ಇದು ಬಾಲಕಿಯರ ಹತ್ಯಾಕಾಂಡ: ಇರಾನ್ ಶಾಲೆ ಮೇಲಿನ ಕ್ಷಿಪಣಿ ದಾಳಿಯನ್ನು ಖಂಡಿಸಿದ ಜಾರ್ಜಿಯಾ ಮೆಲೋನಿ | Georgia Meloni

ಇಟಲಿ: ಮಧ್ಯಪ್ರಾಚ್ಯದಲ್ಲಿ ಭುಗಿಲೆದ್ದಿರುವ ಯುದ್ಧದ ಜ್ವಾಲೆ ಮುಗ್ಧ ಬಾಲಕಿಯರ ಪ್ರಾಣವನ್ನು ಬಲಿ ಪಡೆದಿದೆ. ದಕ್ಷಿಣ ಇರಾನ್‌ನ ಮಿನಾಬ್‌ ನಗರದಲ್ಲಿರುವ ಶಾಲೆಯೊಂದರ ಮೇಲೆ ನಡೆದ ಮಾರಕ ಕ್ಷಿಪಣಿ ದಾಳಿಯಲ್ಲಿ ಬರೋಬ್ಬರಿ 165ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದಾರೆ. ಈ ಅಮಾನವೀಯ ಕೃತ್ಯವನ್ನು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ (Georgia Meloni) ಬಾಲಕಿಯರ ಹತ್ಯಾಕಾಂಡ ಎಂದು ಕರೆದು ತೀವ್ರವಾಗಿ ಖಂಡಿಸಿದ್ದಾರೆ.

ಇಟಾಲಿಯನ್ ಸೆನೆಟ್‌ನಲ್ಲಿ ಮಾತನಾಡಿದ ಮೆಲೋನಿ, ದಕ್ಷಿಣ ಇರಾನ್‌ನ ಶಾಲೆಯಲ್ಲಿ ನಡೆದ ಈ ದಾಳಿ ಅತ್ಯಂತ ಕ್ರೂರವಾದುದು. ಚಿಕ್ಕ ವಯಸ್ಸಿನ ಅಮಾಯಕ ಹುಡುಗಿಯರು ಮೃತಪಟ್ಟಿರುವುದು ಇಡೀ ಜಗತ್ತನ್ನೇ ಬೆಚ್ಚಿಬೀಳಿಸಿದೆ. ಈ ದಾಳಿಯ ಹೊಣೆಗಾರರನ್ನು ತಕ್ಷಣವೇ ಗುರುತಿಸಿ, ಅವರಿಗೆ ಕಠಿಣ ಶಿಕ್ಷೆಯಾಗಬೇಕು, ಎಂದು ಒತ್ತಾಯಿಸಿದ್ದಾರೆ.

ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದ ಬಗ್ಗೆ ತಮ್ಮ ದೇಶದ ನಿಲುವನ್ನು ಸ್ಪಷ್ಟಪಡಿಸಿದ ಜಾರ್ಜಿಯಾ ಮೆಲೋನಿ, ಇಟಲಿ ಯುದ್ಧದಲ್ಲಿಲ್ಲ ಮತ್ತು ನಾವು ಯಾವುದೇ ಕಾರಣಕ್ಕೂ ಈ ಯುದ್ಧವನ್ನು ಪ್ರವೇಶಿಸಲು ಬಯಸುವುದಿಲ್ಲ, ಎಂದು ಖಡಕ್ಕಾಗಿ ಹೇಳಿದ್ದಾರೆ. ಬ್ರದರ್ಸ್ ಆಫ್ ಇಟಲಿ ಪಕ್ಷದ ನಾಯಕಿಯಾಗಿರುವ ಅವರು, ದೇಶದ ರಕ್ಷಣೆಯ ದೃಷ್ಟಿಯಿಂದ ಈ ನಿರ್ಧಾರವನ್ನು ಕೈಗೊಳ್ಳಲಾಗಿದೆ ಎಂದು ಹೇಳಿದ್ದಾರೆ.

ಯುದ್ಧದ ಪರಿಸ್ಥಿತಿಯನ್ನು ನಿಯಂತ್ರಿಸಲು ಯುರೋಪಿಯನ್ ನಾಯಕರೊಂದಿಗೆ ಮಾತುಕತೆ ನಡೆಸುತ್ತಿರುವುದಾಗಿ ತಿಳಿಸಿರುವ ಪ್ರಧಾನಿ ಮೆಲೋನಿ, ಸದ್ಯದ ಮಟ್ಟಿಗೆ ರಾಜತಾಂತ್ರಿಕ ಮಾತುಕತೆಗಳು ಫಲಕಾರಿಯಾಗುವ ಸಾಧ್ಯತೆ ಕಡಿಮೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಇರಾನ್ ನಿರಂತರವಾಗಿ ಪ್ರತೀಕಾರದ ದಾಳಿಗಳನ್ನು ಮುಂದುವರಿಸುತ್ತಿರುವಾಗ, ಶಾಂತಿ ಮಾತುಕತೆಗೆ ಮರಳುವುದು ಸದ್ಯಕ್ಕೆ ಅಸಾಧ್ಯ ಎಂದು ಅವರು ನುಡಿದಿದ್ದಾರೆ,(ಏಜನ್ಸೀಸ್​).