20 ವರ್ಷಗಳಲ್ಲೇ ಅತಿದೊಡ್ಡ ಸೈನ್ಯ ಜಮಾವಣೆ! ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ಮಹಾಸಮರ ಸನ್ನದ್ಧತೆ: ಇರಾನ್ ಗಡಿಗೆ ಲಗ್ಗೆ ಇಟ್ಟ ಡೆಡ್ಲಿ ಪಡೆ ಯಾವುದು..? US Marines

ಈ ಬಗ್ಗೆ ಅಮೆರಿಕದ ಸೆಂಟ್ರಲ್ ಕಮಾಂಡ್ ತನ್ನ Xನಲ್ಲಿ ನೀಡಿರುವ ಮಾಹಿತಿಯ ಪ್ರಕಾರ, ಮಾರ್ಚ್ 27 ರಂದು USS ಟ್ರಿಪೋಲಿ ಯುದ್ಧನೌಕೆಯು ತನ್ನ ಜವಾಬ್ದಾರಿಯುತ ಪ್ರದೇಶಕ್ಕೆ ತಲುಪಿದೆ.

ಎಲ್ಲಿಂದ ಬಂದವು ಈ ಪಡೆಗಳು: ಜಪಾನ್‌ನಲ್ಲಿ ತೈವಾನ್ ಗಡಿಯ ಬಳಿ ಸಮರಾಭ್ಯಾಸ ನಡೆಸುತ್ತಿದ್ದ ಈ ಬೃಹತ್ ಯುದ್ಧನೌಕೆಯನ್ನು ಕೇವಲ ಎರಡು ವಾರಗಳ ಹಿಂದೆ ತುರ್ತಾಗಿ ಮಧ್ಯಪ್ರಾಚ್ಯಕ್ಕೆ ಹೊರಡುವಂತೆ ಆದೇಶಿಸಲಾಗಿತ್ತು.

ಹೆಚ್ಚುವರಿ ಬೆಂಬಲ: ಸ್ಯಾನ್ ಡಿಯಾಗೋದಿಂದ USS ಬಾಕ್ಸರ್ ಮತ್ತು ಇತರ ಎರಡು ಪ್ರಮುಖ ಹಡಗುಗಳು ಸಹ ಇರಾನ್ ತೀರದತ್ತ ಧಾವಿಸುತ್ತಿವೆ.

ಅಮೆರಿಕದ ಈ ಬೃಹತ್ ಸೈನಿಕ ಜಮಾವಣೆಯು ಇರಾನ್ ಮೇಲೆ ಭೂದಾಳಿ ನಡೆಸುವ ಸೂಚನೆಯೇ ಎಂಬ ಚರ್ಚೆ ಆರಂಭವಾಗಿದೆ.

ಟ್ರಂಪ್ ಮಾಸ್ಟರ್ ಪ್ಲಾನ್: ವಾಲ್ ಸ್ಟ್ರೀಟ್ ಜರ್ನಲ್ ವರದಿಯ ಪ್ರಕಾರ, ಇರಾನ್ ಮೇಲೆ ದಾಳಿ ನಡೆಸಲು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಮುಂದೆ ಹೆಚ್ಚಿನ ಮಿಲಿಟರಿ ಆಯ್ಕೆಗಳನ್ನು ಇರಿಸಲು ಈ ಸೈನ್ಯವನ್ನು ಕಳುಹಿಸಲಾಗಿದೆ. ಫೆಬ್ರವರಿ 28 ರಂದು ಇರಾನ್ ಮೇಲೆ ಅಮೆರಿಕ-ಇಸ್ರೇಲ್ ಜಂಟಿ ದಾಳಿ ಆರಂಭವಾದಾಗಿನಿಂದ ಈ ಪ್ರದೇಶ ಕುದಿಯುತ್ತಿದೆ.

ಗುರಿ ಯಾವುದು: ಇರಾನ್‌ನ ಅತ್ಯಂತ ಪ್ರಮುಖ ತೈಲ ರಫ್ತು ಕೇಂದ್ರವಾದ ಖಾರ್ಗ್ ದ್ವೀಪ ಅಮೆರಿಕದ ಮೊದಲ ಗುರಿಯಾಗುವ ಸಾಧ್ಯತೆಯಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಅಮೆರಿಕದ ಈ ಸಿದ್ಧತೆಗೆ ಇರಾನ್ ಅತ್ಯಂತ ಕ್ರೂರವಾದ ಶೈಲಿಯಲ್ಲಿ ಪ್ರತಿಕ್ರಿಯಿಸಿದೆ. ಇರಾನ್‌ನ ಪ್ರಮುಖ ಪತ್ರಿಕೆ ಟೆಹ್ರಾನ್ ಟೈಮ್ಸ್ ತನ್ನ ಮುಖಪುಟದಲ್ಲಿ ನರಕಕ್ಕೆ ಸ್ವಾಗತ ಎಂಬ ಶೀರ್ಷಿಕೆಯಡಿ ಎಚ್ಚರಿಕೆ ನೀಡಿದೆ.

ಯಾವುದೇ ಅಮೆರಿಕನ್ ಸೈನಿಕ ಇರಾನ್ ಮಣ್ಣಿನ ಮೇಲೆ ಕಾಲಿಟ್ಟರೆ, ಆತ ವಾಪಸ್ ಹೋಗುವುದು ಕೇವಲ ಶವಪೆಟ್ಟಿಗೆಯಲ್ಲಿ ಮಾತ್ರ ಎಂದು ಇರಾನ್ ಸರ್ಕಾರಿ ಮಾಧ್ಯಮಗಳು ಗುಡುಗಿವೆ.

ಅಧ್ಯಕ್ಷ ಟ್ರಂಪ್ ಅವರು ಇರಾನ್ ಜೊತೆ ಶಾಂತಿ ಮಾತುಕತೆ ನಡೆಸುತ್ತಿರುವುದಾಗಿ ಹೇಳಿಕೊಳ್ಳುತ್ತಿದ್ದರೂ, ವಾಸ್ತವದಲ್ಲಿ ಸೈನಿಕರ ಸಂಖ್ಯೆ ಹೆಚ್ಚುತ್ತಿರುವುದು ದ್ವಂದ್ವ ನೀತಿಯನ್ನು ತೋರಿಸುತ್ತಿದೆ. ಇರಾನ್‌ನ ತೈಲ ಕೇಂದ್ರಗಳ ಮೇಲೆ ಅಮೆರಿಕ ಕಣ್ಣಿಟ್ಟಿರುವುದು ಜಾಗತಿಕ ಇಂಧನ ಮಾರುಕಟ್ಟೆಯಲ್ಲೂ ನಡುಕ ಹುಟ್ಟಿಸಿದೆ. ಒಂದು ವೇಳೆ ಭೂದಾಳಿ ಆರಂಭವಾದರೆ, ಅದು ಮೂರನೇ ಮಹಾಯುದ್ಧಕ್ಕೆ ನಾಂದಿಯಾಗಬಹುದು ಎಂಬ ಭೀತಿ ವಿಶ್ವಸಂಸ್ಥೆಯಲ್ಲೂ ವ್ಯಕ್ತವಾಗಿದೆ,(ಏಜೆನ್ಸೀಸ್).