ಮಿನಾಬ್ ಶಾಲೆಯ ಮೇಲೆ ಬಿದ್ದ ಆ ಅಮೆರಿಕದ ಮೃತ್ಯು ಕ್ಷಿಪಣಿಯ ಅಸಲಿ ಮುಖವಾಡ ಬಯಲು! ಸ್ಯಾಟಲೈಟ್ ಚಿತ್ರಗಳಲ್ಲಿ ಕಂಡ ಆ ಭೀಕರ ಸತ್ಯವೇನು..? Tomahawk Missile

ಇರಾನ್‌ನ ಮೆಹರ್ ನ್ಯೂಸ್ ಏಜೆನ್ಸಿ ಬಿಡುಗಡೆ ಮಾಡಿದ ವಿಡಿಯೋವೊಂದನ್ನು ತನಿಖಾ ಸಂಸ್ಥೆ ಬೆಲ್ಲಿಂಗ್‌ಕ್ಯಾಟ್ ಕೂಲಂಕಷವಾಗಿ ಪರಿಶೀಲಿಸಿದೆ. ಈ ವಿಡಿಯೋದಲ್ಲಿ ಅಮೆರಿಕ ನಿರ್ಮಿತ ಟೊಮಾಹಾಕ್ ಕ್ರೂಸ್ ಕ್ಷಿಪಣಿಯೊಂದು ಶಜರೆ ತಯ್ಯೆಬಾ ಪ್ರಾಥಮಿಕ ಶಾಲೆಯ ಪಕ್ಕದಲ್ಲೇ ಇರುವ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ ನೌಕಾ ನೆಲೆಯ ಮೇಲೆ ಅಪ್ಪಳಿಸುತ್ತಿರುವುದು ಸ್ಪಷ್ಟವಾಗಿ ಕಂಡಿದೆ.

ಮಾರ್ಚ್ 9ರಂದು ಫ್ಲೋರಿಡಾದಲ್ಲಿ ಪತ್ರಿಕಾಗೋಷ್ಠಿ ನಡೆಸಿದ ಡೊನಾಲ್ಡ್ ಟ್ರಂಪ್, ಅಮೆರಿಕದ ಮೇಲಿನ ಆರೋಪಗಳನ್ನು ತಳ್ಳಿಹಾಕಿದರು. ಆದರೆ, ಅವರ ಸಮರ್ಥನೆ ತಜ್ಞರ ಹುಬ್ಬೇರಿಸುವಂತೆ ಮಾಡಿದೆ.

ಇರಾನ್ ಹತ್ತಿರವೂ ಟೊಮಾಹಾಕ್ ಇದೆ: ಟ್ರಂಪ್ ಮಾತನಾಡಿ, ಟೊಮಾಹಾಕ್ ಕ್ಷಿಪಣಿಯನ್ನು ಇತರ ದೇಶಗಳೂ ಬಳಸುತ್ತವೆ. ಇರಾನ್ ಹತ್ತಿರವೂ ಕೆಲವು ಟೊಮಾಹಾಕ್ ಕ್ಷಿಪಣಿಗಳಿವೆ. ಅವರು ತಾವೇ ತಮ್ಮ ಶಾಲೆಯ ಮೇಲೆ ದಾಳಿ ಮಾಡಿಕೊಂಡಿರಬಹುದು ಎಂದು ವಾದಿಸಿದ್ದಾರೆ.

ಇರಾನ್ ಶಸ್ತ್ರಾಸ್ತ್ರಗಳು ನಿಖರವಲ್ಲ: ಈ ಮೊದಲೂ ಟ್ರಂಪ್ ಅವರು, ಇರಾನ್‌ನ ಶಸ್ತ್ರಾಸ್ತ್ರಗಳು ತೀರಾ ಕಳಪೆಯಾಗಿದ್ದು, ಗುರಿ ತಪ್ಪಿ ತಮ್ಮದೇ ಶಾಲೆಯ ಮೇಲೆ ಬಿದ್ದಿವೆ ಎಂದು ಹೇಳಿದ್ದರು.

