ಶಾಂತಿಯ ಕೊನೆಯ ಹಾದಿಯೂ ಬಂದ್! ಅಮೆರಿಕದ ಮುಖಕ್ಕೆ ಹೊಡೆದಂತೆ ಮಾತುಕತೆ ನಿಲ್ಲಿಸಿದ ಇರಾನ್! No Direct Talks with US

ಟ್ರಂಪ್ ಅವರ ಡೆಡ್‌ಲೈನ್ ಮುಗಿಯಲು ಕೇವಲ ಕೆಲವೇ ಗಂಟೆಗಳು ಬಾಕಿ ಇರುವಾಗ ಇರಾನ್ ತೆಗೆದುಕೊಂಡ ಈ ನಿರ್ಧಾರವು ಜಾಗತಿಕ ರಾಜತಾಂತ್ರಿಕ ವಲಯದಲ್ಲಿ ಆತಂಕ ಮೂಡಿಸಿದೆ. ಮಧ್ಯಪ್ರಾಚ್ಯದ ಅಧಿಕಾರಿಗಳ ಪ್ರಕಾರ, ಇರಾನ್ ಅಮೆರಿಕದೊಂದಿಗೆ ನೇರವಾಗಿ ಮಾತನಾಡುವುದನ್ನು ನಿಲ್ಲಿಸಿದೆ. ಆದರೆ, ಕದನ ವಿರಾಮಕ್ಕಾಗಿ ಪ್ರಯತ್ನಿಸುತ್ತಿರುವ ಮಧ್ಯಸ್ಥಗಾರರ ಮೂಲಕ ಪರೋಕ್ಷ ಮಾತುಕತೆಗಳು ಇನ್ನು ಮುಂದುವರಿದಿವೆ. ಟ್ರಂಪ್ ಅವರ ಉಗ್ರ ರೂಪದ ಎಚ್ಚರಿಕೆಗೆ ಟೆಹ್ರಾನ್ ನೀಡಿದ ಮೊದಲ ದೊಡ್ಡ ಡಿಪ್ಲೊಮ್ಯಾಟಿಕ್ ಏಟು ಇದಾಗಿದೆ.

ಡೊನಾಲ್ಡ್ ಟ್ರಂಪ್ ಅವರು ತಮ್ಮ 'ಟ್ರುತ್ ಸೋಶಿಯಲ್' ಖಾತೆಯಲ್ಲಿ ಇರಾನ್ ವಿರುದ್ಧ ಅತ್ಯಂತ ಕಠಿಣ ಪದಗಳನ್ನು ಬಳಸಿದ್ದರು. ಹೋರ್ಮುಜ್ ಜಲಸಂಧಿಯನ್ನು ಮುಕ್ತಗೊಳಿಸದಿದ್ದರೆ ಇರಾನ್‌ನ ಇಡೀ ನಾಗರಿಕತೆಯೇ ಇಂದು ರಾತ್ರಿ ಅಂತ್ಯವಾಗಲಿದೆ. ಅದು ಮತ್ತೆಂದೂ ಮರಳಿ ಬರುವುದಿಲ್ಲ ಎಂದು ಎಚ್ಚರಿಸಿದ್ದರು. ಇರಾನ್‌ನ ವಿದ್ಯುತ್ ಸ್ಥಾವರಗಳು ಮತ್ತು ಸೇತುವೆಗಳನ್ನು ಗುರಿಯಾಗಿಸಿಕೊಂಡು ಬೃಹತ್ ಬಾಂಬ್ ದಾಳಿ ನಡೆಸುವ ಸಂಚನ್ನು ಟ್ರಂಪ್ ಬಹಿರಂಗಪಡಿಸಿದ್ದಾರೆ. ಇದು ವಿಶ್ವ ಇತಿಹಾಸದ ಅತ್ಯಂತ ಪ್ರಮುಖ ತಿರುವು ಎಂದು ಬಣ್ಣಿಸಿದ್ದಾರೆ.

