ಹಾರ್ಮುಜ್ ಜಲಸಂಧಿ ನಮ್ಮದು! ಇರಾನ್ ನೌಕಾಪಡೆಯ ಎಚ್ಚರಿಕೆ ಬೆನ್ನಲ್ಲೇ ನಡುಗಿದ ಜಾಗತಿಕ ಮಾರುಕಟ್ಟೆ! Strait Of Hormuz

ಬುಧವಾರದಂದು ಹೊರಡಿಸಿದ ಅಧಿಕೃತ ಹೇಳಿಕೆಯಲ್ಲಿ, ಇರಾನ್ ನೌಕಾಪಡೆಯ ಅಧಿಕಾರಿ ಮೊಹಮ್ಮದ್ ಅಕ್ಬರ್ಜಾದೆ, ಪ್ರಸ್ತುತ ಹಾರ್ಮುಜ್ ಜಲಸಂಧಿಯು ಇಸ್ಲಾಮಿಕ್ ರಿಪಬ್ಲಿಕ್ ನೌಕಾಪಡೆಯ ಸಂಪೂರ್ಣ ನಿಯಂತ್ರಣದಲ್ಲಿದೆ ಎಂದು ಘೋಷಿಸಿದ್ದಾರೆ. ಈ ಜಲಸಂಧಿಯ ಮೂಲಕ ಹಾದುಹೋಗಲು ಪ್ರಯತ್ನಿಸುವ ಯಾವುದೇ ಹಡಗುಗಳು ಇರಾನ್‌ನ ಕ್ಷಿಪಣಿಗಳು ಅಥವಾ ಡ್ರೋನ್ ದಾಳಿಗೆ ಒಳಗಾಗುವ ಅಪಾಯವಿದೆ ಎಂದು ಖಡಕ್ ಎಚ್ಚರಿಕೆ ನೀಡಿದ್ದಾರೆ. ಇದು ಜಗತ್ತಿನಾದ್ಯಂತ ಸಂಚಲನ ಮೂಡಿಸಿದೆ, ಏಕೆಂದರೆ ವಿಶ್ವದ ಒಟ್ಟು ತೈಲ ವ್ಯಾಪಾರದ ಶೇ. 20 ಕ್ಕಿಂತ ಹೆಚ್ಚು ಭಾಗ ಈ ಕಿರಿದಾದ ಜಲಸಂಧಿಯ ಮೂಲಕವೇ ಸಾಗುತ್ತದೆ.

ಇರಾನ್‌ನ ಈ ಉದ್ಧಟತನಕ್ಕೆ ಪ್ರತಿಕ್ರಿಯಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, 'ಟ್ರುತ್ ಸೋಶಿಯಲ್' ಮೂಲಕ ಅಮೆರಿಕದ ಮಿಲಿಟರಿ ಶಕ್ತಿಯ ಪ್ರದರ್ಶನಕ್ಕೆ ನಾಂದಿ ಹಾಡಿದ್ದಾರೆ.

ನೌಕಾಪಡೆಯ ಬೆಂಗಾವಲು: ಅರಬ್ ಗಲ್ಫ್ ಮೂಲಕ ಹಾದುಹೋಗುವ ತೈಲ ಟ್ಯಾಂಕರ್‌ಗಳಿಗೆ ಅಮೆರಿಕನ್ ನೌಕಾಪಡೆಯು ರಕ್ಷಣೆ ನೀಡಲಿದೆ. ಅಗತ್ಯ ಬಿದ್ದರೆ ಯುದ್ಧ ವಿಮಾನಗಳು ಮತ್ತು ಹಡಗುಗಳು ಟ್ಯಾಂಕರ್‌ಗಳನ್ನು ಬೆಂಗಾವಲಾಗಿ ಕರೆದೊಯ್ಯಲಿವೆ.

ವಿಮಾ ರಕ್ಷಣೆ: ಅಂತಾರಾಷ್ಟ್ರೀಯ ಹಡಗು ಕಂಪನಿಗಳಿಗೆ ಆರ್ಥಿಕ ಭದ್ರತೆ ನೀಡಲು ಅಮೆರಿಕದ ಡೆವಲಪ್‌ಮೆಂಟ್ ಫೈನಾನ್ಸ್ ಕಾರ್ಪೊರೇಶನ್ ಮೂಲಕ ಕಡಿಮೆ ದರದಲ್ಲಿ ರಾಜಕೀಯ ಅಪಾಯ ವಿಮೆ ನೀಡಲು ಟ್ರಂಪ್ ಆದೇಶಿಸಿದ್ದಾರೆ.

