ಲಕ್ಸುರಿ ಫೀಚರ್ಸ್​​ ಮಧ್ಯೆ ಇದೆಂಥ ಬಿಗ್ ರಿಸ್ಕ್​? 30 ಲಕ್ಷ ಇವಿ ಕಾರನ್ನು ದಿಢೀರ್​ ಹಿಂಪಡೆದ ಟೆಸ್ಲಾ | Tesla EV

Tesla EV: ವಿಶ್ವದ ಅತ್ಯಂತ ಶ್ರೀಮಂತ ಉದ್ಯಮಿ ಎಲಾನ್ ಮಸ್ಕ್​ ಒಡೆತನದ ಟೆಸ್ಲಾ ಎಲೆಕ್ಟ್ರಿಕ್ ಕಾರುಗಳ ಮೇಲಿನ ಸುರಕ್ಷತೆಯ ಕಾಳಜಿ ಕುರಿತಾದ ಸಮಸ್ಯೆ ಇದೀಗ ಚೀನಾದಲ್ಲಿ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ.

ಆ್ಯಕ್ಸಿಡೆಂಟ್​ ಸಮಯದಲ್ಲಿ ಕಾರಿನ ವಿದ್ಯುತ್ ವ್ಯವಸ್ಥೆಯು ಅಸಮರ್ಪಕವಾಗಿ ಕಾರ್ಯನಿರ್ವಹಿಸಿದರೆ ಕಾರಿನಿಂದ ತಕ್ಷಣಕ್ಕೆ ಹೊರಬರಲು ಬಳಸುವ ಎಮರ್ಜೆನ್ಸಿ ಡೋರ್ ಹ್ಯಾಂಡಲ್ ದೊಡ್ಡ ಸಮಸ್ಯೆಯಾಗಿ ಕಾಡಿದ ಹಿನ್ನೆಲೆ ಸಂಸ್ಥೆಯು ಸುಮಾರು 30 ಲಕ್ಷ ಕಾರುಗಳನ್ನು ವಾಪಾಸ್​ ಪಡೆದು, ಪರಿಶೀಲನೆಗೆ ಒಳಪಡಿಸಿದೆ ಎಂದು ವರದಿಯಾಗಿದೆ.

ಚೀನಾದ ರಾಜ್ಯ ಆಡಳಿತದ ಪ್ರಕಾರ, ಟೆಸ್ಲಾ ಸುಮಾರು 3 ಮಿಲಿಯನ್ ಎಲೆಕ್ಟ್ರಿಕ್ ವಾಹನಗಳನ್ನು ಹಿಂಪಡೆದಿದೆ. ಇದು ಮಾಡೆಲ್ 3, ವೈ, ಎಕ್ಸ್ ಮತ್ತು ಎಸ್ ವಾಹನಗಳನ್ನು ಒಳಗೊಂಡಿದೆ. ಅಪಘಾತದ ಸಮಯದಲ್ಲಿ ಬಾಗಿಲು ಹಿಡಿಕೆಗಳನ್ನು ಮರೆಯಾಗುವುದರಿಂದ ಪ್ರಯಾಣಿಕರಿಗೆ ಬಾಗಿಲುಗಳು ಬೇಗನೆ ಓಪನ್​ ಆಗುವುದಿಲ್ಲ ಎಂಬ ಆತಂಕವಿದೆ. ಈ ಹಿನ್ನೆಲೆಯಲ್ಲಿ ಮಸ್ಕ್​ ಒಡೆತನದ ಸಂಸ್ಥೆಯು ಹೆಚ್ಚಿನ ಸಂಖ್ಯೆಯ ಕಾರುಗಳನ್ನು ವಾಪಸ್​ ಪಡೆದಿದ್ದಾಗಿ ತಿಳಿಸಿದೆ.

ವಾಸ್ತವವಾಗಿ, ಎಲೆಕ್ಟ್ರಿಕ್ ವಾಹನಗಳ ಬ್ಯಾಟರಿ ಮತ್ತು ವಿದ್ಯುತ್ ವ್ಯವಸ್ಥೆಯು ಹಾನಿಗೊಳಗಾದಾಗ, ಸಾಮಾನ್ಯವಾಗಿ ಕಾರ್ಯನಿರ್ವಹಿಸುವ ವೈಶಿಷ್ಟ್ಯಗಳು ಸಹ ಪರಿಣಾಮ ಬೀರುವ ಸಾಧ್ಯತೆಯಿದೆ. ಇಂತಹ ಸಂದರ್ಭಗಳಲ್ಲಿ, ಕಾರಿನಲ್ಲಿರುವ ಜನರು ಹೊರಬರಲು ಮತ್ತು ಹೊರಗಿನ ಜನರಿಗೆ ಬಾಗಿಲು ತೆರೆಯಲು ಕಷ್ಟವಾಗಬಹುದು ಎಂದು ಚೀನಾ ಸರ್ಕಾರ ಕಳವಳ ವ್ಯಕ್ತಪಡಿಸಿದೆ.

ಚೀನಾದಲ್ಲಿ ಇವಿಗಳನ್ನು ಒಳಗೊಂಡ ಸರಣಿ ಕಾರು ಅಪಘಾತಗಳು ಡೋರ್ ಹ್ಯಾಂಡಲ್‌ಗಳ ಬಗ್ಗೆ ತೀವ್ರ ಆತಂಕವನ್ನು ಹೆಚ್ಚಿಸಿವೆ. ಅದೇ ಸಮಯದಲ್ಲಿ, ಚೀನಾದ ಮಾರುಕಟ್ಟೆಯಲ್ಲಿ ಸ್ಥಳೀಯ ತಯಾರಕರು ಸುರಕ್ಷತೆಯ ಕಾರಣಗಳಿಗಾಗಿ ಹೆಚ್ಚಿನ ಸಂಖ್ಯೆಯ ವಾಹನಗಳನ್ನು ಇದೀಗ ಹಿಂಪಡೆಯಲು ಮುಂದಾಗಿದ್ದಾರೆ.

ಮತ್ತೊಂದೆಡೆ, ಟೆಸ್ಲಾ ಕೂಡ ಸೈಬರ್ ಕ್ಯಾಬ್ ಮೇಲೆ ಹೆಚ್ಚಿನ ಆದ್ಯತೆ ನೀಡುತ್ತಿದೆ. ಈ ಆಟೋ ವಾಹನವು ಸ್ಟೀರಿಂಗ್ ವೀಲ್ ಮತ್ತು ಪೆಡಲ್ ಇಲ್ಲದೆಯೇ ಮಾರುಕಟ್ಟೆಗೆ ಬರಲಿದೆ. ಇದು ಟೆಸ್ಲಾ ಅವರ ರೋಬೋಟ್ಯಾಕ್ಸಿ ಟೆಕ್ನಾಲಜಿಗೆ ಹಿಡಿದ ಕನ್ನಡಿಯಾಗಲಿದೆ. ಕಂಪನಿಯು ತನ್ನ ಉದ್ಯೋಗಿಗಳಿಗಾಗಿ ಖಾಸಗಿ ರಸ್ತೆಗಳಲ್ಲಿ ಸೇವೆಯನ್ನು ಪ್ರಾರಂಭಿಸಲು ವ್ಯವಸ್ಥೆ ಮಾಡಿಕೊಡುತ್ತಿದೆ,(ಏಜೆನ್ಸೀಸ್).