ಇರಾನ್‌ನ ಕ್ರಾಂತಿಕಾರಿ ಸೈನ್ಯ (IRGC) ಅಮೆರಿಕದ ಈ ಬೆದರಿಕೆಗೆ ಮಣಿಯುವ ಸೂಚನೆ ನೀಡಿಲ್ಲ. ಒಂದು ವೇಳೆ ಅಮೆರಿಕವು ನಮ್ಮ ನಾಗರಿಕ ಮೂಲಸೌಕರ್ಯಗಳ ಮೇಲೆ ದಾಳಿ ನಡೆಸಿದರೆ, ನಾವು ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರಗಳ ತೈಲ ಮತ್ತು ಅನಿಲ ಕೇಂದ್ರಗಳ ಮೇಲೆ ಭೀಕರ ದಾಳಿ ನಡೆಸುತ್ತೇವೆ ಎಂದು ಐಆರ್‌ಜಿಸಿ ಎಚ್ಚರಿಸಿದೆ. ಅಮೆರಿಕದ ನಾಯಕತ್ವವು ಇರಾನ್‌ನ ಮಿಲಿಟರಿ ಸಾಮರ್ಥ್ಯವನ್ನು ಕಡೆಗಣಿಸುತ್ತಿದೆ ಎಂದು ಹೇಳಿರುವ ಐಆರ್‌ಜಿಸಿ, ಈ ಯುದ್ಧವು ದೀರ್ಘಾವಧಿಯ ಪರಿಣಾಮಗಳನ್ನು ಬೀರಲಿದೆ ಎಂದು ಎಚ್ಚರಿಸಿದೆ.

ಈಗಾಗಲೇ ಇರಾನ್‌ನ ಪ್ರಮುಖ ತೈಲ ಕೇಂದ್ರವಾದ ಖಾರ್ಗ್ ದ್ವೀಪದ ಬಳಿ ಅಮೆರಿಕದ ಬಿ-2 ಸ್ಟೆಲ್ತ್ ಬಾಂಬರ್‌ಗಳು ಮತ್ತು ಯುದ್ಧ ವಿಮಾನಗಳು ಹಾರಾಟ ನಡೆಸಿರುವ ವರದಿಗಳಿವೆ. ಆಪರೇಷನ್ ಎಪಿಕ್ ಫ್ಯೂರಿ ಭಾಗವಾಗಿ ಅಮೆರಿಕ ತನ್ನ ವಾಯುಪಡೆಯನ್ನು ಸನ್ನದ್ಧಗೊಳಿಸಿದೆ. ಇರಾನ್‌ನ ಸಾರಿಗೆ ಮತ್ತು ಸಂವಹನ ವ್ಯವಸ್ಥೆಯನ್ನು ಕತ್ತರಿಸಲು ಸೇತುವೆಗಳ ಮೇಲೆ ಈಗಾಗಲೇ ಕೆಲವು ಕ್ಷಿಪಣಿ ದಾಳಿಗಳು ನಡೆದಿವೆ ಎನ್ನಲಾಗುತ್ತಿದೆ.

ಪಾಕಿಸ್ತಾನ, ಈಜಿಪ್ಟ್ ಮತ್ತು ಟರ್ಕಿ ದೇಶಗಳು ಸಂಧಾನಕ್ಕೆ ಪ್ರಯತ್ನಿಸುತ್ತಿದ್ದರೂ, ಟ್ರಂಪ್ ಅವರ ಸರ್ವನಾಶದ ಎಚ್ಚರಿಕೆಯು ಇರಾನ್ ಅನ್ನು ಕೆರಳಿಸಿದೆ. ಇರಾನ್ ಅಧ್ಯಕ್ಷ ಪೆಜೆಶ್ಕಿಯಾನ್ ಅವರು 1.4 ಕೋಟಿ ಜನರು ಬಲಿದಾನಕ್ಕೆ ಸಿದ್ಧರಿದ್ದಾರೆ ಎಂದು ಹೇಳುವ ಮೂಲಕ ಯುದ್ಧಕ್ಕೆ ತಯಾರಾಗಿರುವ ಸಂದೇಶ ನೀಡಿದ್ದಾರೆ. ನೇರ ಮಾತುಕತೆ ಸ್ಥಗಿತಗೊಂಡಿರುವುದು ಯುದ್ಧವನ್ನು ತಡೆಯುವ ಕೊನೆಯ ಅವಕಾಶಗಳೂ ಕೈತಪ್ಪುತ್ತಿವೆ ಎಂಬುದನ್ನು ಸೂಚಿಸುತ್ತಿದೆ.

ವಾಷಿಂಗ್‌ಟನ್ ಕಾಲಮಾನ ರಾತ್ರಿ 8 ಗಂಟೆ ಇಡೀ ಜಗತ್ತಿಗೆ ನಿರ್ಣಾಯಕವಾಗಲಿದೆ. ಇರಾನ್ ತನ್ನ ಪಟ್ಟು ಸಡಿಲಿಸುತ್ತದೆಯೇ ಅಥವಾ ಟ್ರಂಪ್ ಹೇಳಿದಂತೆ ಇಂದು ರಾತ್ರಿ ಒಂದು ಪುರಾತನ ನಾಗರಿಕತೆ ಇತಿಹಾಸದ ಪುಟ ಸೇರುತ್ತದೆಯೇ ಎಂಬ ಭಯಾನಕ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ,(ಏಜೆನ್ಸೀಸ್).