ರಣಾಂಗಣವಾದ ಮಧ್ಯಪ್ರಾಚ್ಯ: ಅಮೆರಿಕಕ್ಕೆ ಇರಾನ್ ಸವಾಲು! ಮಾತುಕತೆಗೆ ಜಾಗವಿಲ್ಲ, ಯುದ್ಧವೊಂದೇ ದಾರಿ ಎಂದ ಇಸ್ಲಾಮಿಕ್ ರಾಷ್ಟ್ರ! Iran challenges America

ಇರಾನ್‌ನ ನೂತನ ಸರ್ವೋಚ್ಚ ನಾಯಕ ಆಯತೊಲ್ಲಾ ಮೊಜ್ತಬಾ ಖಮೇನಿಯ ಆಪ್ತ ಸಲಹೆಗಾರರಾದ ಕಮಲ್ ಖರಾಜಿ ಮಾತನಾಡಿ, ಅಮೆರಿಕದ ಜೊತೆ ಇನ್ನು ಮುಂದೆ ಯಾವುದೇ ರೀತಿಯ ಮಾತುಕತೆ ಅಥವಾ ರಾಜತಾಂತ್ರಿಕತೆಗೆ ಅವಕಾಶವಿಲ್ಲ. ಇರಾನ್ ಸೇನೆಯು ದೀರ್ಘಕಾಲದ ಯುದ್ಧಕ್ಕೆ ಸಂಪೂರ್ಣವಾಗಿ ಸಜ್ಜಾಗಿದೆ ಎಂದು ಗುಡುಗಿದ್ದಾರೆ. ಇತ್ತೀಚೆಗಷ್ಟೇ ತನ್ನ ತಂದೆಯ ನಿಧನದ ನಂತರ ಅಧಿಕಾರ ವಹಿಸಿಕೊಂಡ ಮೊಜ್ತಬಾ ಖಮೇನಿ ಅವರ ಕಠಿಣ ನಿಲುವು, ಇರಾನ್ ಹಿಂದೆ ಸರಿಯುವ ಲಕ್ಷಣಗಳಿಲ್ಲ ಎಂಬುದನ್ನು ಸ್ಪಷ್ಟಪಡಿಸಿದೆ.

ಮತ್ತೊಂದೆಡೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ಯುದ್ಧವು ಬಹಳ ದಿನ ನಡೆಯುವುದಿಲ್ಲ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಮಿಯಾಮಿಯ ತಮ್ಮ ಗಾಲ್ಫ್ ಕ್ಲಬ್‌ನಲ್ಲಿ ರಿಪಬ್ಲಿಕನ್ ಶಾಸಕರನ್ನು ಉದ್ದೇಶಿಸಿ ಮಾತನಾಡಿದ ಟ್ರಂಪ್​, ನಾವು ಕೆಲವು ದುಷ್ಟ ಶಕ್ತಿಗಳನ್ನು ತೊಡೆದುಹಾಕಲು ಮಧ್ಯಪ್ರಾಚ್ಯಕ್ಕೆ ಒಂದು ಸಣ್ಣ ವಿಹಾರಕ್ಕೆ ತೆರಳಿದ್ದೇವೆ. ಇದು ಅಲ್ಪಾವಧಿಯ ಕಾರ್ಯಾಚರಣೆಯಾಗಲಿದೆ ಎಂದಿದ್ದಾರೆ.

ಆದರೆ, ಇದಾದ ಕೆಲವೇ ಗಂಟೆಗಳಲ್ಲಿ ತಮ್ಮ ಸಾಮಾಜಿಕ ಮಾಧ್ಯಮದಲ್ಲಿ ಮತ್ತಷ್ಟು ಆಕ್ರಮಣಕಾರಿ ಪೋಸ್ಟ್ ಹಾಕಿರುವ ಟ್ರಂಪ್, ಒಂದು ವೇಳೆ ಇರಾನ್ ಏನಾದರೂ ಹಾರ್ಮುಜ್ ಜಲಸಂಧಿಯ ಮೂಲಕ ತೈಲ ಸಂಚಾರಕ್ಕೆ ಅಡ್ಡಿಪಡಿಸಿದರೆ, ಇದುವರೆಗೆ ಅವರು ಅನುಭವಿಸಿರುವುದಕ್ಕಿಂತ 20 ಪಟ್ಟು ಹೆಚ್ಚು ಭೀಕರವಾದ ದಾಳಿಯನ್ನು ಅಮೆರಿಕ ಮಾಡಲಿದೆ ಎಂದು ಎಚ್ಚರಿಸಿದ್ದಾರೆ.

