ಒಂದೆಡೆ ಯುದ್ಧದ ಜ್ವಾಲೆ, ಮತ್ತೊಂದೆಡೆ ಕ್ಷಿಪಣಿಗಳ ಅಬ್ಬರ: ಅಮೆರಿಕಕ್ಕೆ ನಡುಕ ಹುಟ್ಟಿಸಿದ ಕಿಮ್ ಹೊಸ ನಡೆ! North Korea Missile Launch

ದಕ್ಷಿಣ ಕೊರಿಯಾದ ಮಿಲಿಟರಿ ನೀಡಿರುವ ಅಧಿಕೃತ ಹೇಳಿಕೆಯ ಪ್ರಕಾರ, ಉತ್ತರ ಕೊರಿಯಾದ ಪೂರ್ವ ಕರಾವಳಿಯ ಸಿನ್ಪೋ ನಗರದ ಸಮೀಪದಿಂದ ಭಾನುವಾರ ಬೆಳಿಗ್ಗೆ ಸುಮಾರು 6:10 ಗಂಟೆಗೆ ಈ ಕ್ಷಿಪಣಿಗಳನ್ನು ಉಡಾಯಿಸಲಾಗಿದೆ. ಈ ಕ್ಷಿಪಣಿಗಳು ಸುಮಾರು 140 ಕಿಲೋಮೀಟರ್ (90 ಮೈಲಿ) ದೂರ ಹಾರಿ ಸಮುದ್ರಕ್ಕೆ ಬಿದ್ದಿವೆ.

ಅಲ್ಲದೆ, ಜಪಾನ್ ಸರ್ಕಾರವು ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ಕ್ಷಿಪಣಿಗಳು ಕೊರಿಯನ್ ಪರ್ಯಾಯ ದ್ವೀಪದ ಪೂರ್ವ ಕರಾವಳಿಯ ಸಮೀಪ ಬಿದ್ದಿವೆ ಎಂದು ತಿಳಿಸಿದೆ. ಆದರೆ, ಜಪಾನ್‌ನ ವಿಶೇಷ ಆರ್ಥಿಕ ವಲಯಕ್ಕೆ ಯಾವುದೇ ಧಕ್ಕೆ ಉಂಟಾಗಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಉಡಾವಣೆ ನಡೆದ ಸಿನ್ಪೋ ಪ್ರದೇಶವು ಉತ್ತರ ಕೊರಿಯಾದ ಅತ್ಯಂತ ಪ್ರಮುಖ ಮಿಲಿಟರಿ ನೆಲೆಗಳಲ್ಲಿ ಒಂದಾಗಿದೆ. ಇಲ್ಲಿ ಜಲಂತರ್ಗಾಮಿ ನೌಕೆಗಳು ಮತ್ತು ಜಲಂತರ್ಗಾಮಿ ಉಡಾವಣಾ ಬ್ಯಾಲಿಸ್ಟಿಕ್ ಕ್ಷಿಪಣಿಗಳ (SLBM) ಪರೀಕ್ಷಾ ಸಾಧನಗಳಿವೆ. 2022ರಲ್ಲಿ ಇಲ್ಲಿಂದಲೇ ಕ್ಷಿಪಣಿ ಉಡಾವಣೆ ಮಾಡಲಾಗಿತ್ತು. ಪ್ರಸಕ್ತ ಉಡಾವಣೆಯು ಸಬ್‌ಮರೀನ್ ಮೂಲದ್ದೇ ಅಥವಾ ನೆಲದ ಮೇಲಿನದ್ದೇ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ.

ಇಸ್ರೇಲ್ ಮತ್ತು ಅಮೆರಿಕ ಜಂಟಿಯಾಗಿ ಇರಾನ್ ವಿರುದ್ಧ ಯುದ್ಧ ಘೋಷಿಸಿ ಏಳು ವಾರಗಳು ಕಳೆದಿವೆ. ಇರಾನ್‌ನ ಪರಮಾಣು ಕಾರ್ಯಕ್ರಮವನ್ನು ಹತ್ತಿಕ್ಕುವುದು ಈ ಯುದ್ಧದ ಪ್ರಮುಖ ಉದ್ದೇಶವಾಗಿದೆ. ಇದೇ ಹೊತ್ತಿನಲ್ಲಿ ಕಿಮ್ ಜೊಂಗ್ ಉನ್ ಕ್ಷಿಪಣಿ ಹಾರಿಸಿರುವುದು ಕಾಕತಾಳೀಯವಲ್ಲ ಎನ್ನುತ್ತಿದ್ದಾರೆ ತಜ್ಞರು.

