ಹಾರುವ ಶ್ವೇತಭವನ!

ವಿಶಿಷ್ಟ ಮತ್ತು ವಿವಾದಾತ್ಮಕ ವ್ಯಕ್ತಿತ್ವದ ಡೊನಾಲ್ಡ್ ಟ್ರಂಪ್ ಎಲ್ಲವೂ ತಮ್ಮಿಚ್ಛೆಯಂತೆ ನಡೆಯಬೇಕು ಎಂದು ಬಯಸುವವರು. ಮತ್ತು ಅದು ಈಡೇರುವರೆಗೂ ಸುಮ್ಮನಿರುವ ವ್ಯಕ್ತಿಯಲ್ಲ. ಅಮೆರಿಕ ಅಧ್ಯಕ್ಷರಿಗಾಗಿ ನೂತನ ವಿಮಾನದ ನಿರ್ಮಾಣ ವಿಳಂಬವಾಗುತ್ತಿದೆ. ಹಾಗಾಗಿ, ಟ್ರಂಪ್ ಹಳೆಯ ವಿಮಾನವನ್ನೇ ಬಳಸುತ್ತಿದ್ದಾರೆ ಎಂದರೆ ನಿಮ್ಮ ಊಹೆ ತಪ್ಪು. ಈ ವಾರ ಫ್ರಾನ್ಸ್​ನಲ್ಲಿ ನಡೆದ ಜಿ-7 ಶೃಂಗಸಭೆಯ ಪ್ರವಾಸವೇ ಹಳೆಯ ಏರ್ ಫೋರ್ಸ್ ಒನ್ ವಿಮಾನದಲ್ಲಿ ತಾವು ನಡೆಸಿದ ಕೊನೆಯ ಪ್ರಯಾಣ ಎಂದು ಟ್ರಂಪ್ ಖಚಿತಪಡಿಸಿದ್ದಾರೆ. ಹೊಸ ವಿಮಾನವನ್ನು ಕತಾರ್​ನಿಂದ ಪಡೆದು, ಅದನ್ನು ಅಧ್ಯಕ್ಷ ಟ್ರಂಪ್​ರ ಏರ್ ಫೋರ್ಸ್ 1 ವಿಮಾನವಾಗಿ ಮಾರ್ಪಡಿಸಲಾಗಿದೆ. ಹೌದು, ಮೂಲತಃ ಕತಾರ್ ರಾಜಮನೆತನಕ್ಕೆ ಸೇರಿದ್ದ ಸೂಪರ್-ಲಕ್ಸುರಿ ಬೋಯಿಂಗ್ 747-8 ವಿಮಾನವನ್ನು, ಕತಾರ್ ಸರ್ಕಾರ ಅಮೆರಿಕಕ್ಕೆ ಉಡುಗೊರೆಯಾಗಿ ನೀಡಿದೆ.

ನೂತನ ಏರ್ ಫೋರ್ಸ್ ಒನ್ ವಿಮಾನದ ನೋಟವು ಪ್ರಸ್ತುತ ಬಳಕೆಯಲ್ಲಿರುವ ವಿಮಾನಕ್ಕಿಂತ ಸಂಪೂರ್ಣವಾಗಿ ಭಿನ್ನವಾಗಿದೆ. ಹಳೆಯ ವಿಮಾನದಲ್ಲಿದ್ದ ತಿಳಿ ನೀಲಿ (ಲೈಟ್ ಬ್ಲೂ) ಬಣ್ಣದ ಬದಲಾಗಿ, ಹೊಸ ವಿಮಾನದ ಕೆಳಭಾಗಕ್ಕೆ ಗಾಢ ನೇವಿ ಬ್ಲೂ (ಗಾಢ ನೀಲಿ) ಬಣ್ಣವನ್ನು ಬಳಸಲಾಗಿದೆ. ಇದರ ಮಧ್ಯಭಾಗದಲ್ಲಿ ಆಕರ್ಷಕ ಕೆಂಪು ಪಟ್ಟಿಯನ್ನು (ರೆಡ್ ಸ್ಟ್ರೈಪ್) ವಿನ್ಯಾಸಗೊಳಿಸಲಾಗಿದೆ. ಅಧ್ಯಕ್ಷರು ವಿಮಾನವನ್ನು ಹತ್ತುವ ದ್ವಾರದ ಬಳಿ ಅಮೆರಿಕ ಅಧ್ಯಕ್ಷರ ಅಫೀಶಿಯಲ್ ಸೀಲ್ ಅಳವಡಿಸಲಾಗಿದೆ. ವಿಮಾನದ ಹಿಂಭಾಗದಲ್ಲಿ ಅಮೆರಿಕದ ರಾಷ್ಟ್ರಧ್ವಜವನ್ನು ಬಿಡಿಸಲಾಗಿದೆ.

