ಟ್ರಂಪ್ ಸಂಧಾನದ ನಾಟಕ ಬಯಲು? ಅಮೆರಿಕ ಜೊತೆ ಮಾತುಕತೆಯೇ ನಡೆದಿಲ್ಲ ಎಂದ ಇರಾನ್! Iran

ಇರಾನ್‌ನ ಪ್ರಭಾವಿ ಸುದ್ದಿ ಸಂಸ್ಥೆ ಫಾರ್ಸ್ ವರದಿ ಮಾಡಿರುವಂತೆ, ಇರಾನ್ ತನ್ನ ನೆರೆಹೊರೆಯ ಗಲ್ಫ್ ರಾಷ್ಟ್ರಗಳ ಇಂಧನ ಮೂಲಸೌಕರ್ಯಗಳ ಮೇಲೆ ದಾಳಿ ಮಾಡುವುದಾಗಿ ಎಚ್ಚರಿಕೆ ನೀಡಿದ ನಂತರ ಟ್ರಂಪ್ ಅನಿವಾರ್ಯವಾಗಿ ಇರಾನ್ ಮೇಲಿನ ದಾಳಿಯನ್ನು ಮುಂದೂಡಿದ್ದಾರೆ. ಅಷ್ಟೇ ಅಲ್ಲದೆ, ಇರಾನ್‌ನ ಪ್ರಮುಖ ಪತ್ರಿಕೆ ಟೆಹ್ರಾನ್ ಟೈಮ್ಸ್, ಅಮೆರಿಕ ಮತ್ತು ಪಾಶ್ಚಿಮಾತ್ಯ ದೇಶಗಳಲ್ಲಿ ಉಂಟಾಗಿರುವ ಆರ್ಥಿಕ ಒತ್ತಡ ಮತ್ತು ತೈಲ ಬೆಲೆ ಏರಿಕೆಯ ಭೀತಿಯೇ ಟ್ರಂಪ್ ದಾಳಿಯಿಂದ ಹಿಂದೆ ಸರಿಯಲು ಮುಖ್ಯ ಕಾರಣ ಎಂದು ವಿಶ್ಲೇಷಿಸಿದೆ.

ಇರಾನ್ ವಿದೇಶಾಂಗ ಸಚಿವ ಸೈಯದ್ ಅಬ್ಬಾಸ್ ಅರಾಗ್ಚಿ ಅವರು ಟ್ರಂಪ್ ಹೇಳಿಕೆಗೆ ವ್ಯತಿರಿಕ್ತವಾಗಿ ಮಾತನಾಡಿದ್ದಾರೆ. ಅಮೆರಿಕದೊಂದಿಗಿನ ಮಾತುಕತೆಗಳು ಈಗಾಗಲೇ ಅಂತ್ಯಗೊಂಡಿವೆ. ಇದು ನಮಗೆ ಅತ್ಯಂತ ಕಹಿ ಅನುಭವ ಮತ್ತು ವಿಶ್ವಾಸಘಾತುಕತನದ ಸಂಕೇತವಾಗಿದೆ. ಈ ಸಂಘರ್ಷವು ರಾಜತಾಂತ್ರಿಕತೆಯ ಎಲ್ಲಾ ಬಾಗಿಲುಗಳನ್ನು ಮುಚ್ಚಿದೆ ಎಂದು ಹೇಳುವ ಮೂಲಕ ಟ್ರಂಪ್ ಅವರ ಸಕಾರಾತ್ಮಕ ಚರ್ಚೆಯ ವಾದವನ್ನು ಸಾರಾಸಗಟಾಗಿ ತಳ್ಳಿಹಾಕಿದ್ದಾರೆ.

ತಮ್ಮ 'ಟ್ರೂತ್ ಸೋಶಿಯಲ್' ಖಾತೆಯಲ್ಲಿ ಟ್ರಂಪ್, ಕಳೆದ ಎರಡು ದಿನಗಳಿಂದ ಇರಾನ್ ಜೊತೆ ಸುದೀರ್ಘ ಚರ್ಚೆ ನಡೆದಿದೆ ಮತ್ತು ಇರಾನ್ ಅಣ್ವಸ್ತ್ರ ತ್ಯಜಿಸಲು ಒಪ್ಪಿದೆ ಎಂದು ಬರೆದುಕೊಂಡಿದ್ದರು. ಹೋರ್ಮುಜ್ ಜಲಸಂಧಿಯನ್ನು ತೆರೆಯಲು ನೀಡಿದ್ದ 48 ಗಂಟೆಗಳ ಗಡುವು ಮುಗಿದ ನಂತರ, ರಚನಾತ್ಮಕ ಸಂಭಾಷಣೆಯ ಹಿನ್ನೆಲೆಯಲ್ಲಿ ಇರಾನ್ ವಿದ್ಯುತ್ ಸ್ಥಾವರಗಳ ಮೇಲಿನ ದಾಳಿಯನ್ನು 5 ದಿನಗಳ ಕಾಲ ಮುಂದೂಡುವುದಾಗಿ ಅವರು ತಿಳಿಸಿದ್ದರು. ಆದರೆ ಇರಾನ್ ಈ ಎಲ್ಲಾ ಹೇಳಿಕೆಗಳನ್ನು ಕೇವಲ ಸುಳ್ಳು ಪ್ರಚಾರ ಎಂದು ಕರೆದಿದೆ.

ಯಾವುದೇ ಸಂಧಾನಗಳು ನಡೆಯುತ್ತಿಲ್ಲ. ಇಂತಹ ಮಾನಸಿಕ ಯುದ್ಧತಂತ್ರಗಳಿಂದ ಹಾರ್ಮುಜ್ ಜಲಸಂಧಿಯನ್ನು ಪುನಃ ತೆರೆಯಲು ಅಥವಾ ಇಂಧನ ಮಾರುಕಟ್ಟೆಯನ್ನು ಸ್ಥಿರಗೊಳಿಸಲು ಸಾಧ್ಯವಿಲ್ಲ ಎಂದು ಇರಾನ್ ಎಚ್ಚರಿಸಿದೆ. ಒಂದು ವೇಳೆ ಅಮೆರಿಕ ತನ್ನ 5 ದಿನಗಳ ಗಡುವಿನ ನಂತರ ದಾಳಿ ನಡೆಸಿದರೆ, ಇರಾನ್ ತನ್ನ ಸಂಪೂರ್ಣ ಸಾಮರ್ಥ್ಯದೊಂದಿಗೆ ಪ್ರತಿದಾಳಿ ನಡೆಸಲು ಸಜ್ಜಾಗಿದೆ ಎಂದು ಇರಾನ್ ಸೇನೆ ಘೋಷಿಸಿದೆ.

ಈ ಬೆಳವಣಿಗೆಯು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗೊಂದಲ ಮೂಡಿಸಿದ್ದು, ಟ್ರಂಪ್ ಮತ್ತು ಇರಾನ್ ನಾಯಕರ ನಡುವೆ ಸತ್ಯಕ್ಕಾಗಿ ದೊಡ್ಡ ಸಮರವೇ ನಡೆಯುತ್ತಿದೆ. ಮುಂದಿನ 5 ದಿನಗಳು ಇಡೀ ಜಗತ್ತಿನ ಭವಿಷ್ಯವನ್ನು ನಿರ್ಧರಿಸಲಿವೆ,(ಏಜೆನ್ಸೀಸ್).