ಭಾರತದತ್ತ ಬರುತ್ತಿದ್ದ ಹಡಗಿನ ಮೇಲೆ ಟಾರ್ಪಿಡೊ ದಾಳಿ: ಉತ್ತರ ಪ್ರದೇಶ ಮೂಲದ ನಾವಿಕ ಸಾವು; 19 ಮಂದಿ ರಕ್ಷಣೆ! Indian Sailor

ಓಮನ್​: ಸಮುದ್ರ ಮಾರ್ಗವಾಗಿ ಭಾರತದತ್ತ ಪ್ರಯಾಣಿಸುತ್ತಿದ್ದ ಹಡಗೊಂದರ ಮೇಲೆ ನಡೆದ ಭೀಕರ ದಾಳಿಯಲ್ಲಿ ಉತ್ತರ ಪ್ರದೇಶ ಮೂಲದ ಭಾರತೀಯ ನಾವಿಕ (Indian Sailor) ಸೂರಜ್ ಯಾದವ್ ದಾರುಣವಾಗಿ ಮೃತಪಟ್ಟಿದ್ದಾರೆ. ಹಡಗಿನ ಮೇಲೆ ನಡೆದ ಈ ದಿಢೀರ್ ದಾಳಿಯು ನಾವಿಕರ ಕುಟುಂಬದಲ್ಲಿ ಮತ್ತು ಜಾಗತಿಕ ಸಾಗರ ವಲಯದಲ್ಲಿ ಭಾರೀ ಆತಂಕ ಮೂಡಿಸಿದೆ. 'ಫಾರ್ವರ್ಡ್ ಸೀಮೆನ್ಸ್ ಯೂನಿಯನ್ ಆಫ್ ಇಂಡಿಯಾ' (FSUI) ಈ ಕುರಿತು ಮಾಹಿತಿ ಹಂಚಿಕೊಂಡಿದ್ದು, ಮೃತ ಸೂರಜ್ ಯಾದವ್ ಈ ಹಡಗಿನಲ್ಲಿ 'ವೈಪರ್' ಆಗಿ ಕೆಲಸ ಮಾಡುತ್ತಿದ್ದರು ಎಂದು ತಿಳಿಸಿದೆ.

ಹಡಗಿನ ಮೇಲೆ ಟಾರ್ಪಿಡೊ ದಾಳಿ ನಡೆದದ್ದು ಹೇಗೆ?

FSUI ನೀಡಿರುವ ವಿವರಣೆ ಪ್ರಕಾರ, ಈ ಹಡಗಿನಲ್ಲಿ ಒಟ್ಟು 28 ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಿದ್ದರು. ಇದರಲ್ಲಿ ಸುಮಾರು 20 ಮಂದಿ ಭಾರತೀಯರೇ ಕೆಲಸಗಾರರಿದ್ದರು. ಹಡಗು ಭಾರತದ ಕಡೆಗೆ ಸಾಗುತ್ತಿದ್ದಾಗ ಹಠಾತ್ತನೆ ಎರಡು ಟಾರ್ಪಿಡೊಗಳು ಅಪ್ಪಳಿಸಿವೆ.

ಒಂದು ಟಾರ್ಪಿಡೊ 'ಸಿ-ಡೆಕ್' ವಸತಿ ಪ್ರದೇಶಕ್ಕೆ ಅಪ್ಪಳಿಸಿದರೆ, ಮತ್ತೊಂದು ಎಂಜಿನ್ ಕೊಠಡಿಯ ಸಮೀಪವಿರುವ ಹಡಗಿನ ಹೊರಕವಚಕ್ಕೆ ತೀವ್ರವಾಗಿ ಬಡಿದಿದೆ. ಈ ಭೀಕರ ಸ್ಫೋಟದಿಂದಾಗಿ ಹಡಗಿನಲ್ಲಿದ್ದ ಸಿಬ್ಬಂದಿ ತೀವ್ರ ಗಾಯಗೊಂಡಿದ್ದಾರೆ. ಘಟನೆಯ ನಂತರ ಹಡಗಿನಲ್ಲಿದ್ದ ಜೀವಂತ ಉಳಿದ ನಾವಿಕರನ್ನು ಕೂಡಲೇ ರಕ್ಷಿಸಿ, ಓಮನ್‌ಗೆ ಸುರಕ್ಷಿತವಾಗಿ ಸ್ಥಳಾಂತರಿಸಲಾಗಿದೆ. ದಾಳಿಯ ಬಳಿಕ ಹಡಗು ಜಖಂಗೊಂಡಿರುವ ದೃಶ್ಯಗಳ ವೀಡಿಯೋವನ್ನು ಕೂಡ ಎಫ್‌ಎಸ್‌ಯುಐ (FSUI) ಎಕ್ಸ್​ನಲ್ಲಿ ಹಂಚಿಕೊಂಡಿದೆ.