"ಈ ವಿಮಾನ ಲಂಡನ್, ಜರ್ಮನಿ ಅಥವಾ ವಿಶ್ವದ ಯಾವುದೇ ವಿಮಾನ ನಿಲ್ದಾಣದಲ್ಲಿ ಇಳಿದರೂ, ಇದರ ಭವ್ಯತೆಗೆ ಯಾವುದೂ ಸಾಟಿಯಾಗಲಾರದು. ನಮ್ಮ ದೇಶದ ಪ್ರಾತಿನಿಧ್ಯ ಇದೇ ರೀತಿ ಇರಬೇಕು. ಈ ಬಣ್ಣ ಮತ್ತು ವಿನ್ಯಾಸ ನನ್ನ ವೈಯಕ್ತಿಕ ಆಯ್ಕೆಯಾಗಿದೆ ಎಂಬುದನ್ನು ನಾನು ಒಪ್ಪಿಕೊಳ್ಳುತ್ತೇನೆ. ಅಲ್ಲದೆ, ಜುಲೈ 4ರ ಅಮೆರಿಕದ ಸ್ವಾತಂತ್ರ್ಯ ದಿನಾಚರಣೆಯ ಫ್ಲೈಯಿಂಗ್ ಪರೇಡ್ ವೇಳೆ ಈ ವಿಮಾನ ಪ್ರದರ್ಶನ ನೀಡಲಿದೆ."

ಡೊನಾಲ್ಡ್ ಟ್ರಂಪ್, ಅಮೆರಿಕ ಅಧ್ಯಕ್ಷ

ಟ್ರಂಪ್ ಸರ್ಕಾರದ ಪ್ರಕಾರ, ಕತಾರ್​ನಿಂದ ಸಿಕ್ಕಿರುವ ಈ ವಿಮಾನವು ಕೇವಲ ಒಂದು ಬ್ರಿಡ್ಜ್ ಏರ್​ಕ್ರಾಫ್ಟ್ (ತಾತ್ಕಾಲಿಕ ಪರಿಹಾರ) ಆಗಿದೆ. ಬೋಯಿಂಗ್ ಸಂಸ್ಥೆಯು ಅಮೆರಿಕ ಅಧ್ಯಕ್ಷರಿಗಾಗಿ ಸಂಪೂರ್ಣ ಹೊಸ ವಿಮಾನಗಳನ್ನು ಸಿದ್ಧಪಡಿಸಿ ನೀಡುವವರೆಗೆ ಮಾತ್ರ ಇದನ್ನು ಬಳಸಲಾಗುತ್ತದೆ. ವಾಸ್ತವವಾಗಿ, ಬೋಯಿಂಗ್​ನ ಹೊಸ ವಿಮಾನಗಳು 2024ರಲ್ಲೇ ವಿತರಣೆಯಾಗಬೇಕಿತ್ತು, ಆದರೆ ಯೋಜನೆ ವಿಳಂಬವಾದ ಕಾರಣ ಅವುಗಳು ಈಗ 2028ರಲ್ಲಿ ಕೈಸೇರುವ ಸಾಧ್ಯತೆಯಿದೆ.

