ಅಮೆರಿಕ-ಇರಾನ್ ಯುದ್ಧ ನಿಲ್ಲಿಸಿದ ಡ್ರ್ಯಾಗನ್ ರಾಷ್ಟ್ರ? ಯುದ್ಧದ ಭೂಮಿಯಲ್ಲಿ ಶಾಂತಿಯ ಮಂತ್ರ ಜಪಿಸಿದ ಚೀನಾ! China

ಇರಾನ್‌ನ ಅತಿದೊಡ್ಡ ವ್ಯಾಪಾರ ಪಾಲುದಾರನಾಗಿರುವ ಚೀನಾ, ಈ ಸಂಘರ್ಷವನ್ನು ಕೊನೆಗೊಳಿಸಲು ತೆರೆಮರೆಯಲ್ಲಿ ಭಾರಿ ಕಸರತ್ತು ನಡೆಸಿದೆ. ಅಸೋಸಿಯೇಟೆಡ್ ಪ್ರೆಸ್ (AP) ವರದಿಯ ಪ್ರಕಾರ, ಚೀನಾದ ಅಧಿಕಾರಿಗಳು ನೇರವಾಗಿ ಮತ್ತು ಪಾಕಿಸ್ತಾನ, ಟರ್ಕಿ ಹಾಗೂ ಈಜಿಪ್ಟ್‌ನಂತಹ ಮಧ್ಯವರ್ತಿಗಳ ಮೂಲಕ ಇರಾನ್ ಮೇಲೆ ನಿರಂತರ ಒತ್ತಡ ಹೇರಿದ್ದಾರೆ. ಇರಾನ್ ತನ್ನ ಹಟ ಬಿಟ್ಟು ಶಾಂತಿ ಒಪ್ಪಂದಕ್ಕೆ ಸಹಿ ಹಾಕುವಂತೆ ಮಾಡುವಲ್ಲಿ ಬೀಜಿಂಗ್ ಪ್ರಮುಖ ಪಾತ್ರ ವಹಿಸಿದೆ.

ಡೊನಾಲ್ಡ್ ಟ್ರಂಪ್ ಅವರು ಮೇ ತಿಂಗಳ ಮಧ್ಯಭಾಗದಲ್ಲಿ ಚೀನಾಕ್ಕೆ ಭೇಟಿ ನೀಡಿ ಅಧ್ಯಕ್ಷ ಷಿ ಜಿನ್‌ಪಿಂಗ್ ಅವರನ್ನು ಭೇಟಿಯಾಗಬೇಕಿದೆ. ಈ ಹಿಂದೆ ಮಾರ್ಚ್ ಅಂತ್ಯದಲ್ಲಿ ನಡೆಯಬೇಕಿದ್ದ ಈ ಪ್ರವಾಸವು ಯುದ್ಧದ ಕಾರಣದಿಂದ ಮುಂದೂಡಲ್ಪಟ್ಟಿತ್ತು. ತನ್ನ ದೇಶಕ್ಕೆ ಟ್ರಂಪ್ ಭೇಟಿ ನೀಡುವ ಮುನ್ನ ಮಧ್ಯಪ್ರಾಚ್ಯದ ಉದ್ವಿಗ್ನತೆಯನ್ನು ತಣ್ಣಗಾಗಿಸುವುದು ಚೀನಾದ ಪ್ರಮುಖ ಉದ್ದೇಶವಾಗಿತ್ತು. ಯುದ್ಧ ಮುಂದುವರಿದರೆ ಅದು ಜಾಗತಿಕ ಆರ್ಥಿಕತೆ ಮತ್ತು ಚೀನಾದ ಇಂಧನ ಭದ್ರತೆಯ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು ಎಂಬ ಆತಂಕ ಚೀನಾಕ್ಕಿತ್ತು.

ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ಮಾವೊ ನಿಂಗ್ ಈ ಕುರಿತು ಮಾತನಾಡುತ್ತಾ, ನಡೆದ ಘಟನೆಗಳ ಬಗ್ಗೆ ನಮಗೆ ತೀವ್ರ ಕಳವಳವಿದೆ. ಈ ಯುದ್ಧವು ಮೊದಲೇ ಸಂಭವಿಸಬಾರದಿತ್ತು. ಎಲ್ಲಾ ಪಕ್ಷಗಳು ಪ್ರಾಮಾಣಿಕತೆಯನ್ನು ಪ್ರದರ್ಶಿಸಿ ಯುದ್ಧವನ್ನು ಕೊನೆಗೊಳಿಸಬೇಕು ಎಂದು ತಿಳಿಸಿದ್ದಾರೆ. ವಾಷಿಂಗ್ಟನ್‌ನಲ್ಲಿರುವ ಚೀನಾ ರಾಯಭಾರ ಕಚೇರಿಯು, ಬೀಜಿಂಗ್ ಮೊದಲಿನಿಂದಲೂ ಶಾಂತಿಗಾಗಿ ದಣಿವರಿಯಿಲ್ಲದೆ ಕೆಲಸ ಮಾಡುತ್ತಿದೆ ಎಂದು ಹೇಳಿಕೊಂಡಿದೆ.

