ಟ್ರಂಪ್​ ವಾರ್ನಿಂಗ್​ಗೆ ಬಗ್ಗುವ ಮಾತೇ ಇಲ್ಲ! ಅಮೆರಿಕ ಜತೆ ಡೀಲ್​, ಮಾತುಕತೆಗೆ ಇರಾನ್ ಡೋಂಟ್​ ಕೇರ್​​

Iran-US War: ಶಾಂತಿ ಒಪ್ಪಂದಕ್ಕೆ ಅಸ್ತು ಎಂದಿದ್ದ ಅಮೆರಿಕ ಮತ್ತು ಇರಾನ್ ಇದೀಗ ಮತ್ತೆ ಪರಸ್ಪರ ದಾಳಿಗೆ ಮುಂದಾಗಿರುವುದು ಸದ್ಯ ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆಯನ್ನು ಸೃಷ್ಟಿಸಿದೆ.

ದಿನದಿಂದ ದಿನಕ್ಕೆ ಯುದ್ಧವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯಲು ಇರಾನ್​ ಮತ್ತು ಅಮೆರಿಕ ಹೊಸದಾಗಿ ಶ್ರಮಿಸುತ್ತಿರುವುದು ಇಲ್ಲಿ ಸ್ಪಷ್ಟವಾಗಿ ಕಾಣಿಸುತ್ತಿದೆ. ಇರಾನ್ ಜೊತೆಗಿನ ಕದನ ವಿರಾಮ ಮಾತ್ರ ಕೊನೆಗೊಂಡಿದೆ ಎಂದಿರುವ ಟ್ರಂಪ್​, ಅಗತ್ಯವಿದ್ದಲ್ಲಿ 1000 ಕ್ಷಿಪಣಿ ದಾಳಿಗಳನ್ನು ಕೈಗೊಳ್ಳಲು ಯುಎಸ್​ ಸಿದ್ಧ. ಒಂದು ವರ್ಷದವರೆಗೆ ನಿರಂತರವಾಗಿ ದಾಳಿಗಳನ್ನು ಮುಂದುವರಿಸುವ ಸಾಮರ್ಥ್ಯವನ್ನು ಅಮೆರಿಕ ಸೇನೆ ಹೊಂದಿದೆ ಎಂದು ವಾರ್ನಿಂಗ್​ ಕೊಟ್ಟಿದ್ದಾರೆ.

ಟ್ರಂಪ್​ ನೀಡಿರುವ ಎಚ್ಚರಿಕೆಯ ಬೆನ್ನಲ್ಲೇ ಸಿಟ್ಟಿಗೆದ್ದಿರುವ ಇರಾನ್​, ಅಮೆರಿಕ ಜತೆಗಿನ ಮಾತುಕತೆ ಅಥವಾ ಒಪ್ಪಂದಗಳು ಇನ್ಮುಂದೆ ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಯುದ್ಧದ ವಿಚಾರದಲ್ಲಿ ಯುಎಸ್​ ತನ್ನ ನಿಲುವು ಬದಲಿಸುವವರೆಗೆ ಯಾವುದೇ ಮಾತುಕತೆಗೂ ನಾವು ಮುಂದಾಗುವುದಿಲ್ಲ ಎಂದು ಟ್ರಂಪ್​ ಸೊಕ್ಕಿನ ಮಾತುಗಳಿಗೆ ತಿರುಗೇಟು ನೀಡಿದೆ.

ಹೊರ್ಮುಜ್ ಜಲ ಮಾರ್ಗದಲ್ಲಿ ಹಡಗುಗಳ ಮೇಲೆ ಇರಾನ್​ ದಾಳಿ ನಡೆಸಿದ್ದಕ್ಕೆ ಪ್ರತಿಕಾರ ತೀರಿಸಿಕೊಳ್ಳಲು ಅಮೆರಿಕ ಕೈಗೊಂಡ ದಾಳಿ ಈಗ ಭಾರಿ ಉದ್ವಿಗ್ನತೆಗೆ ಸಾಕ್ಷಿಯಾಗಿದೆ. ಇರಾನಿನ ನಗರಗಳ ಮೇಲೆ ಬಾಂಬ್ ಅಟ್ಯಾಕ್​ ಮಾಡಿದ ಟ್ರಂಪ್​ ದೇಶದ ಮಿತ್ರ ರಾಷ್ಟ್ರಗಳಾದ ಕತಾರ್, ಬಹ್ರೇನ್‌ ಮೇಲೆ ಇರಾನ್​ ಸರಣಿ ದಾಳಿಗಳನ್ನು ನಡೆಸಿತು. ಸದ್ಯ ಎರಡೂ ರಾಷ್ಟ್ರಗಳ ಮಧ್ಯೆ ಕಿಚ್ಚಿನ ವಾತಾವರಣ ಸೃಷ್ಟಿಯಾಗಿದ್ದು, ಇದ್ಯಾವ ಹಂತಕ್ಕೆ ಹೋಗಲಿದೆ ಎಂಬ ಆತಂಕ ಇತರೆ ದೇಶಗಳಲ್ಲಿ ಕಾಡಲಾರಂಭಿಸಿದೆ,(ಏಜೆನ್ಸೀಸ್).