ಪ್ರಸ್ತುತ ಟ್ರಂಪ್ ಸೇವೆಯಲ್ಲಿರುವ ಹಳೆಯ ವಿಮಾನವನ್ನು ‘ವಿಸಿ-25ಎ’ ಎಂದು ಕರೆಯಲಾಗುತ್ತದೆ. ಹೊಸದಾಗಿ ಸಿದ್ಧವಾಗುತ್ತಿರುವ ‘ವಿಸಿ-25ಬಿ’ ವಿಮಾನಗಳು ಬರುವವರೆಗೂ ಇವು ನಿವೃತ್ತಿಯಾಗುವುದಿಲ್ಲ. ಅಲ್ಲಿಯವರೆಗೆ ಕತಾರ್​ನ ಹೊಸ ವಿಮಾನ ಮತ್ತು ಹಳೆಯ ವಿಮಾನ ಎರಡೂ ಲಭ್ಯವಿರುತ್ತವೆ. ಪ್ರಯಾಣದ ಅಗತ್ಯಕ್ಕೆ ತಕ್ಕಂತೆ ಸೂಕ್ತ ವಿಮಾನವನ್ನು ಏರ್​ಲಿಫ್ಟ್ ಗ್ರೂಪ್ ಆಯ್ಕೆ ಮಾಡುತ್ತದೆ. ಹಳೆಯ ಬೋಯಿಂಗ್ 747-200ಬಿ ವಿಮಾನವು ಜಗತ್ತಿನಲ್ಲೇ ಅತ್ಯಂತ ಸುರಕ್ಷಿತ ವಿಮಾನವೆಂದು ಹೆಸರುವಾಸಿಯಾಗಿದೆ. ಆದರೆ ಹೊಸ ವಿಮಾನದಲ್ಲಿ ಒಂದು ಪ್ರಮುಖ ತಾಂತ್ರಿಕ ಬದಲಾವಣೆ ಇದೆ. ಹಳೆಯ ವಿಮಾನಕ್ಕೆ ಹಾರಾಟದ ಮಧ್ಯದಲ್ಲೇ ಗಾಳಿಯಲ್ಲಿ ಇಂಧನ ತುಂಬುವ ತಂತ್ರಜ್ಞಾನ ಇತ್ತು. ಇದರಿಂದಾಗಿ ಪರಮಾಣು ಯುದ್ಧದಂತಹ ತುರ್ತು ಪರಿಸ್ಥಿತಿಯಲ್ಲಿ ಅದು ಸತತ 7 ದಿನಗಳ ಕಾಲ ಆಕಾಶದಲ್ಲೇ ಉಳಿಯುವ ಸಾಮರ್ಥ್ಯ ಹೊಂದಿತ್ತು. ಆದರೆ ಹೊಸ ವಿಮಾನದಲ್ಲಿ ಈ ಸೌಲಭ್ಯವಿಲ್ಲ. ವೆಚ್ಚವನ್ನು ನಿಯಂತ್ರಣದಲ್ಲಿಡಲು ವೈಟ್​ಹೌಸ್ ಈ ವೈಶಿಷ್ಟ್ಯವನ್ನು ಕೈಬಿಟ್ಟಿದೆ.

ಏಕೆ ಈ ನಿರ್ಧಾರ?: ಕಳೆದ 30 ವರ್ಷಗಳ ಇತಿಹಾಸದಲ್ಲಿ ಅಮೆರಿಕದ ಯಾವುದೇ ಅಧ್ಯಕ್ಷರು ವಿಮಾನದಲ್ಲಿ ಇರುವಾಗ ಗಾಳಿಯಲ್ಲಿ ಇಂಧನ ತುಂಬಿಸುವ ಪ್ರಸಂಗ ಎದುರಾಗಿಲ್ಲ. ಭದ್ರತೆಯ ದೃಷ್ಟಿಯಿಂದ ಯಾವಾಗಲೂ ಸುರಕ್ಷಿತ ಸೇನಾ ನೆಲೆಗಳಲ್ಲೇ ಇಂಧನ ತುಂಬಿಸಲು ಆದ್ಯತೆ ನೀಡಲಾಗುತ್ತದೆ.

