ದೋಹಾದಲ್ಲಿ 'ತುಳುಸಿರಿ' ವೈಭವ: ತುಳುಕೂಟ ಖತಾರ್ ಬೆಳ್ಳಿ ಹಬ್ಬದ ಅದ್ಧೂರಿ ಆಚರಣೆ! Tulusiri

ದೋಹಾ, ಖತಾರ್: ಭಾರತೀಯ ರಾಯಭಾರ ಕಚೇರಿಯ ಅಡಿಯಲ್ಲಿರುವ ಭಾರತೀಯ ಸಾಂಸ್ಕೃತಿಕ ಕೇಂದ್ರದ (ICC) ಪ್ರಮುಖ ಅಂಗಸಂಸ್ಥೆಯಾದ ತುಳುಕೂಟ ಖತಾರ್, ತನ್ನ 25 ವರ್ಷಗಳ ಸುದೀರ್ಘ ಪಯಣದ ನೆನಪಿಗಾಗಿ 'ತುಳುಸಿರಿ' ( Tulusiri ) ಎಂಬ ಬೆಳ್ಳಿ ಹಬ್ಬದ ಸಂಭ್ರಮಾಚರಣೆಯನ್ನು ಜನವರಿ 23, 2026 ರಂದು ದೋಹಾದ ಡಿಪಿಎಸ್ ಎಂಐಎಸ್ ಶಾಲಾ ಸಭಾಂಗಣದಲ್ಲಿ ಅತ್ಯಂತ ವೈಭವದಿಂದ ಆಚರಿಸಿತು. ಈ ಸಮಾರಂಭವು ತುಳುನಾಡಿನ ಶ್ರೀಮಂತ ಸಾಂಸ್ಕೃತಿಕ ಪರಂಪರೆ, ಏಕತೆ ಮತ್ತು ಸಮುದಾಯ ಸೇವೆಯ ಸಂಕೇತವಾಗಿ ಮೂಡಿಬಂತು.

ಗೌರವ ಸಮರ್ಪಣೆ ಮತ್ತು ಸ್ಮರಣಿಕೆ ಬಿಡುಗಡೆ: ಈ ಸಂಭ್ರಮದ ಸಂದರ್ಭದಲ್ಲಿ ವಿವಿಧ ಕ್ಷೇತ್ರಗಳ ಸಾಧಕರಿಗೆ ಪ್ರಶಸ್ತಿ ನೀಡಿ ಗೌರವಿಸಲಾಯಿತು:

* ಆಶ್ಲೇ ಫೆರ್ನಾಂಡಿಸ್: "ತುಳುನಾಡ ಸೇವಾ ತುಡರ್".

* ನಾಡೋಜ ಡಾ. ಜಿ. ಶಂಕರ್ ಮತ್ತು ಹಾಜಿ ಜಕರಿಯಾ ಜೊಕಟ್ಟೆ: "ತುಳುನಾಡ ಬೊಲ್ಪು".

* ವಿಶ್ವೇಶ್ವರ ಭಟ್ ಮತ್ತು ದೀಪಕ್ ಶೆಟ್ಟಿ: ವಿಶೇಷ ಗೌರವ.

ಬೆಳ್ಳಿ ಹಬ್ಬದ ನೆನಪಿಗಾಗಿ 'ನಿರೆಲ್' ಎಂಬ ಸ್ಮರಣಿಕೆಯನ್ನು ಗಣ್ಯರ ಸಮ್ಮುಖದಲ್ಲಿ ಬಿಡುಗಡೆ ಮಾಡಲಾಯಿತು. ಯಶ್ವಿನ್ ದೇವಡಿಗ ಅವರ ನಿರ್ದೇಶನದಲ್ಲಿ ನಡೆದ 'ಜರ್ನಿ ಆಫ್ ಸಿಲ್ವರ್ ಲೆಗಸಿ' ಪ್ರದರ್ಶನವು ತುಳುಕೂಟದ 25 ವರ್ಷಗಳ ಹಾದಿಯನ್ನು ಮನಮುಟ್ಟುವಂತೆ ಚಿತ್ರಿಸಿತು.

ಸಂಸ್ಥೆಯ ಉಪಾಧ್ಯಕ್ಷರಾದ ವಿಜಯ್ ರೈ ಕುಂಬ್ರ ಅವರು ವಂದನಾರ್ಪಣೆ ಮಾಡುವುದರೊಂದಿಗೆ ಈ ಐತಿಹಾಸಿಕ ಕಾರ್ಯಕ್ರಮವು ಸಂಪನ್ನಗೊಂಡಿತು.