ಯುದ್ಧವು ಎರಡನೇ ವಾರಕ್ಕೆ ಕಾಲಿಡುತ್ತಿದ್ದಂತೆ ಜಾಗತಿಕ ತೈಲ ಬೆಲೆಗಳಲ್ಲಿ ಭಾರೀ ಏರಿಳಿತ ಕಂಡುಬರುತ್ತಿದೆ. ಇರಾನ್‌ನಲ್ಲಿ ಮೊಜ್ತಬಾ ಖಮೇನಿ ಅಧಿಕಾರಕ್ಕೆ ಬಂದ ಬೆನ್ನಲ್ಲೇ ತೈಲ ಬೆಲೆಗಳು 2022ರ ನಂತರದ ಗರಿಷ್ಠ ಮಟ್ಟಕ್ಕೆ ಏರಿಕೆಯಾಗಿದ್ದವು. ಇರಾನ್ ಯುದ್ಧವನ್ನು ಎದುರಿಸಲು ಹಠಕ್ಕೆ ಬಿದ್ದಿದೆ ಎಂಬ ಹೂಡಿಕೆದಾರರ ಭಯವೇ ಇದಕ್ಕೆ ಕಾರಣವಾಗಿತ್ತು. ಆದರೆ, ಟ್ರಂಪ್ ಅವರ ಅಲ್ಪಾವಧಿ ಯುದ್ಧದ ಹೇಳಿಕೆಯ ನಂತರ ಮಾರುಕಟ್ಟೆಯಲ್ಲಿ ಸ್ವಲ್ಪ ಮಟ್ಟಿನ ಚೇತರಿಕೆ ಕಂಡುಬಂದಿದೆ.

ಸಾವು-ನೋವು ಮತ್ತು ಆಸ್ತಿಪಾಸ್ತಿ ಹಾನಿ: ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ವೈಮಾನಿಕ ದಾಳಿಗಳಿಂದ ಇರಾನ್‌ನ ಮಿಲಿಟರಿ ನೆಲೆಗಳು, ಸರ್ಕಾರಿ ಕಟ್ಟಡಗಳು, ತೈಲ ಮತ್ತು ನೀರಿನ ಘಟಕಗಳು ಧ್ವಂಸಗೊಂಡಿವೆ. ಕನಿಷ್ಠ ಒಂದು ಶಾಲೆಯ ಮೇಲೆಯೂ ಬಾಂಬ್ ಬಿದ್ದಿದ್ದು, ಹಾನಿಯ ಬಗ್ಗೆ ವರದಿಗಳಾಗಿವೆ.

ವಲಸೆ: ಯುದ್ಧದ ತೀವ್ರತೆಯಿಂದಾಗಿ ಲಕ್ಷಾಂತರ ಜನರು ಸುರಕ್ಷಿತ ಸ್ಥಳಗಳಿಗಾಗಿ ಪರದಾಡುತ್ತಿದ್ದಾರೆ. ವಿದೇಶಿ ಉದ್ಯಮಿಗಳು ಮತ್ತು ಕಾರ್ಮಿಕರು ಅಲ್ಲಿನ ವ್ಯವಹಾರ ಕೇಂದ್ರಗಳನ್ನು ತೊರೆದು ಓಡಿಹೋಗುತ್ತಿದ್ದಾರೆ.

ಇಂಧನ ಬಿಕ್ಕಟ್ಟು: ಯುದ್ಧದ ಕಾರಣದಿಂದಾಗಿ ವಿಶ್ವ ಮಾರುಕಟ್ಟೆಗೆ ಪೂರೈಕೆಯಾಗುತ್ತಿದ್ದ ತೈಲ ಮತ್ತು ಅನಿಲದ ಪ್ರಮಾಣ ಕುಸಿದಿದೆ. ಇದು ಅಮೆರಿಕದಾದ್ಯಂತ ಇಂಧನ ದರ ಏರಿಕೆಗೆ ಕಾರಣವಾಗಿದ್ದು, ಜನಸಾಮಾನ್ಯರ ಮೇಲೆ ಆರ್ಥಿಕ ಹೊರೆ ಹೆಚ್ಚಿಸಿದೆ.

ಹಾರ್ಮುಜ್ ಜಲಸಂಧಿಯು ಜಾಗತಿಕ ತೈಲ ಪೂರೈಕೆಯ ಜೀವನಾಡಿಯಾಗಿದೆ. ಇರಾನ್ ಈ ಮಾರ್ಗವನ್ನು ಮುಚ್ಚಲು ಪ್ರಯತ್ನಿಸಿದರೆ, ಅಮೆರಿಕವು ತನ್ನ ಪೂರ್ಣ ಶಕ್ತಿಯನ್ನು ಬಳಸಿ ಪ್ರತಿದಾಳಿ ನಡೆಸುವ ಸಾಧ್ಯತೆಯಿದೆ. ಇರಾನ್‌ನ ಈ ದೀರ್ಘಕಾಲದ ಯುದ್ಧದ ಸಿದ್ಧತೆ ಮತ್ತು ಅಮೆರಿಕದ ಸಣ್ಣ ಪ್ರವಾಸದಂತಹ ಹೇಳಿಕೆಗಳ ನಡುವೆ ವಿಶ್ವವು ಮೂರನೇ ಮಹಾಯುದ್ಧದ ಆತಂಕದಲ್ಲಿದೆ,(ಏಜೆನ್ಸೀಸ್).