ಭಾರತೀಯ ರಾಯಭಾರ ಕಚೇರಿಯಿಂದ ಸ್ಪಷ್ಟನೆ

ಈ ದುರ್ಘಟನೆಯಲ್ಲಿ ಭಾರತೀಯ ನಾವಿಕನೊಬ್ಬ ಸಾವನ್ನಪ್ಪಿರುವ ಸುದ್ದಿಯನ್ನು ಮಸ್ಕತ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಅಧಿಕೃತವಾಗಿ ಖಚಿತಪಡಿಸಿದೆ. ಓಮನ್ ದೇಶದ ಅಧಿಕಾರಿಗಳೊಂದಿಗೆ ನಿರಂತರ ಸಂಪರ್ಕದಲ್ಲಿರುವ ರಾಯಭಾರ ಕಚೇರಿಯು, ಸಿಬ್ಬಂದಿಗಳ ಸುರಕ್ಷತೆ ಹಾಗೂ ಮೃತರ ಕುಟುಂಬಕ್ಕೆ ನೆರವು ನೀಡುವ ಕುರಿತು ಮಾತುಕತೆ ನಡೆಸುತ್ತಿದೆ.

ಅಲ್ಲದೆ, ಹಡಗಿನಲ್ಲಿ ಒಟ್ಟು 19 ಭಾರತೀಯ ಪ್ರಜೆಗಳಿದ್ದರು ಎಂದು ರಾಯಭಾರ ಕಚೇರಿ ತಿಳಿಸಿದ್ದು, ಎಫ್‌ಎಸ್‌ಯುಐ ನೀಡಿರುವ ಅಂಕಿ-ಅಂಶಕ್ಕೂ (20 ಭಾರತೀಯರು) ರಾಯಭಾರ ಕಚೇರಿಯ ವರದಿಗೂ ಸಣ್ಣ ವ್ಯತ್ಯಾಸವಿದೆ. ಮೃತ ನಾವಿಕನ ಕುಟುಂಬಕ್ಕೆ ಉದ್ಯೋಗ ನೇಮಕಾತಿ ಮತ್ತು ಏಜೆನ್ಸಿ ಮೂಲಕ ಸಿಗಬೇಕಾದ ಪರಿಹಾರ ಹಾಗೂ ಇಲಾಖಾ ನೆರವಿಗೆ ಸಂಪೂರ್ಣ ಸಮನ್ವಯ ಸಾಧಿಸಲಾಗುತ್ತಿದೆ ಎಂದು ತಿಳಿಸಲಾಗಿದೆ.

ನಾವಿಕರ ಸಂಘಟನೆಯಿಂದ ತೀವ್ರ ಆಕ್ರೋಶ

ಹೊರ್ಮುಜ್ ಜಲಸಂಧಿ ಪ್ರದೇಶದಲ್ಲಿ ಮತ್ತು ಸುತ್ತಮುತ್ತ ದಿನದಿಂದ ದಿನಕ್ಕೆ ಅಮಾಯಕ ನಾವಿಕರನ್ನು ಬಲಿ ತೆಗೆದುಕೊಳ್ಳಲಾಗುತ್ತಿದೆ ಎಂದು FSUI ತೀವ್ರ ಆಕ್ರೋಶ ಹೊರಹಾಕಿದೆ. ಕೇವಲ ಭರವಸೆಗಳಿಂದ ಯಾವುದೇ ಪ್ರಯೋಜನವಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿರುವ ಸಂಘಟನೆಯು, ಸಮುದ್ರದಲ್ಲಿ ಸಂಚರಿಸುವ ನಾವಿಕರಿಗೆ ತಕ್ಷಣದ ಭದ್ರತೆ, ಹೊಣೆಗಾರಿಕೆ ಹಾಗೂ ಸೂರಜ್ ಯಾದವ್ ಸೇರಿದಂತೆ ಅಪಾಯದಲ್ಲಿರುವ ಪ್ರತಿಯೊಬ್ಬ ಭಾರತೀಯ ನಾವಿಕನಿಗೂ ಸೂಕ್ತ ನ್ಯಾಯ ಒದಗಿಸಬೇಕೆಂದು ಬಲವಾಗಿ ಆಗ್ರಹಿಸಿದೆ, (ಏಜೆನ್ಸೀಸ್​).