ಇಷ್ಟೇ ದಿನಕ್ಕೆ ಯುದ್ಧ ನಿಲ್ಲಿಸುವ ಮಾತಿಲ್ಲ! ಇರಾನ್​ ಗತಿ ಬಗ್ಗೆ ಡೊನಾಲ್ಡ್ ಟ್ರಂಪ್​ ಅಚ್ಚರಿ ಹೇಳಿಕೆ | Trump

ವಾಷಿಂಗ್ಟನ್​​: ಫೆ.28ರಂದು ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲಿ ಮಿಲಿಟರಿ ಜಂಟಿ ಕ್ಷಿಪಣಿ ದಾಳಿ ನಡೆಸುವ ಮೂಲಕ ಇರಾನಿನ ಹಲವಾರು ಪ್ರಮುಖ ಮಿಲಿಟರಿ ನೆಲೆಗಳ ಮೇಲೆ ಭೀಕರ ದಾಳಿ ಮಾಡಿತು. ಇಷ್ಟಕ್ಕೆ ನಿಲ್ಲದ ಈ ದಾಳಿ, ಇರಾನ್‌ನ ಸರ್ವೋಚ್ಚ ನಾಯಕ ಅಯೊತಲ್ಲಾ ಅಲಿ ಖಮೇನಿ ಅವರ ಹತ್ಯೆಗೂ ಕಾರಣವಾಯಿತು. ಇದಕ್ಕೆ ತಕ್ಕ ಪ್ರತೀಕಾರ ತೀರಿಸಿಕೊಳ್ಳಲು ಸಿಡಿದೆದ್ದಿರುವ ಇರಾನ್, ಇಸ್ರೇಲ್ ಮತ್ತು ಕೊಲ್ಲಿಯಲ್ಲಿರುವ ಯುಎಸ್ ಮಿಲಿಟರಿ ನೆಲೆಗಳು ಸೇರಿದಂತೆ ಅಮೆರಿಕದ ಮಿತ್ರ ರಾಷ್ಟ್ರಗಳ ಮೇಲೆ ಸರಣಿ ಕ್ಷಿಪಣಿ ಹಾಗೂ ಡ್ರೋನ್ ದಾಳಿಗಳನ್ನು ನಡೆಸುತ್ತಿದೆ.

'ವಯೋನ್'​ ವರದಿ ಪ್ರಕಾರ, ಪ್ರಸ್ತುತ, ದಾಳಿಗೆ ಪ್ರತಿದಾಳಿ ಎನ್ನುವಂತೆ ಸೇಡಿಗೆ ಸೇಡು ಎಂದು ನಿಂತಿರುವ ಇರಾನ್ ಮತ್ತು ಇಸ್ರೇಲ್​-ಅಮೆರಿಕ ಸದ್ಯ ಯುದ್ಧಕ್ಕೆಂದು ಇಟ್ಟಿರುವ ಹೆಜ್ಜೆಯನ್ನು ಯಾವುದೇ ಕಾರಣಕ್ಕೂ ಹಿಂದಿಡುವುದಿಲ್ಲ ಎಂದು ತಮ್ಮ ಬ್ರಹ್ಮಾಸ್ತ್ರಗಳ ಮೂಲಕ ಒತ್ತಿ ಹೇಳುತ್ತಿದೆ. ಈ ಯುದ್ಧದ ಪರಿಣಾಮದಿಂದ ಜಾಗತಿಕ ಮಟ್ಟದಲ್ಲಿ ಬಿಕ್ಕಟ್ಟು ಶುರುವಾಗಿದ್ದು, ತೈಲ ಮತ್ತು ಅನಿಲದಂತಹ ಹಲವು ಆಮದುಗಳಿಗೆ ದೊಡ್ಡ ಹೊಡೆತ ಬಿದ್ದಿದೆ. ಇದಕ್ಕೆ ಜ್ವಲಂತ ಸಾಕ್ಷಿ, ಇತ್ತೀಚೆಗೆ ಭಾರತದಲ್ಲಿ 60 ರೂ.ಗೇರಿದ ಎಲ್​ಪಿಜಿ ಸಿಲಿಂಡರ್​ ದರ.

ಇನ್ನು ಯುದ್ಧಕ್ಕೆ ಸಂಬಂಧಿಸಿದಂತೆ ಶ್ವೇತಭವನದಲ್ಲಿ ಮಾತನಾಡಿರುವ ಟ್ರಂಪ್​, ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರೊಂದಿಗಿನ ಮಾತುಕತೆಯಲ್ಲಿ ಪರಸ್ಪರ ನಿರ್ಧಾರದ ಬಳಿಕವೇ ಇರಾನ್ ಮೇಲಿನ ಸಮರವನ್ನು ನಾವು ಕೊನೆಗೊಳಿಸುವುದು ಎಂದಿದ್ದಾರೆ. ಪ್ರಸ್ತುತ, ಮಿಲಿಟರಿ ಹಸ್ತಕ್ಷೇಪಕ್ಕೂ ಮುನ್ನ, ಇರಾನ್ ಇಸ್ರೇಲ್ ಅನ್ನು ನಾಶಮಾಡುವ ಅಂಚಿನಲ್ಲಿತ್ತು ಎಂದು ಟ್ರಂಪ್ ಹೇಳಿದ್ದಾಗಿ 'ದಿ ಟೈಮ್ಸ್ ಆಫ್ ಇಸ್ರೇಲ್' ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.

ಇಸ್ರೇಲ್​ ಮತ್ತು ಅದರ ಸುತ್ತಲಿರುವ ಪ್ರದೇಶಗಳನ್ನು ಛಿದ್ರಗೊಳಿಸಲು ಇರಾನ್​ ಮುಂದಾಗಿತ್ತು. ಆದರೆ, ನಾವು ಜಂಟಿಯಾಗಿ, ಇಸ್ರೇಲ್ ಅನ್ನು​ ಹೊಡೆದುರಳಿಸಲು ಸಂಚು ರೂಪಿಸಿದ್ದ ರಾಷ್ಟ್ರವನ್ನೇ ಧ್ವಂಸ ಮಾಡಿದ್ದೇವೆ. ಸದ್ಯ, ನೆತನ್ಯಾಹು ಅವರೊಂದಿಗೆ ಮುಂದೇನು ಮಾಡಬೇಕು ಎಂಬುದನ್ನು ಚರ್ಚಿಸುತ್ತಿದ್ದೇವೆ. ಸರಿಯಾದ ಸಮಯ ನೋಡಿ ನಾನೇ ನಿರ್ಧಾರದ ಬಗ್ಗೆ ಹೇಳುತ್ತೇನೆ ಎಂದು ಟ್ರಂಪ್ ಹೇಳಿದ್ದಾರೆ,(ಏಜೆನ್ಸೀಸ್).