ಶಸ್ತ್ರಾಸ್ತ್ರ ತಜ್ಞರು ಮತ್ತು ರಕ್ಷಣಾ ವಿಶ್ಲೇಷಕರು ಟ್ರಂಪ್ ಅವರ ಹೇಳಿಕೆಯನ್ನು ಅಲ್ಲಗಳೆದಿದ್ದಾರೆ. ವಾಸ್ತವ ಸ್ಥಿತಿ ಹೀಗಿದೆ.

ತಯಾರಕರು: ಟೊಮಾಹಾಕ್ ಕ್ಷಿಪಣಿಯನ್ನು ಅಮೆರಿಕದ 'RTX ಕಾರ್ಪೊರೇಷನ್ ತಯಾರಿಸುತ್ತದೆ.

ಬಳಕೆದಾರರು: ಇದನ್ನು ಪ್ರಮುಖವಾಗಿ ಅಮೆರಿಕದ ನೌಕಾಪಡೆ ಮತ್ತು ಬ್ರಿಟನ್ ಬಳಸುತ್ತವೆ. ಇತ್ತೀಚೆಗೆ ಆಸ್ಟ್ರೇಲಿಯಾ ಮತ್ತು ಜಪಾನ್‌ಗೆ ಮಾತ್ರ ಇದನ್ನು ಮಾರಾಟ ಮಾಡಲಾಗಿದೆ.

ಇರಾನ್ ಹತ್ತಿರ ಇದೆಯೇ: ಇಲ್ಲ. ಇರಾನ್ ಹತ್ತಿರ ಟೊಮಾಹಾಕ್ ಕ್ಷಿಪಣಿಗಳಿಲ್ಲ. ಇರಾನ್ ತನ್ನದೇ ಆದ ಸೌಮಾರ್ ಕ್ಷಿಪಣಿಗಳನ್ನು ಹೊಂದಿದೆ, ಆದರೆ ವಿಡಿಯೋದಲ್ಲಿರುವುದು ಸೌಮಾರ್ ಅಲ್ಲ ಎಂಬುದು ಸಾಬೀತಾಗಿದೆ. ಸೌಮಾರ್ ಕ್ಷಿಪಣಿಯ ಇಂಜಿನ್ ವಿನ್ಯಾಸವೇ ಬೇರೆ ಇರುತ್ತದೆ.

ಫೆಬ್ರವರಿ 28ರಂದು ಯುದ್ಧದ ಆರಂಭಿಕ ಹಂತದಲ್ಲಿ ಅಮೆರಿಕದ ನೌಕಾಪಡೆಯು ನೂರಾರು ಟೊಮಾಹಾಕ್ ಕ್ಷಿಪಣಿಗಳನ್ನು ಇರಾನ್ ಮಿಲಿಟರಿ ನೆಲೆಗಳ ಮೇಲೆ ಹಾರಿಸಿತ್ತು. ಈ ಕ್ಷಿಪಣಿಗಳು ಸುಮಾರು 1,600 ಕಿಲೋಮೀಟರ್ ದೂರದ ಗುರಿಯನ್ನು ನಿಖರವಾಗಿ ಹೊಡೆಯಬಲ್ಲವು. ಮಿನಾಬ್ ಶಾಲೆಯ ಮೇಲೆ ನಡೆದ ದಾಳಿಯು ಅಮೆರಿಕದ ಮಿಲಿಟರಿ ಕಾರ್ಯಾಚರಣೆಯ ಭಾಗವಾಗಿತ್ತು ಎಂಬುದಕ್ಕೆ ಪೂರಕ ಸಾಕ್ಷ್ಯಗಳು ಲಭ್ಯವಿವೆ.

ಅಮೆರಿಕದ ಮಿಲಿಟರಿ ಈಗ ಈ ಘಟನೆಯ ಬಗ್ಗೆ ಆಂತರಿಕ ತನಿಖೆ ನಡೆಸುತ್ತಿರುವುದಾಗಿ ತಿಳಿಸಿದೆ. ಆದರೆ 168 ಮಕ್ಕಳ ಸಾವಿಗೆ ಯಾರು ಹೊಣೆ ಎಂಬ ಪ್ರಶ್ನೆ ಇಡೀ ಜಗತ್ತನ್ನು ಕಾಡುತ್ತಿದೆ,(ಏಜೆನ್ಸೀಸ್).