ಡೆಡ್‌ಲೈನ್' ಮುಗಿಯುವ ಮೊದಲೇ ಟ್ರಂಪ್ ಯು-ಟರ್ನ್! ಇರಾನ್ ಮೇಲಿನ ಭೀಕರ ದಾಳಿಯನ್ನು 5 ದಿನ ಮುಂದೂಡಿದ ಯುಎಸ್​ ಅಧ್ಯಕ್ಷ! Donald Trump

ಈ ಬಗ್ಗೆ ತಮ್ಮ ಟ್ರೂತ್ ಸೋಶಿಯಲ್' ಖಾತೆಯಲ್ಲಿ ಪೋಸ್ಟ್​ ಮಾಡಿರುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಕಳೆದ ಎರಡು ದಿನಗಳಿಂದ ಇರಾನ್ ಜೊತೆ ಅತ್ಯಂತ ಆಳವಾದ ಮತ್ತು ರಚನಾತ್ಮಕ ಚರ್ಚೆಗಳು ನಡೆದಿವೆ. ಈ ಮಾತುಕತೆಗಳ ಸಕಾರಾತ್ಮಕ ಧೋರಣೆಯನ್ನು ಗಮನಿಸಿ, ಇರಾನ್‌ನ ವಿದ್ಯುತ್ ಸ್ಥಾವರ ಮತ್ತು ಇಂಧನ ಮೂಲಸೌಕರ್ಯಗಳ ಮೇಲಿನ ಎಲ್ಲಾ ದಾಳಿಗಳನ್ನು 5 ದಿನಗಳ ಕಾಲ ಮುಂದೂಡುವಂತೆ ನಾನು ಯುದ್ಧ ಇಲಾಖೆಗೆ ಸೂಚಿಸಿದ್ದೇನೆ ಎಂದು ತಿಳಿಸಿದ್ದಾರೆ. ಈ ಮಾತುಕತೆಗಳು ವಾರದ ಪೂರ್ತಿ ಮುಂದುವರಿಯಲಿವೆ ಎಂದು ಆಶಾವಾದ ವ್ಯಕ್ತಪಡಿಸಿದ್ದಾರೆ.

ಕೇವಲ ಒಂದು ದಿನದ ಹಿಂದೆಯಷ್ಟೇ ಟ್ರಂಪ್ ಇರಾನ್‌ಗೆ ಕಠಿಣ ಎಚ್ಚರಿಕೆ ನೀಡಿದ್ದರು. ಜಾಗತಿಕ ಕಚ್ಚಾ ತೈಲದ ಶೇ. 20ರಷ್ಟು ಭಾಗ ಸಾಗಣೆಯಾಗುವ ಹಾರ್ಮುಜ್ ಜಲಸಂಧಿಯನ್ನು ಕೂಡಲೇ ಮುಕ್ತಗೊಳಿಸದಿದ್ದರೆ ಇರಾನ್‌ನ ಇಂಧನ ಸಾಮ್ರಾಜ್ಯವನ್ನೇ ಧೂಳೀಪಟ ಮಾಡುವುದಾಗಿ 48 ಗಂಟೆಗಳ ಗಡುವು ನೀಡಿದ್ದರು. ಇರಾನ್ ಈ ಜಲಸಂಧಿಯನ್ನು ತನ್ನ ಶತ್ರು ರಾಷ್ಟ್ರಗಳಿಗೆ ಮಾತ್ರ ಬಂದ್ ಮಾಡಿರುವುದಾಗಿ ಹೇಳಿಕೊಂಡಿತ್ತು. ಈ ಬಿಕ್ಕಟ್ಟು ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ಭೀತಿ ಸೃಷ್ಟಿಸಿತ್ತು.

ಒಂದೆಡೆ ಟ್ರಂಪ್ ಮಾತುಕತೆ ಯಶಸ್ವಿಯಾಗಿದೆ ಎಂದು ಹೇಳುತ್ತಿದ್ದರೆ, ಇರಾನ್ ಮಾತ್ರ ಈವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಭಾನುವಾರವಷ್ಟೇ Xನಲ್ಲಿ ಪೋಸ್ಟ್ ಮಾಡಿ, ಇರಾನ್ ಅನ್ನು ಭೂಪಟದಿಂದ ಅಳಿಸಿ ಹಾಕುವ ಭ್ರಮೆಯು ಇತಿಹಾಸ ನಿರ್ಮಿಸಿದ ರಾಷ್ಟ್ರದ ವಿರುದ್ಧದ ಹತಾಶೆಯನ್ನು ತೋರಿಸುತ್ತದೆ. ಬೆದರಿಕೆಗಳು ನಮ್ಮ ಏಕತೆಯನ್ನು ಹೆಚ್ಚಿಸುತ್ತವೆ ಎಂದು ಗುಡುಗಿದ್ದರು. ಆದರೆ, ತೆರೆಮರೆಯ ರಾಜತಾಂತ್ರಿಕ ಚರ್ಚೆಗಳು ಟ್ರಂಪ್ ಮನವೊಲಿಸುವಲ್ಲಿ ಯಶಸ್ವಿಯಾದಂತೆ ಕಾಣುತ್ತಿದೆ.

ಮಧ್ಯಪ್ರಾಚ್ಯದ ಈ ಸಂಘರ್ಷ ಇಡೀ ಏಷ್ಯಾದ ಆರ್ಥಿಕತೆಯ ಮೇಲೆ ಕರಾಳ ಛಾಯೆ ಮೂಡಿಸಿತ್ತು. ಈಗ 5 ದಿನಗಳ ಕಾಲ ದಾಳಿ ನಡೆಯುವುದಿಲ್ಲ ಎಂಬ ಸುದ್ದಿ ತೈಲ ಮಾರುಕಟ್ಟೆಯಲ್ಲಿ ತುಸು ಸಮಾಧಾನ ತಂದಿದೆ. ಇಸ್ರೇಲ್ ಮೇಲೆ ಇರಾನ್ ಕ್ಷಿಪಣಿ ದಾಳಿ ಮತ್ತು ಇರಾನ್ ನಾಯಕರ ಹತ್ಯೆಯ ನಂತರದ ಉದ್ವಿಗ್ನತೆ ಈ 5 ದಿನಗಳ ಸಂಧಾನದ ಮೂಲಕ ಅಂತ್ಯಗೊಳ್ಳುತ್ತದೆಯೇ ಎಂಬುದು ಈಗ ಕುತೂಹಲದ ವಿಷಯವಾಗಿದೆ,(ಏಜೆನ್ಸೀಸ್).