ಅಮೆರಿಕವು ಜಗತ್ತಿಗೆ ಇಂಧನದ ಮುಕ್ತ ಹರಿವನ್ನು ಖಚಿತಪಡಿಸುತ್ತದೆ. ನಮ್ಮ ಆರ್ಥಿಕ ಮತ್ತು ಮಿಲಿಟರಿ ಶಕ್ತಿಯು ಭೂಮಿಯಲ್ಲೇ ಶ್ರೇಷ್ಠವಾದುದು ಎಂದು ಟ್ರಂಪ್ ಗುಡುಗಿದ್ದಾರೆ.

ದಾಳಿಯ ತೀವ್ರತೆಯನ್ನು ವಿವರಿಸುವ ಸುದ್ದಿಯೆಂದರೆ, ಹಿಂದೂ ಮಹಾಸಾಗರದಲ್ಲಿ ಅಮೆರಿಕದ ವಿನಾಶಕಾರಿ ಯುದ್ಧನೌಕೆ ಮೇಲೆ ಇರಾನ್ ದಾಳಿ ನಡೆಸಿದೆ. ಇರಾನ್‌ನ ಅತ್ಯಾಧುನಿಕ 'ಘದರ್-380' ಬ್ಯಾಲಿಸ್ಟಿಕ್ ಕ್ಷಿಪಣಿ ಮತ್ತು 'ತಲೈಹ್ ಕ್ರೂಸ್ ಕ್ಷಿಪಣಿಗಳನ್ನು ಬಳಸಿ ಈ ದಾಳಿ ನಡೆಸಲಾಗಿದೆ. ಅಮೆರಿಕದ ಯುದ್ಧನೌಕೆಯು ಟ್ಯಾಂಕರ್‌ನಿಂದ ಇಂಧನ ತುಂಬಿಸಿಕೊಳ್ಳುತ್ತಿದ್ದ ಸಂದರ್ಭದಲ್ಲೇ ಈ ದಾಳಿ ನಡೆದಿದ್ದು, ಎರಡೂ ಹಡಗುಗಳಲ್ಲಿ ಭಾರಿ ಬೆಂಕಿ ಕಾಣಿಸಿಕೊಂಡಿದೆ ಎಂದು IRGC ಹಕ್ಕು ಸಾಧಿಸಿದೆ.

ಘದರ್-380: 2,000 ಕಿ.ಮೀ ವ್ಯಾಪ್ತಿಯ ಮಧ್ಯಮ ವ್ಯಾಪ್ತಿಯ ಕ್ಷಿಪಣಿ.

ತಲೈಹ್: 1,000 ಕಿ.ಮೀ ವ್ಯಾಪ್ತಿಯ ಸ್ಮಾರ್ಟ್ ಕ್ಷಿಪಣಿ, ಇದು ಅರ್ಧ ಹಾದಿಯಲ್ಲಿ ತನ್ನ ಗುರಿಯನ್ನು ಬದಲಿಸುವ ಸಾಮರ್ಥ್ಯ ಹೊಂದಿದೆ.

ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ದಾಳಿಗೆ ಪ್ರತಿಯಾಗಿ ಇರಾನ್ ಈ 'ಆಪರೇಷನ್ ಟ್ರೂ ಪ್ರಾಮಿಸ್ 4 ಅನ್ನು ಆರಂಭಿಸಿದೆ. ಇಸ್ರೇಲ್‌ನ ಆಕ್ರಮಿತ ಪ್ರದೇಶಗಳ ಒಳಗಿನ ಆಯಕಟ್ಟಿನ ಸ್ಥಳಗಳು ಮಾತ್ರವಲ್ಲದೆ, ಕತಾರ್, ಯುಎಇ ಮತ್ತು ಕುವೈತ್‌ನಲ್ಲಿರುವ ಅಮೆರಿಕದ ಹಿತಾಸಕ್ತಿಗಳ ಮೇಲೆ ಸರಣಿ ದಾಳಿಗಳನ್ನು ನಡೆಸಲಾಗುತ್ತಿದೆ ಎಂದು ಇರಾನ್ ಹೇಳಿಕೊಂಡಿದೆ.

ಹಾರ್ಮುಜ್ ಜಲಸಂಧಿ ಬಂದ್ ಆದರೆ ಭಾರತ ಸೇರಿದಂತೆ ಏಷ್ಯಾದ ಹಲವು ದೇಶಗಳಿಗೆ ತೈಲ ಪೂರೈಕೆ ಸ್ಥಗಿತಗೊಳ್ಳಬಹುದು. ಇದು ಪೆಟ್ರೋಲ್, ಡೀಸೆಲ್ ಬೆಲೆಗಳಲ್ಲಿ ಭಾರಿ ಏರಿಕೆಗೆ ಕಾರಣವಾಗುವುದಲ್ಲದೆ, ಜಾಗತಿಕ ಆರ್ಥಿಕ ಹಿಂಜರಿತಕ್ಕೂ ನಾಂದಿ ಹಾಡಬಹುದು,(ಏಜೆನ್ಸೀಸ್).