ಒಂದೆಡೆ ಶಾಂತಿಯ ಮಂತ್ರ ಜಪಿಸುತ್ತಿರುವ ಚೀನಾ, ಇನ್ನೊಂದೆಡೆ ಅಮೆರಿಕದ ವಿರುದ್ಧ ತನ್ನ ಹಗೆತನವನ್ನು ಪ್ರದರ್ಶಿಸಿದೆ. ಮಂಗಳವಾರವಷ್ಟೇ ವಿಶ್ವಸಂಸ್ಥೆಯಲ್ಲಿ ಹೋರ್ಮುಜ್ ಜಲಸಂಧಿಯ ವಾಣಿಜ್ಯ ಹಡಗುಗಳ ರಕ್ಷಣೆಗೆ ಸಂಬಂಧಿಸಿದಂತೆ ಅಮೆರಿಕ ಮಂಡಿಸಿದ ನಿರ್ಣಯಕ್ಕೆ ಚೀನಾ ಮತ್ತು ರಷ್ಯಾ ವೀಟೋ ಅಧಿಕಾರ ಚಲಾಯಿಸಿ ತಡೆ ನೀಡಿವೆ. ಒಂದು ನಾಗರಿಕತೆಯನ್ನೇ ಅಳಿಸಿ ಹಾಕುತ್ತೇವೆ ಎಂದು ಅಮೆರಿಕ ಬೆದರಿಕೆ ಹಾಕುತ್ತಿರುವಾಗ ಇಂತಹ ನಿರ್ಣಯಗಳಿಗೆ ಬೆಂಬಲ ನೀಡುವುದು ತಪ್ಪು ಸಂದೇಶ ರವಾನಿಸುತ್ತದೆ ಎಂದು ವಿಶ್ವಸಂಸ್ಥೆಯ ಚೀನಾ ರಾಯಭಾರಿ ಫೂ ಕಾಂಗ್ ವಾದಿಸಿದ್ದಾರೆ.

ಈ ಕದನ ವಿರಾಮದ ಮೂಲಕ ಚೀನಾ ತಾನು ಕೇವಲ ವ್ಯಾಪಾರ ರಾಷ್ಟ್ರವಲ್ಲ, ಬದಲಾಗಿ ಜಗತ್ತಿನ ಯಾವುದೇ ದೊಡ್ಡ ಸಮಸ್ಯೆಯನ್ನು ಬಗೆಹರಿಸಬಲ್ಲ ಜಾಗತಿಕ ಮಧ್ಯಸ್ಥಿಕೆದಾರ ಎಂದು ಸಾಬೀತುಪಡಿಸಲು ಹೊರಟಿದೆ. ಸೌದಿ ಅರೇಬಿಯಾ ಮತ್ತು ಇರಾನ್ ನಡುವೆ ಹಿಂದೆ ಸಂಧಾನ ಮಾಡಿಸಿದ್ದ ಚೀನಾ, ಈಗ ಅಮೆರಿಕದ ಶತ್ರುವಿನೊಂದಿಗೂ ಕೈಜೋಡಿಸಿ ಶಾಂತಿ ಒಪ್ಪಂದಕ್ಕೆ ನಾಂದಿ ಹಾಡಿದೆ.

ಚೀನಾದ ಈ ನಡೆ ಅಮೆರಿಕದ ಪ್ರಭಾವವನ್ನು ಮಧ್ಯಪ್ರಾಚ್ಯದಲ್ಲಿ ಕಡಿಮೆ ಮಾಡುವ ತಂತ್ರವೇ ಎಂಬ ಸಂಶಯವು ರಾಜತಾಂತ್ರಿಕ ವಲಯದಲ್ಲಿ ಮೂಡಿದೆ. ಏನೇ ಇರಲಿ, ಎರಡು ವಾರಗಳ ಈ ಕದನ ವಿರಾಮದ ಹಿಂದೆ ಡ್ರ್ಯಾಗನ್ ರಾಷ್ಟ್ರದ ಕೂತೂಹಲಕಾರಿ ಪಾತ್ರವಿರುವುದಂತೂ ಸತ್ಯ,(ಏಜೆನ್ಸೀಸ್).