅಮೆರಿಕದ ಸೇನಾ ನೆಲೆಗಳ ಮೇಲೆ ದಾಳಿ ಮಾಡುತ್ತಿರುವ ಇರಾನ್​ ಪಡೆಗಳ ಮೇಲೆ ಅಮೆರಿಕ ಸೀಮಿತ ದಾಳಿ ನಡೆಸುತ್ತಿದೆ. ಆದರೆ ಇದು ಸಂಪೂರ್ಣ ಯುದ್ಧಕ್ಕೆ ಮುನ್ನುಡಿಯಲ್ಲ ಎಂಬ ಸ್ಪಷ್ಟನೆ ನೀಡಿದೆ.

ಆದರೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​, ಸದ್ಯ ಯುಎಸ್​ನಲ್ಲಿ ಮಧ್ಯಂತರ ಚುನಾವಣೆ ನಡೆಯಲಿದೆ, ಅದು ಮುಗಿಯುವವರೆಗೆ ಇರಾನ್ ಮೇಲೆ ಯಾವುದೇ ದಾಳಿ ನಡೆಸುವುದಿಲ್ಲವೆಂದು ಹೇಳಿಕೆ ನೀಡಿದ್ದರು. ಆದರೀಗ ಖೆಶ್ಮ್ ದ್ವೀಪದ ಮೇಲೆ ದಾಳಿ ನಡೆದಿದ್ದು, ಶಾಂತಿ ಒಪ್ಪಂದ ಯಾವ ದಿಕ್ಕನ್ನು ಪಡೆದುಕೊಳ್ಳುತ್ತದೆ ಎಂದು ಕಾದು ನೋಡಬೇಕಿದೆ.

ಈ ದಾಳಿ ಹಿಂದಿರುವುದು ನೆತನ್ಯಾಹು?

ಇನ್ನು ಖೆಶ್ಮ್ ದ್ವೀಪದ ಮೇಲೆ ಅಮೆರಿಕ ನಡೆಸಿದ ದಾಳಿಯ ಹಿಂದೆ ಇಸ್ರೇಲ್​ ಪ್ರಧಾನಿ ಬೆಂಜಾಮಿನ್​ ನೆತನ್ಯಾಹುವಿನ ಕೈವಾಡವಿದೆ ಎಂದು ಕೆಲ ಮಾಧ್ಯಮಗಳು ವರದಿ ಮಾಡಿವೆ. ಅಮೆರಿಕ ಹಾಗೂ ಇರಾನ್ ನಡುವೆ ಶಾಂತಿ ಸಂಭವಿಸಿದರೆ, ತಮ್ಮ ಮಧ್ಯಂತರ ಸರ್ಕಾರಕ್ಕೆ ತೊಂದರೆಯಾಗುತ್ತದೆ ಎಂದು ಬೆಂಜಾಮಿನ್​ ನೆತನ್ಯಾಹು ಭಾವಿಸಿದ್ದಾರೆ.

ಇತ್ತೀಚೆಗೆ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲಿ ನೆತನ್ಯಾಹು ಬಹುಮತ ಪಡೆಯುವಲ್ಲಿ ವಿಫಲರಾಗಿದ್ದು, ಇದರ ಲಾಭವನ್ನು ಇರಾನ್​ ಪಡೆದುಕೊಂಡು, ತನ್ನ ದೇಶದ ವಿರುದ್ಧ ಕುತಂತ್ರ ಮಾಡಬಹುದು ಎಂಬ ಕಾರಣಕ್ಕೆ ನೆತನ್ಯಾಹು, ಡೊನಾಲ್ಡ್​ ಟ್ರಂಪ್​ ಬಳಿ, ಇರಾನ್​ ಮೇಲೆ ದಾಳಿ ನಿಲ್ಲಿಸಬೇಡಿ ಎಂದು ಹೇಳಿದ್ದಾರೆಂಬ ವದಂತಿ ಹೇಳಿಬಂದಿದೆ, (ಏಜೆನ್ಸೀಸ್​).