ಡಿಲೀಟ್ ಆದ ಪೋಸ್ಟ್‌ನಲ್ಲಡಗಿದೆ ಸಂಚು! ಪಾಕ್ ಸಚಿವನ ಕಾಮೆಂಟ್‌ಗೆ ಇಸ್ರೇಲ್ ಘರ್ಜನೆ: ನರಕಕ್ಕೆ ಹೋಗಿ ಅಂದಿದ್ದಕ್ಕೆ ನೆತನ್ಯಾಹು ಕೊಟ್ಟ ತಿರುಗೇಟು ಏನು..? Khawaja Asif

ಇಸ್ಲಾಮಾಬಾದ್‌ನಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಮಹತ್ವದ ಕದನ ವಿರಾಮ ಮಾತುಕತೆಗಳು ನಡೆಯುತ್ತಿರುವ ಸಂದರ್ಭದಲ್ಲೇ ಖವಾಜಾ ಆಸಿಫ್ ಎಕ್ಸ್​ನಲ್ಲಿ ಇಸ್ರೇಲ್ ವಿರುದ್ಧ ವೀಷ ಕಾರಿದ್ದರು. ಇಸ್ರೇಲ್ ಒಂದು ಕೆಡುಕು ಮತ್ತು ಮಾನವಕುಲಕ್ಕೆ ಶಾಪ. ಇತ್ತ ಇಸ್ಲಾಮಾಬಾದ್‌ನಲ್ಲಿ ಶಾಂತಿ ಮಾತುಕತೆ ನಡೆಯುತ್ತಿದ್ದರೆ, ಅತ್ತ ಲೆಬನಾನ್‌ನಲ್ಲಿ ಇಸ್ರೇಲ್ ನರಮೇಧ ನಡೆಸುತ್ತಿದೆ. ಮೊದಲು ಗಾಜಾ, ನಂತರ ಇರಾನ್, ಈಗ ಲೆಬನಾನ್, ಇಸ್ರೇಲ್‌ನ ರಕ್ತಪಾತ ನಿರಂತರವಾಗಿ ಮುಂದುವರಿಯುತ್ತಿದೆ ಎಂದು ಬರೆದುಕೊಂಡಿದ್ದರು.

ಅಷ್ಟಕ್ಕೇ ನಿಲ್ಲದ ಆಸಿಫ್​, ಯುರೋಪಿಯನ್ ಜ್ಯೂಡ್‌ಗಳಿಂದ ಮುಕ್ತಿ ಪಡೆಯಲು ಪ್ಯಾಲೆಸ್ಟೀನ್ ನೆಲದಲ್ಲಿ ಈ ಕ್ಯಾನ್ಸರ್ ತರಹದ ರಾಷ್ಟ್ರವನ್ನು ನಿರ್ಮಿಸಿದವರು ನರಕದಲ್ಲಿ ಉರಿಯಲಿ ಎಂಬ ಅತ್ಯಂತ ಕಟು ಶಬ್ದಗಳನ್ನು ಬಳಸಿದ್ದರು.

ಪಾಕಿಸ್ತಾನದ ಸಚಿವರ ಈ ಹೇಳಿಕೆಗೆ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಕಚೇರಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದೆ. ಇದು ಅತಿರೇಕದ ಮತ್ತು ಅಸಹನೀಯ ಹೇಳಿಕೆ ಎಂದು ನೆತನ್ಯಾಹು ಕಿಡಿಕಾರಿದ್ದಾರೆ.

ಪಾಕಿಸ್ತಾನವು ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷವನ್ನು ಶಮನಗೊಳಿಸಲು ಮಧ್ಯಸ್ಥಿಕೆ ವಹಿಸುತ್ತಿದ್ದು, ಶುಕ್ರವಾರ ರಾತ್ರಿಯಿಂದಲೇ ಉಭಯ ದೇಶಗಳ ನಿಯೋಗಗಳು ಇಸ್ಲಾಮಾಬಾದ್‌ಗೆ ಆಗಮಿಸಬೇಕಿದೆ. ಇಂತಹ ಸೂಕ್ಷ್ಮ ಸಮಯದಲ್ಲಿ ಪಾಕ್ ಸಚಿವರ ಈ ಉದ್ಧಟತನದ ಹೇಳಿಕೆ ಮಧ್ಯಸ್ಥಗಾರನಾಗಿ ಪಾಕಿಸ್ತಾನದ ವಿಶ್ವಾಸಾರ್ಹತೆಯನ್ನು ಪ್ರಶ್ನಿಸುವಂತೆ ಮಾಡಿದೆ.

ಮತ್ತೊಂದೆಡೆ, ಇಸ್ರೇಲ್ ಲೆಬನಾನ್‌ನಲ್ಲಿರುವ ಹಿಜ್ಬುಲ್ಲಾ ಮೇಲಿನ ದಾಳಿಯನ್ನು ನಿಲ್ಲಿಸದಿದ್ದರೆ ನಾವು ಮಾತುಕತೆಯಿಂದ ಹಿಂದೆ ಸರಿಯುವುದಾಗಿ ಇರಾನ್ ಎಚ್ಚರಿಸಿದೆ. ಆದರೆ, ದಾಳಿ ನಿಲ್ಲಿಸಲು ಅಮೆರಿಕ ಮತ್ತು ಇಸ್ರೇಲ್ ನಿರಾಕರಿಸಿರುವುದು ಈ ಇಸ್ಲಾಮಾಬಾದ್ ಮಾತುಕತೆಯ ಯಶಸ್ಸಿನ ಮೇಲೆ ಕರಿನೆರಳು ಬೀರಿದೆ,(ಏಜೆನ್ಸೀಸ್​).