ದಕ್ಷಿಣ ಕೊರಿಯಾದ ಮಾಜಿ ಅಧ್ಯಕ್ಷೀಯ ಭದ್ರತಾ ಸಲಹೆಗಾರ ಕಿಮ್ ಕಿ-ಜಂಗ್ ಅವರ ಪ್ರಕಾರ, ನಾವು ಇರಾನ್‌ನಂತಲ್ಲ, ನಮ್ಮ ಬಳಿ ಪ್ರಬಲವಾದ ಸ್ವಯಂ ರಕ್ಷಣಾ ಸಾಮರ್ಥ್ಯವಿದೆ ಎಂದು ಜಗತ್ತಿಗೆ ತೋರಿಸುವುದು ಕಿಮ್ ಉದ್ದೇಶವಾಗಿದೆ. ಇರಾನ್‌ನ ಪರಮಾಣು ನೆಲೆಗಳ ಮೇಲೆ ದಾಳಿ ನಡೆಯುತ್ತಿರುವ ಬೆನ್ನಲ್ಲೇ, ತಾನು ಪರಮಾಣು ಶಸ್ತ್ರಸಜ್ಜಿತ ದೇಶವೆಂದು ಘೋಷಿಸಿಕೊಂಡಿರುವ ಉತ್ತರ ಕೊರಿಯಾ, ತನ್ನ ಮೇಲೆ ದಾಳಿ ನಡೆಸುವ ಮುನ್ನ ಹತ್ತು ಬಾರಿ ಯೋಚಿಸಿ ಎಂಬ ಎಚ್ಚರಿಕೆಯನ್ನು ಅಮೆರಿಕಕ್ಕೆ ರವಾನಿಸಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮುಂದಿನ ತಿಂಗಳು ಚೀನಾ ಪ್ರವಾಸ ಕೈಗೊಳ್ಳಲಿದ್ದು, ಈ ವೇಳೆ ಉತ್ತರ ಕೊರಿಯಾದ ನಾಯಕ ಕಿಮ್ ಜೊಂಗ್ ಉನ್ ಅವರೊಂದಿಗೆ ಮಾತುಕತೆ ನಡೆಸುವ ಸಾಧ್ಯತೆಗಳ ಬಗ್ಗೆ ಚರ್ಚೆ ನಡೆಯುತ್ತಿದೆ. ದಕ್ಷಿಣ ಕೊರಿಯಾದ ಅಧ್ಯಕ್ಷ ಲೀ ಜೇ-ಮ್ಯುಂಗ್ ಕೂಡ ಮಾತುಕತೆಗೆ ಉತ್ಸುಕರಾಗಿದ್ದಾರೆ.

ಆದರೆ, ಮಾತುಕತೆಯ ಮೇಜಿನ ಬಳಿ ಕುಳಿತುಕೊಳ್ಳುವ ಮೊದಲು ತನ್ನ ಚೌಕಾಶಿ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳಲು ಉತ್ತರ ಕೊರಿಯಾ ಈ ಕ್ಷಿಪಣಿ ದಾಳಿಯನ್ನು ಒಂದು ಅಸ್ತ್ರವನ್ನಾಗಿ ಬಳಸುತ್ತಿದೆ. ಈ ತಿಂಗಳಲ್ಲೇ ಇದು ನಾಲ್ಕನೇ ಉಡಾವಣೆಯಾಗಿದ್ದು, ಈ ವರ್ಷದ ಒಟ್ಟು ಸಂಖ್ಯೆ ಏಳಕ್ಕೆ ಏರಿದೆ.

ದಕ್ಷಿಣ ಕೊರಿಯಾದ ಅಧ್ಯಕ್ಷೀಯ ಭವನವಾದ 'ಬ್ಲೂ ಹೌಸ್' ತುರ್ತು ಭದ್ರತಾ ಸಭೆಯನ್ನು ಕರೆದಿದೆ. ಉತ್ತರ ಕೊರಿಯಾದ ಈ ಕ್ರಮವು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ನಿರ್ಣಯಗಳ ನೇರ ಉಲ್ಲಂಘನೆಯಾಗಿದೆ ಎಂದು ಸೋಲ್ ಕಿಡಿಕಾರಿದೆ. ಪ್ರಚೋದನಾತ್ಮಕ ಕೃತ್ಯಗಳನ್ನು ತಕ್ಷಣವೇ ನಿಲ್ಲಿಸುವಂತೆ ಆಗ್ರಹಿಸಿದೆ.

ಇನ್ನೊಂದೆಡೆ, ಅಂತಾರಾಷ್ಟ್ರೀಯ ಪರಮಾಣು ಶಕ್ತಿ ಸಂಸ್ಥೆ (IAEA) ಮುಖ್ಯಸ್ಥ ರಾಫೆಲ್ ಗ್ರೋಸಿ ಅವರು ಉತ್ತರ ಕೊರಿಯಾದ ಪರಮಾಣು ಸಾಮರ್ಥ್ಯದ ಬಗ್ಗೆ ಗಂಭೀರ ಕಳವಳ ವ್ಯಕ್ತಪಡಿಸಿದ್ದಾರೆ. ಹೊಸ ಯುರೇನಿಯಂ ಪುಷ್ಟೀಕರಣ ಸೌಲಭ್ಯವನ್ನು ಕಿಮ್ ಸರ್ಕಾರ ಸಿದ್ಧಪಡಿಸುತ್ತಿರುವ ಸಾಧ್ಯತೆ ಇದೆ ಎಂದು ಎಚ್ಚರಿಸಿದ್ದಾರೆ.

ಉತ್ತರ ಕೊರಿಯಾ ಅಧ್ಯಕ್ಷ ಕಿಮ್ ಜೊಂಗ್ ಉನ್ ಈ ಹಿಂದೆಯೇ ಹೇಳಿದಂತೆ, ಅವರ ದೇಶದ ಪರಮಾಣು ಸ್ಥಾನಮಾನವು 'ಬದಲಾಯಿಸಲಾಗದ್ದು. ಇರಾನ್ ಯುದ್ಧದ ಜ್ವಾಲೆ ಇಡೀ ಮಧ್ಯಪ್ರಾಚ್ಯವನ್ನು ಆವರಿಸಿರುವಾಗ, ಏಷ್ಯಾದಲ್ಲಿ ಉತ್ತರ ಕೊರಿಯಾದ ಈ ಸಾಲು ಸಾಲು ಕ್ಷಿಪಣಿ ಉಡಾವಣೆಗಳು ಜಾಗತಿಕ ಶಾಂತಿಗೆ ಹೊಸ ಸವಾಲನ್ನು ಒಡ್ಡಿವೆ,(ಏಜೆನ್ಸೀಸ್).