ಹೆಚ್ಚಿನ ರೇಂಜ್: ಗಾಳಿಯಲ್ಲಿ ಇಂಧನ ತುಂಬುವ ಸೌಲಭ್ಯ ಇಲ್ಲದಿದ್ದರೂ, ಹೊಸ ವಿಮಾನದ ಒಟ್ಟಾರೆ ಸಾಮರ್ಥ್ಯ ಹಳೆಯದಕ್ಕಿಂತ ಹೆಚ್ಚಿದೆ. ಇದು ಒಮ್ಮೆ ಇಂಧನ ತುಂಬಿಸಿದರೆ ಸತತ 16 ಗಂಟೆಗಳ ಕಾಲ 8,900 ಮೈಲಿ (14,300+ ಕಿಲೋಮೀಟರ್) ನಿರಂತರವಾಗಿ ಹಾರಬಲ್ಲದು. ಇದು ಹಳೆಯ ವಿಮಾನದ ರೇಂಜ್​ಗಿಂತ 1,100 ಮೈಲಿ (1,770 ಕಿ.ಮೀ) ಅಧಿಕವಾಗಿದೆ.

ವಿಮಾನದ ಬಣ್ಣವನ್ನು ಬದಲಾವಣೆ ಮಾಡುವ ಟ್ರಂಪ್ ನಿರ್ಧಾರ ಹೊಸದೇನಲ್ಲ. ಅಧ್ಯಕ್ಷರಾದ ಮೊದಲ ಅವಧಿಯಲ್ಲೇ (2017-2021) ಅವರು ಏರ್ ಫೋರ್ಸ್ ಒನ್​ಗೆ ತಮ್ಮ ಖಾಸಗಿ ವಿಮಾನದ ಮಾದರಿಯಲ್ಲಿ ಕೆಂಪು, ಬಿಳಿ ಮತ್ತು ನೆವಿ ಬ್ಲೂ ಬಣ್ಣ ನೀಡಲು ನಿರ್ಧರಿಸಿದ್ದರು. ಆದರೆ, 2023ರ ಮಾರ್ಚ್​ನಲ್ಲಿ ಅಂದಿನ ಅಧ್ಯಕ್ಷ ಜೋ ಬೈಡೆನ್ ಈ ನಿರ್ಧಾರವನ್ನು ರದ್ದುಗೊಳಿಸಿದರು. ಗಾಢ ಬಣ್ಣಗಳನ್ನು ಬಳಸುವುದರಿಂದ ವಿಮಾನದ ನಿರ್ವಹಣಾ ವೆಚ್ಚ ಹೆಚ್ಚಾಗಬಹುದು ಮತ್ತು ವಿತರಣೆ ಮತ್ತಷ್ಟು ತಡವಾಗಬಹುದು ಎಂದು ಅಮೆರಿಕನ್ ಏರ್ ಫೋರ್ಸ್ ವಿಶ್ಲೇಷಿಸಿತ್ತು. ಆದರೆ, ಮತ್ತೆ ಅಧಿಕಾರಕ್ಕೆ ಬಂದ ತಕ್ಷಣ ಟ್ರಂಪ್ ತಮಗೆ ಇಷ್ಟವಾದ ಬಣ್ಣದ ಯೋಜನೆಯನ್ನು ಮರುಜಾರಿಗೊಳಿಸಿದ್ದಾರೆ. ಭವಿಷ್ಯದಲ್ಲಿ ಕ್ಯಾಬಿನೆಟ್ ಸಚಿವರು ಮತ್ತು ಹಿರಿಯ ಅಧಿಕಾರಿಗಳ ಸರ್ಕಾರಿ ವಿಮಾನಗಳಿಗೂ ಇದೇ ಬಣ್ಣದ ವಿನ್ಯಾಸವನ್ನು ಬಳಸಲಾಗುವುದು ಎಂದು ಏರ್ ಫೋರ್ಸ್ ತಿಳಿಸಿದೆ.